shadow
Diocese de Dili > NOTÍCIAS > LETURA DIÁRIA > Domingo, XXIX Tempo Comum (Ano B)

Domingo, XXIX Tempo Comum (Ano B)

Primeira Leitura                    Ls. 53, 10-11

Lia housi Livro profeta Isaias:

Maromak hosi susar hanehan Nia atan. Maibé, atan ne’e saran karik nia an ba mate, atu selu salan nia tusan, Nia bei-oan sira sei sai wa’in, Nia sei hetan rahun-di’ak naruk. Iha atan ne’e nia liman, Maromak nia hahalok sei wa’in tebes. Susar ne’e liu tiha, Nia sei haré roman nebé sei haksolok Nia. Ha’u nia atan oan, Ha’u emar sala laej, sei fo rahun-di’ak ba ema lubun-lubun. Nia sei tula iha nia kabaas ema sira nia salan.

Maromak Futar Lia.

 

Salmo  Responsorial                                                                                                                                                             Sal. 32 (33), 4-5.18-19. 20-22

Refrão : Na’i, ami laran metin ba ita boot laran luak:

                 Haraik ita laran luak mai ami!!! Repete-se

  • Na’i futar lia lós;

          Nia halo tuir lia Nia hakotu hela

          Na’i hadomi justiça, hadomi lialós;

          Nia domin nakonu rain. Refrão

 

  • Na’i tau matan ba nia emar sira,

          Tau matan ba ema sira be tau laran ba Nia domin,

          Atu hasai sira klamar housi mate,

          Atu fo moris wainhira sira hamlaha. Refrão

 

  • Ita klamar hein Maromak,

          Nia mak tau matan mai ita, tahan ita.

          Na’i, haraik Ita graça mai ami,

          Basá, ami fiar metin ba Ita. Refrão

 

Segunda Leitura                                                                                                                                                                                                 Heb. 4, 14-16

Lia housi surat ba Hebreu sira:

Maun-Alin sira: Ita hetan ona Amolulik boot ida. Nia mak Jesus, nebé Maromak nia Oan. Nia tama ona iha lalehan. Ne’e duni, ita sei laran metin tuir ita nia fiar. Ita laós hetan Amululik boot nebé lahanoin ita nia terus. Ita hetan ona Amululik boot ida nebé koko ona susar oin-oin; Nia hanesan ita lolós, sala de’it mak lae.ne’e duni, ita ha laran metin, sei hakbesik ba rahun-di’ak nia hun. Atu nune’e, ita bele hetan di’ak no tulun, wainhira ita kuran.

Maromak Futar Lia

 

Aclamação                                                                                                                                                                                                                  Mc. 10, 45

Refrão : Aleluia, Aleluia!!! Repete-se

                  Mane Maksoyn mai atu serbi,

                  Hodi fo nia an ba mate, tan ema wa’in. Refrão

 

Evangelho                                                                                                                                                                                                            Mc. 10, 35-45

Na’i Jesus Cristo nia Evangelho Nu’udar São Marcos haktuir:

Iha tempo nebá, Tiago ho João, Zebedeu nia oan sira, hakbesik ba Jesus, hodi hasa’e lia nune’e: “Mestre, ami hakarak Ita haraik buat nebé ami husu’’. Jesus simu hodi dehan ba sira: “Imi hakarak Ha’u atu halo buat sá ida ba imi?” sira hatan fali, hodi dehan:’’Halo ami na’in rua ida tur iha Ita sorin kwanan, ida seluk iha sorin karuk iha Ita nia Reinu’’. Jesus lia tun ba sira: “Imi la hatene buat sá ida imi husu daudaun ne’e. Imi bele hemu tua cális Ha’u atu hemu?’’ Sira hatán:”Ami bele de’it!” Jesus lia tun sira na’in rua:” Imi sei simu duni Baptismo Ha’u atu simu. Maibé, atu tur iha Ha’u sorin kwanan eh karuk, ida ne’e laós ho Ha’u. Fatin hirak ne’e, na’in iha ona”. Sira seluk, na’in sanulu, rona lia hirak ne’e, sira hahú hirus Tiago ho João. Jesus bolu sira, hodi hateten nune’e: “Imi hatene oin sá nação sira nia na’i-ulun hatudu sira nia ukun ba nação. Imi hatene oin sá ema boot sira hatudu sira nia kbiit ba povo oan sira: Imi la bele tuir ida ne’e. Iha imi nia leet, ema nebé hakarak sai boot, nia sei sai imi nia atan; ema sê hakarak sai ukun-na’in, nia sei sai nu’udar ema hotu-hotu nia atan. Basá, Mane Maksoyn mai, laós atu ema serbi Nia, maibé, Nia mai atu serbi no saran Nia moris ba mate, atu soy ema hotu-hotu.”

Lia Maksoyn.

Leave a Reply

Your email address will not be published. Required fields are marked *