shadow
Diocese de Dili > NOTÍCIAS > LETURA DIÁRIA > Quinta-Feira, XXVIII Semana Tempo Comum (ANO B)

Quinta-Feira, XXVIII Semana Tempo Comum (ANO B)

Primeira Leitura                       Ef. 1. 1, 3-10

Lia housi São Paulo nia Surat ba Sarani sira iha Éfeso

Maun alin sira: Housi Paulo, nebe Maromak fihir atu sai Cristo Jesus nia apóstolo, ba santo sira nebe laran metin ba Cristo Jesus; graça no dame ba imi housi Maromak, ita Aman, no housi Na’i Jesus Cristo!

Rahun di’ak ba Maromak, Na’i Jesus Cristo nia Aman. Housi lalehan tutun, hodi Cristo, Maromak haraik bensa oi-oin mai ita. Molok atu hakiak mundo, Maromak fihir kedas ita atu moris nu’udar ema santo, nu’udar ema sala laek no moris iha domin iha Nia futar oin. Tuir nia laran luak, Nia fihir ona ita houri uluk kedas atu moris nu’udar nia oan hakiak hodi Cristo; ba glória nia graça nian, nebe Nia fakar mai ita iha nia Oan doben. Iha Cristo, ho nia ran, ita hetan maksoin no perdua ba ita nia sala. Ne’e mak rikusoi graça nian nebe Nia haraik mai ita iha nia matenek no laran hatene. Nia fó hatene mai ita Nia hakaran nia mistério, nebe subar hela, nebe Nia halo iha Cristo houri uluk kedas, atu Nia sei halo tuir lolós uainhira tempo to’o ona nia rohan, katak, atu halibur no tau iha Cristo nia liman atu ukun  buat hotu iha lalehan no iha rai, ho Cristo nu’udar sira hotu nia ulun.

Maromak Futar Lia.

 

Salmo Responsorial                                                                                                                                           Sal.  97(98). 1, 2-3ab, 3cd-4, 5-6 (R. 2ª)

Refrão : Na’i, hatudu Nia Maksoyn!!! Repete-se

  • Hananu ba Na’i knananuk foun ida,

          Basá Nia halo buat mesak kmanek.

          Nia futar liman lós manan funu;

          Manan ho Nia futar liman santo. Refrão

 

  • Na’i fó hatene Nia maksoin;

          Nia hatudu justiça ba nação sira hotu.

          Nia hanoin hetan fali Nia domin no laran lós,

          Ba Israel uman. Refrão

 

  • Rai-ikun rai-ulun sasin

          Maksoin Ita Maromak Nian.

          Rai tomak haklaken Na’i,

          Haklalak ho ksolok no hananu. Refrão

 

  • Hananu ba Na’i hino hodi harpa lian,

          Ho cítara no lira nia lian;

          Ho corneta no trombeta nia lian,

          Hahi hauélok Ni’i, ita Liurai. Refrão

 

Aclamação                                                                                                                                                                                                                     Jo. 14. 6

Refrão : Aleluia, Aleluia!! Repete-se

                  Ha’u ne’e dalan, lialós no moris hun, Na’i lia tun;

                  ema ida la liu karik housi Ha’u, nia la bele ba Aman Maromak. Refrão

 

Evangelho                                                                                                                                                                                                             Lc. 11.  47-54

Na’in Jesus Cristo nia Evangelho nu’udar São Lucas haktuir:

Iha tempo neba, Jesus lia tun ba, dehan: Susar ba imi nebe hada rate profeta sira nian: maibe imi nia bei ala sira rasik mak oho sira! Nune’e imi fó sasin, hodi hakarak mós imi nia bei ala sira nia hahalok sira; basá sira mak oho, imi mak hada rate. Tan ne’e Maromak nia matenek dehan: ‘Ha’u sei haruka profeta no apóstolo sira ba sira; balun sira sei oho no balun, sira haterus.’ Maibe, Maromak mai husu conta housi ema otas ne’e nian kona ba profeta sira hotu nia ran, nebe nakfakar houri mundo hahu, housi Abel nia ran to’o Zacarias nian, Ha’u dehan ba imi, ema sira ne’e sei hatan kona ba buat hirak ne’e hotu. Susar ba imi, doutor ukunfuan sira nian, nebe hadau tiha chave matenek nian! Imi rasik la tama, no imi taka netik dalan ba sira nebe hakarak tama.”

Uainhira Nia sai housi neba, escriba no fariseu sira hahu haksesuk maka’as ho Nia, hodi koko halo Nia ko’alia kona ba buat barak. Sira buka atu halo Nia sidi ho Nia liafuan atu nune’e sira bele du’u Nia.

Lia Maksoyn.

Leave a Reply

Your email address will not be published. Required fields are marked *