shadow
Diocese de Dili > NOTÍCIAS > LETURA DIÁRIA > Segunda-Feira, XXVIII Semana Tempo Comum (ANO B)

Segunda-Feira, XXVIII Semana Tempo Comum (ANO B)

Primeira Leitura              Gal. 4. 22-24, 26-27, 31; 5, 1

Lia housi São Paulo nia Surat ba Sarani sira iha Galácia

Maun alin sira: imi rona ona buat nebé ukunfuan hateten? Nia dehan katak Abraão iha oan na’in rua: ida housi atan feto ida no ida housi feto nebé la’os atan. Nia oan housi atan feto moris mai hanesan ema bai-bain, maibé ida nebé moris housi feto nebé la’os atan moris mai tanba Maromak nia lia hakotu. Sira ne’e, ita labele haré nu’udar ilas: feto na’in rua mak moruk rua nia ilas. Moruk nebé fó oan nu’udar atak mak Agar; Agar mak ilas moruk nebé halo iha foho Sinai nian. Maibé Jerusalém lalehan la’os atan; nia ita nia inan, basá Escritura dehan: “Haksolok ba, feto nebé la hetan oan; hakilar ho ksolok ba, ó nebé la koko moras tur ahi nian, basá feto nebé ema husik hela sei hetan oan sira, liu fali feto nebé nia la’en la husik nia.”

Ne’e duni, maun alin sira, ita la’os atan feto ida nia oan, maibé ita moris mai housi feto nebé la’os atan.

Ita iha liberdade – Cristo hasai ona ita housi moris atan nian! Ne’e duni, hamriik ba nu’udar ema nebé la’os atan! Keta husik imi an sai atan fali!

Maromak Futar Lia.

 

Salmo Responsorial                                                                                                                                            Sal. 112(113). 1-2, 3-4, 5ª, 6-7 (R. cf. 2)

Refrão : Rahun di’ak ba Na’i Nia naran!!! Repete-se

Ou         : Aleluia!

  • Na’i Nia atan sira, imi hahi Nai ba,

          Hahi Na’i Nia naran ba!

          Rahun di’ak ba Na’i Nia naran

          Oras ne’e no ba nafatin. Refrão

 

  • Housi loron matan nakfera to’o loron monu,

          Hahi nafatin Na’i Nia naran.

          Na’i ukun povo hotu,

          Nia glória iha lalehan tutun. Refrão

 

  • Tanesan sé, Na’i, ita Maromak

          Be hali’is An housi leten áas atu haré lalehan no rai?

          Foti ema folin laek housi rai rahun,

          Hasa’i ema kiak housi susar laran,

          Hodi halo nia tur ho ulun sira Nia povo nian. Refrão

 

Aclamação                                                                                                                                                                                                       Sal. 94(95). 8ab

Refrão : Aleluia, Aleluia! Repete-se

                  Ohin imi rona karik Na’i Nia lian,

                  Keta taka imi nia fuan. Refrão

 

Evangelho                                                                                                                                                                                                              Lc. 11. 29-32

Na’in Jesus Cristo nia Evangelho nu’udar São Lucas haktuir:

Iha tempo neba, wainhira ema lubun boot halibur tiha an, Jesus dehan: “Otas ne’e otas áat duni; ema sira husu sinal ida, maibé sinal mesa nebé sei fó ba sira mak sinal Jonas nian. Basá, hanesan Jonas sai sinal ba ema rai Nínive nian, nune’e mós Oan Mane sei sai sinal ida ba ema sira housi otas ne’e. Iha loron tesi lia nian, liurai feto tasi mane nian sei hamriik hasouru ema sira ne’e hodi tesi lia todan ba sira; basá nia mai housi mundo nia rohan atu rona Salomão nia matenek, no iha ne’e iha Ida nebé boot liu fali Salomão. Iha loron tesi lia nian, Nínive nia oan sira sei hamriik  hasouru ema ne’e, hodi tesi lia todan ba sira; basá wainhira Jonas haklaken Maromak nia liafuan, sira hakribi sira nia sala, maibé iha ne’e iha Ida nebé boot liu fali Jonas”.

Lia Maksoyn.

Leave a Reply

Your email address will not be published. Required fields are marked *