shadow
Diocese de Dili > NOTÍCIAS > LETURA DIÁRIA > Quinta-Feira, XXIX Tempo Comum (Ano B)

Quinta-Feira, XXIX Tempo Comum (Ano B)

Primeira Leitura                       Ef.  3. 14-21

Lia housi São Paulo nia Surat ba sarani sira iha Éfeso:

Maun alin sira: Ne’e duni, ha’u hakneak iha Aman nia oin. Housi Nia, família ida-idak iha lalehan eh iha rai simu nia naran. Housi nia glória kmanek liu, Nia haraik ba imi nia biit housi nia espírito, atu imi nia laran bele sai maka’as liu tan, atu Cristo bele moris iha imi nia fuan housi fiar, no nune’e, ho imi nia abut no hun ida domin, imi bele hetan biit hamutuk ho santo  sira hotu atu hatene luan no naruk, aas no kle’an, to’o uainhira imi hatene ona Cristo nia domin, nebe aas liu matenek hotu, imi sei sai nakonu ho Maromak nia kmanek tomak.

Glória ba Nia! Nia biit nebe book an iha ita nia laran, halo barak liu fali buat nebe ita husu ka hanoin, glória ba Nia houri otas ba otas iha Kreda no iha Cristo Jesus tinan ba tinan. Amen.

Maromak Futar Lia.

 

Salmo  Responsorial                                                                                                                                      Sal. 32(33). 1 e 3, 4-5, 11-12, 18-19 (R. 5b)

Refrão : Na’i Nia laran di’ak nakonu iha rai!!! Repete-se

  • Hahi Na’i ba, imi sira be laran mós,

          Ema fuan sira be lós hahi Nia.

          Hananu ba Nia knananuk foun ida,

          Hananu ba Nia ho lian midar no ho fuan. Refrão

 

  • Na’i nia liafuan lós tebes,

          Bele laran metin iha Nia liman nia hahalok sira,

          Na’i hadomi justiça no lialós,

          Nia domin nakonu iha rai tomak. Refrão

 

  • Na’i Nia plano hela ba nafatin,

          No Nia fuan ni desenho ba derasaan hotu.

          Ksolok ba povo be fiar iha Na’i, nu’udar nia Maromak,

          Povo be Nia hili ba Nia lima-rohan. Refrão

 

  • Na’i tau matan ba sira be hamta’uk Nia,

          Ba sira be hein iha Nia laran di’ak,

          Atu hasai sira klamar housi mate,

          No fó han uainhira sira hamlaha. Refrão

 

Aclamação                                                                                                                                                                                                               Filip. 3. 8-9

Refrão : Aleluia, Aleluia!!! Repete-se

                  Ha’u hakribi sasan hotu nu’udar buat folin laek atu bele

                  Fó fatin ba Cristo no hasouru malu ho Nia.  Refrão

 

Evangelho                                                                                                                                                                                                              Lc. 12. 49-53

Na’i Jesus Cristo nia Evangelho Nu’udar São Lucas haktuir:

Iha tempo neba, Jesus lia tun ba escolante sira, “Ha’u mai atu lori ahi ba raiklaran, no Ha’u hakarak teb-tebes ahi ne’e lakan duni. Ha’u sei simu baptismo ida, no Ha’u sei  la hakmatek to’o buat ne’e mosu. Imi hanoin katak Ha’u mai atu lori dame  ba raiklaran? Ha’u dehan ba imi  katak lae; maibe atu halo ema haketak malu. Basá houri ohin ba oin, ema na’in lima iha uma laran, sira lia sei la tuir malu: na’in tolu hasouru na’in rua, na’in rua hasouru na’in tolu; aman hasouru oan mane, oan mane hasouru aman; inan hasouru oan feto, oan feto hasouru inan; banin feto hasouru feto foun, feto foun hasouru banin feto.”

Lia Maksoyn.

Leave a Reply

Your email address will not be published. Required fields are marked *