shadow
Diocese de Dili > NOTÍCIAS > LETURA DIÁRIA > Segunda-Feira, XXX Tempo Comum (Ano B)

Segunda-Feira, XXX Tempo Comum (Ano B)

Primeira Leitura                                                                                                                                                                                            Ef. 4. 4, 32-5. 8

Lia housi São Paulo nia Surat ba sarani sira iha Éfeso:

Maun alin sira: Imi buka laran di’ak ba malu, nu’udar Maromak haraik tiha ba imi iha Cristo. Imi banati tuir Maromak, nu’udar nia oan doben sira. La’o iha domin, hanesan Cristo hanourin imi, hodi saran nia An nu’udar buat karan ida mai ita; sacrificio nebe morin liu ba Maromak. Hanesan ema santo sira, keta husik ema ida iha imi leet temi sala fo’er eh buat fo’er tomak, eh laran karakten nian. hadook tiha lia fo’er, beik eh halimar nar-naran de’it nian; sira ne’e hotu folin la iha. Maibe imi fó agradece barak liu tan. Hatene  didi’ak ida ne’e: ema nebe halo sala fo’er, ema laran fo’er eh buka resin rikusoi, sira ne’e hotu hanesan adora lulik sira, ema sira ne’e sei la hetan liman rohan iha Cristo no Maromak nia reino. Keta husik ema lohi imi ho liafuan mamuk sira tan liafuan hirak ne’e mak halo Maromak nia laran nakali tun ba oan sira nebe hasouru Nia. Ne’e duni, imi keta la’o hamutuk ho sira ne’e.

Uluk, imi iha nakukun laran, maibe ohin imi sai roman ona iha Na’i; sai tiha naroman nia oan sira.

Maromak Futar Lia.

 

Salmo  Responsorial                                                                                                                                                              Sal. 1. 1-2, 3, 4, 6 (R. Ef. 5. 1)

Refrão : Imi buka moris tuir Maromak,

                 Nu’udar oan sira be Nia hadomi tebes!!! Repete-se

  • Ksolok ba ema nebe la tuir ema áat nia lia meno,

          La la’o iha dalan ema maksalak,

          Maibe haksolok ho Na’i Nia ukunfuan,

          Hodi hanoin nia ho neon kalan-loron. Refrão

 

  • Nai hanesan ai-kudan ida iha ué-inan ninin;

          Nafuan tuir nia tempo, nia tahan la namlaik,

          Buat hotu nebe nia halo, sai di’ak de’it. Refrão

 

  • Maibe, ema áat sira nia moris oin seluk,

          Sira hanesan háre-kain be anin lori,

          Na’i hatene ema lós nia dalan,

          Dalan ema áat sira nian, lori ba rahun áat. Refrão

 

Aclamação                                                                                                                                                                                                              Jo. 17. 17b,a

Refrão : Aleluia, Aleluia!!! Repete-se

                  Ita liafuan, Na’i, mak lialós tebes;

                  hametin ami iha lialós. Refrão

 

Evangelho                                                                                                                                                                                                               Lc. 13. 10-17

† Na’i Jesus Cristo nia Evangelho Nu’udar São Lucas haktuir:

Iha tempo neba, iha loron sábado ida Jesus hanourin iha sinagoga. Iha neba iha feto nebe espírito áat ida halo moras tinan sanulu resin ualu ona: nia la’o hakru’uk de’it, la bele hamriik lós. Haré tiha nia, Jesus bolu nia hodi dehan ba nia: “Feto, o nia moras la iha ona.” Hafoin Nia tau liman ba nia. Iha oras neba kedas, feto hamriik lós hodi hahi Maromak. Maibe na’i ulun sinagoga nian hirus tanba Jesus fó isin di’ak iha loron sábado; nia dehan ba ema sira: “Iha loron neen atu serbisu; ne’e duni, mai iha loron hirak ne’e; keta mai iha loron sábado.” Maibe Na’i hatan ba nia dehan: “Laran makerek sira, imi la kore imi  nia karau eh kuda housi nia luhan iha loron sábado, hodi lori nia ba fó hemu? Ne’e duni, feto ne’e, Abraão nia oan, nebe diabo kesi ba tinan sanulu resin ualu ona, la soi atu  kore tiha mós iha loron sábado?” Dehan tiha nuen’e, nia funu baluk sira moe hotu, maibe povo tomak haksolok tanba hahalok kmanek sira nebe Nia halo.

Lia Maksoyn.

Leave a Reply

Your email address will not be published. Required fields are marked *