shadow
Diocese de Dili > NOTÍCIAS > LETURA DIÁRIA > Domingo, XXX Tempo Comum (Ano B)

Domingo, XXX Tempo Comum (Ano B)

Primeira Leitura                                                                                                                                                                                                    Jer. 31, 7-9

Lia housi Livro profeta Jeremias:

Na’i lia tun, dehan: Tamba Jacob, imi hakilar no haksolok ba, hodi hahí nação nebe boot liu hotu. Imi halo ema rona imi nia hahí. Imi haklalak hodi dehan: ‘Na’i salva tebes ona nia povo, Israel oan sira nebé la dauk lakon’. Ha’u sei ba hola sira housi rai-rai, Ha’u sei libur sira hotu housi fatin tomak. Ema matan delek no ain aat sira, feto sei ko’us no feto tur áhi, sira hotu  sei mai hamutuk. Ema lubun boot mak sei fila mai.  Sira mai hodi tanis, maibé, ha’u sei halo sira hetan ksolok oin-oin. Ha’u sei lori sira ba wé-matan,  Ha’u sei lori sira tuir dalan tétuk, atu sira la bele sidi. Basá, nu’udar Aman ida ba Israel, Efraim mak Ha’u nia oan boot.”

Maromak Futar Lia.

 

Salmo  Responsorial                                                                                                                                                     Sal. 125(126), 1-2ab. 2cd-3. 4-5. 6

Refrão : Na’i, halo buat kmanek oin-oin mai ita!!! Repete-se

  • Wainhira Na’i lori hikas dadur sira Sião nian,

          Hanesan fali ita mehi.

          Nia halo ita ibun hamnasa,

          Ita nanal hananu. Refrão

 

  • Gentio sira mos mai dehan:

          “Na’i halo buat di’ak wa’in ba sira!”

          Tebes, iha ita leet, Na’I halo buat mesa foun.

          Ema tomak hahí ho ksolok. Refrão

 

  • Na’i, oras ne’e halo ami nia moris

          Nakfilak tiha hanesan wé boot suli iha rai fuik maran.

          Ema sira be kari fini ho mata-wén,

          Silu fulin ho hananu. Refrão

 

  • Sira lori fini ho tanis ba toos,

          Hatiu ai-fuan, fila ho ksolok. Refrão

 

Segunda Leitura                                                                                                                                                                                                     Heb. 5, 1-6

Lia housi surat ba Hebreu sira:

Amlulik boot hotu-hotu, tan mai housi ema sira leet, sira serviço ba Maromak, tan ema sira nia di’ak. Tan ne’e, sira hasa’e ba Maromak buat karan sacrificio nian atu kasu salan. Nia hatene ema beik no maksalak sira nia susar, basá, nia mos hetan terus. Tan ne’e, mak nia sei hasa’e sacrificio atu kasu nia salan rasik, no kasu mos povo nia salan. Maibé, ema la bele simu nar-naran knar ne’e; ema nebe Maromak bolu, hanesan Aarão, mak bele simu knar ne’e. Cristo mos la foti nia an rasik atu sai amlulik sira nia ulun. Ida nebé dehan: “Ó Ha’u nia Oan, Ha’u hahoris Ó ohin”, Nia mak haraik knar ne’e ba Nia. Iha fatin seluk Escritura nian, mos hateten: “Tinan ba tinan, Ó amlulik nafatin, hanesan Melquisedec.”

Maromak Futar Lia.

 

Aclamação                                                                                                                                                                                                             2 Tim. 1, 10b

Refrão : Aleluia, Aleluia!!! Repete-se

                  Ita Maksoyn Jesus Cristo halakon mate,

                  Halo naroman moris housi Evangelho. Refrão

 

Evangelho                                                                                                                                                                                                            Mc. 10, 46-52

Na’i Jesus Cristo nia Evangelho Nu’udar São Marcos haktuir.

Iha tempo neba, Jesus sai daudaun housi Jericó ho nia Escolante sira, ho tan ema lubun boot ida. Bartolomeu, Timeu nia oan, ema ki’ak liu no matan delek; nia tur hela iha luron  ninin. Nia rona katak Jesus Nazaré nian mak liu daudaun, nia hahú hakilar dehan: “Jesus, David nia oan, sadia hela ha’u!” Ema barak haksi’ak nia atu nonok, maibé, nia hakilar liu tan. “David nia oan, sadia hela ha’u”. Jesus hamriik, dehan: “Bolu nia mai”. Sira bolu ema matan delek ne’e, hodi dehan: “Keta ta’uk! Hamriik tiha, Nia bolu daudaun ó”. Matan delek ne’e sóe tiha nia hena taka, haksoit ba hasouru Jesus. Jesus husu ba nia: “Ó hakarak Ha’u halo sá ba ó?” Nia hatán : “Mestre, halo ha’u atu haré netik!” Jesus simu, hodi dehan: “Ó bele ba ona! Ó nia fiar mak soy ó”. Matan delek ne’e teki-tekil matan haré mos fali, hahú la’o tuir Jesus.

Lia Maksoyn.

Leave a Reply

Your email address will not be published. Required fields are marked *