shadow
Diocese de Dili > NOTÍCIAS > LETURA DIÁRIA > Segunda-Feira, XXIX Tempo Comum (Ano B)

Segunda-Feira, XXIX Tempo Comum (Ano B)

Primeira Leitura                         Ef. 2. 1-10

Lia housi São Paulo nia Surat ba sarani sira iha Éfeso:

Maun alin sira: Imi mate tiha ona tanba hahalok áat no sala, nebe imi halo uainhira imi moris hela tuir mundo ne’e, hodi halo tuir ida nebe ukun nia, espírito nebe book an iha ema ulun tós sira nia laran. Uluk, ita hotu tama mós iha sira leet, hodi moris nu’udar ema laran fo’er, nebe ita nia hakarak áat no ita rasik nia hanoin áat mak ukun; nnune’e, tan ita an rasik mak ita mós, hanesan mundo tomak, soi Maromak nia laran nakali. Maibe Maromak hadomi ita teb-tebes. Nia haua’in nia laran luak mai ita. Maske ita mate tanba ita nia sala, Nia halo ita moris hi’as ho Cristo; housi graça mak imi hetan maksoin; hodi foti ita hamutuk ho Nia no fó fatin mai ita hamutuk ho Nia iha lalehan, iha Cristo Jesus.

Ne’e atu hatudu ba ema hotu iha otas nebe atu mai, housi nia laran di’ak mai ita iha Cristo Jesus, katak nia graça ua’in teb-tebes. Basá housi graça mak ita hetan maksoin, housi fiar, la’os housi buat ruma nebe mai housi imi, maibe housi presente ida housi Maromak; la’os housi imi nia hahalok ruma, atu nune’e ema ida la bele gaba an. Ita mak Maromak nia hahalok kmanek, nebe Nia hakiak iha Cristo Jesus, atu ita bele moris nu’udar ema di’ak nu’udar Nia hakarak nanis houri uluk kedas.

Maromak Futar Lia.

 

Salmo  Responsorial                                                                                                                                                            Sal. 99(100), 2, 3, 4, 5 (R. 3b)

Refrão : Na’i, halo ita moris, Ita Ninian! Repete-se

  • Rai klaran tomak hahi Na’i!

          Serbi Na’i ho ksolok;

          La’o to’o Nia ho knananuk ksolok nian. Refrão

 

  • Imi hatene ba, Na’i mak Maromak!

          Nia mak halo ita moris, ita Ninian.

          Ita Ninia povo, bibi sira housi Nia bibi luhan. Refrão

 

  • Imi tama housi odamatan mai, fó graça,

          Tama liu housi Nia uma klabis ho hino hahi nian,

          Agradece ba Nia, hahi Nia naran. Refrão

 

  • Basá, Na’i di’ak!

          Nia laran-luak rohan laek.

          Ninia neon lós hada’et housi otas ba otas. Refrão

 

Aclamação                                                                                                                                                                                                                       Mt. 5. 3

Refrão : Aleluia, Aleluia!!! Repete-se

                  Ksolok ba sira be kiak iha espírito basá reino

                  Lalehan sira nian.  Refrão

 

Evangelho                                                                                                                                                                                                               Lc. 12. 13-21

Na’i Jesus Cristo nia Evangelho Nu’udar São Lucas haktuir:

Iha tempo neba, housi ema lubun boot, ema ida dehan ba Nia: “Mestre, hateten ba ha’u nia maun atu fahe ami nia liman rohan.” Nia hatan: “Belun, sé mak foti Ha’u atu tesi lia kona ba imi?” Hafoin Nia dehan ba sira: “Imi haré ba, keta kaan rikusoi, basá, la’os ema nia rikusoi mak halo ema moris liu.”

Tuir mai, Nia haktuir ba sira aiknanoik ida ne’e: “Ema riku ida hetan aihan barak housi nia to’os. Nia hanoin hodi dehan ba nia an: ‘Ha’u sei halo sá lós? Basá ha’u fatin la iha atu rai ha’u nia aihan sira.’ Hafoin nia dehan: ‘Ha’u sei halo nune’e: ha’u sei sobu ha’u nia aihan fatin hodi harii ida seluk boot liu fali ida ne’e; iha neba ha’u sei rai trigo hotu ho ha’u nia rikusoi tomak. No ha’u sei dehan ba ha’u nia klamar: ‘Ha’u klamar, ó iha sasan barak nebe rai hela ba tinan ua’in; hakmatek ba, han hemu hodi haksolok ba.’ Maibe Maromak dehan ba nia: ‘Beikten! Iha kalan ne’e kedas Ha’u sei husu ó atu saran ó nia klamar; sasan sira nebe ó rai hela sei sai se nian?’ Nune’e mós sei mosu ba ema nebe rai hela rikusoi ba nia an, maibe la sai riku ba Maromak futar matan.”

Lia Maksoyn.

Leave a Reply

Your email address will not be published. Required fields are marked *