shadow
Diocese de Dili > NOTÍCIAS > LETURA DIÁRIA > Terça-Feira, XXIX Tempo Comum (Ano B)

Terça-Feira, XXIX Tempo Comum (Ano B)

Primeira Leitura                         Ef. 2. 12-22

Lia housi São Paulo nia Surat ba sarani sira iha Éfeso:

Maun alin sira: Ne’e duni, imi la iha Cristo no la tama iha uma-kain Israel nian, nu’udar malae nebe la halo parte iha moruk Maromak nia promessa nian, la iha esperança no la iha Maromak iha mundo ne’e; maibe ohin iha Cristo, imi nebe uluk dook teb-tebes, Cristo nia ran lori imi besik mai. Nia mak ita nia dame; Nia halo povo rua ne’e sai ida de’it; Nia hatun tiha muru nebe haketak ita, hodi  sobu iha Nia an rasik laran hirus malu nian; Nia halo folin laek iha nia isin rasik ukunfuan nia haruka sira, atu  halo iha nia an ema foun ida de’it housi uma-kain rua ne’e, hodi nune’e harii dame iha sira leet. Ho nia cruz,  Nia halo uma-kain rua ne’e hadame malu iha isin ida de’it iha Maromak. Iha Nia an rasik, Nia oho tiha laran hirus malu nian. Nia mai atu lori liafuan di’ak dame nian; dame ba imi nebe hela dook no dame ba sira nebe hela besik. Housi Nia, ita rua hetan espírito ida de’it atu barani hakbesik ba Aman.

Ne’e duni, imi la’os tan malae eh ema la’o rai; imi rai na’in hanesan santo sira hotu, no imi emar iha Maromak nia uma laran . Imi halo parte uma boot ida: apóstolo no profeta sira mak uma ne’e nia hun, no Cristo Jesus mak nia fatuk inan. Fatuk ai ida-idak tuir Nia. Imi mós iha Nia sa’e ba daudaun ba uma ida nebe Maromak hôrik ba, iha nia Espírito.

Maromak Futar Lia.

 

Salmo  Responsorial                                                                                                                                 Sal. 84(85). 9ab-10, 11-12, 13-14 (R. cf. 9)

Refrão : Na’i, haklaken dame ba Nia povo!!! Repete-se

  • Ha’u rona bua Na’i dehan:

          Maromak fó hatene dame ba Nia povo no Nia emar,

          Nia maksoin besik ba ema be hamta’uk Nia,

          Nia glória hôrik iha ita rain. Refrão

 

  • Laran di’ak no domin sei hetan malu,

           Dame no justiça sei hako’ak malu.

            Neon lós sei tubun  housi rai,

            Justiça sei tun mai housi lalehan. Refrão

 

  • Na’i sei haraik buat nebe di’ak,

          Ita rain sei fó fuan.

          Justiça sei la’o iha Nia oin,

          Dame sama tuir Nia ain fatin. Refrão

 

 Aclamação                                                                                                                                                                                                                  Lc. 21. 36

Refrão : Aleluia, Aleluia!!! Repete-se

                  Imi neon moris hodi hamulak nafatin atu imi bele hamriik

                  ho laran metin iha Mane Maksoin Nia futar oin.  Refrão

 

Evangelho                                                                                                                                                                                                                  Lc. 12. 35-38

Na’i Jesus Cristo nia Evangelho Nu’udar São Lucas haktuir:

Iha tempo neba, Jesus lia tun ba escolante sira, dehan: “Kesi metin imi nia futukabun no halo imi nia ahi oan lakan nafatin. Halo imi an hanesan ema sira nebe hein sira nia na’in uainhira nia mai housi festa kaben nian, atu loke kedas odamatan iha oras nebe nia to’o mai hodi tuku odamatan. Ksolok ba atan sira nebe Na’i hetan hader hela uainhira Nia to’o. Tebes, Ha’u dehan ba imi katak, nia sei kesi hena  ba nia knotak, sei halo sira tur iha mesa, hafoin Nia sei liu housi sira leet hodi serbi sira. Nia to’o mai karik iha ronda rua ka tolu, hodi hetan sira nune’e, ksolok duni ba sira.

Lia Maksoyn.

                 

Leave a Reply

Your email address will not be published. Required fields are marked *