shadow
Diocese de Dili > NOTÍCIAS > LETURA DIÁRIA > Quarta-Feira, XXVIII Semana Tempo Comum (ANO B)

Quarta-Feira, XXVIII Semana Tempo Comum (ANO B)

Primeira Leitura                      Gal. 5. 18-25

Lia housi São Paulo nia Surat ba Sarani sira iha Galácia

Maun alin sira: Espírito mak lori imi karik, ukunfuan ida mós la kona imi. Wainhira imi buka imi rasik nia ksolok, buat nebé mosu mak sala fo’er, hanoin áat no arbiru de’it kona ba isin; adora lulik no tau aimoruk áat; hirus malu no istori malu; laran moras ba malu, laran áat malu no tolok malu; lia la tuir malu, fahe malu, haré malu ho laran dodok; lanu ho tua, hahalok áat no buat sira hanesan ne’e. Ha’u dehan ba imi ohin kedas nu’udar ha’u dehan tiha ona ba imi uluk; sira nebé moris hanesan ne’e sei la simu Maromak nia reino nu’udar liman rohan. Buat nebé espírito lori mai oin seluk liu: domin, ksolok, dame, paciência, laran di’ak, laran luak, fiar malu, laran maus no ukun an. Tebes duni, la iha ukunfuan nebé bele hasouru buat sira ne’e. Imi la hedi karik ba cruz imi nia hakarak atu buka imi rasik nia ksolok no di’ak, imi la bele pertence ba Cristo Jesus.

Ita moris tan Espírito karik, ita husik Espírito lori ita. Ita tenki husik ona ita nia foti an, ita nia provoka malu no laran moras ba malu.

Maromak Futar Lia.

 

Salmo Responsorial                                                                                                                                                            Sal. 1. 1-2, 3, 4, 6 (R. Jo. 8. 12)

Refrão : Na’i, ema be tuir Ita, nia iha roman moris nian!!! Repete-se

  • Ksolok ba ema nebé la tuir ema áat nia lia,

          La tuir dalan maksalak.

          Ksolok ba sira be la hadulur ho ema áat.

          Maibé haksolok ho Na’i Nia ukunfuan,

          Hodi hanoin ho neon kalan-loron. Refrão

 

  • Nia hanesan ai-kudan ida iha wé-inan ninin;

          Nafuan tuir nia tempo,

          Nia tahan la namlaik,

          Buat hotu nebé nia halo, sai di’ak de’it. Refrão

 

  • Maibé, ema áat sira nia moris oin seluk,

          Sira hanesan haré-kain be anin lori,

          Na’i hatene ema lós nia dalan,

          Dalan ema áat sira nian, lori ba rahun áat. Refrão

 

Aclamação                                                                                                                                                                                                                   Jo. 10. 27

Refrão : Aleluia, Aleluia!! Repete-se

                  Ha’u Nia bibi sira rona Ha’u lian, Na’i lia tun:

                  Ha’u hatene sira, sira mai tuir Ha’u. Refrão

 

Evangelho                                                                                                                                                                                                              Lc. 11. 42-46

Na’in Jesus Cristo nia Evangelho nu’udar São Lucas haktuir:

Iha tempo neba, Jesus dehan: “Susar ba imi, fariseu sira, nebé selu imposto ruku, salsa no modo tomak nian, maibé haluha justiça no domin ba Maromak! Halo duni buat ne’e ba, maibé keta haluha buat seluk. Susar ba imi, fariseu sira nebé hakarak tur iha fatin uluk iha sinagoga no haksolok wainhira ema cumprimenta imi iha basar. Susar ba imi, basá imi hanesan rate sira nebé ema la haré no ema sama tanba sira la hatene!”

Doutor ukufuan nian ida simu hodi dehan: “Mestre, wainhira Ita ko’alia hanesan ne’e, Ita hateten áat mós ami.” Nia hatan: “Susar mós ba imi, doutor ukunfuan sira nian, basá imi tau naha todan liu ba ema, maibé imi rasik la book limanfuan ida mós atu foti nia”.

Lia Maksoyn.

Leave a Reply

Your email address will not be published. Required fields are marked *