shadow
Diocese de Dili > NOTÍCIAS > OPINIÃO > Será que presiza duni kareta PRADO no PAJERO mak dignifica nai deputado sira nia dignidade? Hilux no Landcruiser bai-bain rebaixa ka hatun sira nia dignidade?

Será que presiza duni kareta PRADO no PAJERO mak dignifica nai deputado sira nia dignidade? Hilux no Landcruiser bai-bain rebaixa ka hatun sira nia dignidade?

               Ita ema nia dignidade la depende ba material no produto superficial sira. Ita ema nia dignidade ne’e a’as liu sasan hotu nebé Maromak cria. Tamba ita ema Maromak cria tuir Maromak nia ilas ka imagem aliás Imago Dei. Tan ne’e, presiza valoriza no dignifica ita nia-an a’as liu material no produto humano nebé ita ema mak  sai domínio ba buat hirak ne’e. Moris ne’e labele depende ba sasan, moris ne’e goza ka adapta ho sasan nebé iha ona. Mambae sira dehan: “ Hidup dengan apa adanya, la’os husu fali “ada apa”? Ita nia dignidade as liu kareta, as liu ita nia posição. Tamba ita nia posição ne’e ohin ita ministro, ita deputado, ita presidente República, ita Primeiro Ministro,  ita diretor,etc, maibé aban bairua ita nia mandatu sei hotu no sei refórma. Ita nia dignidade laiha mandato, ita nia dignidade la refórma. Ida ne’e mak mosu pergunta rua iha leten atu desafia nai no lou deputado/a sira nebé declara-an katak sira mak representante no ibun povo nian iha Uma Fukun Parlamento Nacional. Tinan liman liu tiha tinan lima mai fali, nai deputado sira tun ba baze kahe povo no soe hela liafuan mamuk ba povo ki’ik katak: “Wainhira imi fó fiar mai ami nia partido, ami ba tur iha Presidante no iha Parlamento, ami sei representa imi nia fatin hodi lori imi nia lian ba discute no hato’o ba governo atu hadia imi nia moris”. Ida ne’e sai hanesan rumusan ka fórmula ida nebé fixo ona ba líder político sira atu kahe povo iha tempo campanha. Maibé de facto buat sira ne’e lao oin seluk. Hetan tiha confiança husi povo, realidade la nune’e fali. Sira nia hananu ida ne’e tuir  Filósfó Socialista  Karl Marx dehan idea ida ne’e hanaran: “ OPIO DO POVO” idea ida nebé hanesan bosok povo para fó votos ba sira, kahe povo atu vota ba sira. Tamba realidade nebé ohin loron acontece ne’e buat oin seluk ida mak mosu fali. Atu debate Orçamento Geral ba hadia povo nia moris sira sei konta história husi mundo hahu mak mai to’o 1999, sira sei sura sira nia kole kona ba processo luta ba ukun rasik a’an nian. Koitadu liu, wainhira sira debate ba Povo nebé sira representa nia futuro sira sei discute malu to’o hakilar malu, tarata malu, hetok liu tan sira sai vandalismo no preman  baku malu iha neba hatudu ba mundo. Maibé, debate no aprova orçamento ba sosa kareta ho marca PRADO NO PAJERO situasaun iha uma fukun Parlamento Nacional laran hakmatek hanesan ema halo silêncio iha retiro nia laran. Nain 65 ne’e vota afavor aliás maioria absoluto. Será que sira ne’e ita bolu representante do povo ka representante do PRADO e do PAJERO? Hau confusão (Merasa binggung???!!) Kok, sira ne’e ita bolu representante do povo maibé la rona povo nia lian!? Se nune’e, sé los mak sai povo nia lian?? Oposição + AMP sama dengan (=) aliás hanesan deit. Nem ida mak rejeita proposta sosa kareta PRADO no PAJERO. Embora, oras ne’e dau-daun kareta PRADO tuan nebé sira sosa iha 3a legislatura sei diak no sei bele uza. Maibé sira halo lelan ka lelaun ba sira nia companheiro no camarada sira uza hodi tau sasan povo no estado nian sai sasan privado. Sentido estado iha nebé?? Será que ema sira ne’e mak nacionalista no patriotista?? Kareta sosa ho osan montante nebé boot $64.000 dolar USD, faan no lelaun ho $8.000 USD lógica iha nebé??? Justo? Transparência iha nebé? Povo sira presiza loke matan, povo ki’ik sira nebé matenek uitoan tenki iha consciência crítica ba injustiça hirak ne’e. Tamba sá mak ita brani afirma no declara  sira iha uma Fukun Parlamento prática injustiça no abuso poder? Tamba  sira nebé oras ne’e iha neba, privatiza património do estado no povo nian sai património privado. Pior liu tan, sira ba tur iha Parlamento tinan liu cria lei pensão vitalícia atu hariku sira nia família no geração. Depois de mandato tinan lima, sira sei iha garantia katak maski la serbisu maibé salário PENSÃO VITALÍCIA nian garantido ba sira nia moris. Hahalok ida ne’e mak dehan: injustiça no corrupção social e legal. Ema seluk serbisu too dolar mak fóin hetan DOLAR, nai ex governante no ex deputado sira la serbisu maibé salário okay. Justiça social iha ka lae? Sira nebé Católica no cristão lee didiak  iha carta São Paulo nian dehan: “Se alguém não quer trabalhar, tambem não coma. Ouvimos dizer que alguns de vós vivem na ociosidade, sem fazerem trabalho nenhum, mas ocupados em atividades inúteis. A esse ordenamos e recomendamos, em nome do Senhor Jesus Cristo, que trabalho em paz, para ganharem o pão que comem. Quanto a vós, irmão não vos canseis de fazer o bem” (Ema ruma la serbisu karik, keta fó han ba nia. Ohin ami rona katak iha ema iha imi leet nebé moris hodi halimar deit; la halo serbisu ruma maibé book ema seluk. Iha Nai Jesus Kristu, ami haruka no bolu ema sira ne’e atu serbisu nonok hodi manan sira nia ai-han) (2Tes. 3, 10b-13). São Paulo nia mensagem furak nebé ita lee iha nia Carta ba Tessalónica ne’e, nia alerta ba ema iha momento neba no mos mai ita iha tempu atual nafatin nebé prática hela hahalok injustiça nebé buras iha sociedade Timor-Leste nia leet.

               Bai-bain ema dehan: “a experiência é a mestra da vida” ida ne’e bazea ba poémica nebé mosu iha tinan kotuk kona ba estudante universitário Timor oan sira nebé halibur hamutuk hodi fórma Movimento Universitário de Timor Leste (MUTL) hodi exige atu cansela Parlamento Nacional sosa kareta luxo PRADO atu uza nafatin kareta PRADO nebé uluk sosa ona iha 3a legislatura nian. Infelizmente, iha momento neba, senhores deputado sira hatan tiha hotu hodi cansela sosa kareta PRADO no cansela mos atu halo lelaun ba kareta refere. Halo declaração falsa iha média local sira: RTTL, GMN, STL, Timor Post no média seluk tan hodi cansela tiha sosa kareta no lelaun kareta. Maibé até a data kareta ho Marca PRADO barak sei PARADO hela iha nai deputado sira nia kadunan hafutar nudar nai no lou sira nia riku soin privado. Afinal, sasan nação nian no povo nian. Koitado. Agora mehi ona no realiza fali proposta tinan kotuk nian atu sosa PRADO no PAJERO fóun ba nai deputado fóun no tuan sira hodi halo fiscaliza programa. Instituição barak, NGO local no internacional barak uza kareta sira hosi UNTAET nia tempo to’o agora seidauk troka kareta. Sira serbisu iha área remotas no izolado, estrada a’a no kuak, maibé kareta la sai sasukat atu dignifica sira nia dignidade maibé serbisu atu serbi ema mak dignifica sira nia dignidade. Sira kaer fali ba Jesus nebé dehan iha Evangelho: “ Hau mai la’os atu ema serbi maibé atu serbi no saran nia an ba mate” (Mc 10, 45). Ida nee mak representante lolos. Heroi lolos, nacionalista no patriotista lolos. La’os ba serbi PRADO no ba representa Pensão Vitalícia. Campanha kanta buat seluk, depois de hetan tiha poder halo buat seluk. Ne’e hatudu política ida samea nian, la’os política manu-falur nian. Iha história criação nian, samea mak criação ida nebé dada criatura seluk ba sala. Sala tama iha mundo hodi lori pecado original tama iha mundo tamba política samea nebé bosok Adão ho Eva. Nune’e mos ohin loron nação sai kiak no mukit tamba político samea sira nebé bosok povo fó confiança ba sira hodi hetan poder atu lori nação ba sai miséria no conflito. Kiak barak sei existe iha Timor tamba Lei nebé Parlamento sira cria la fó benefício ba Povo nia moris tamba benefício ba sira nia an rasik. Hariku no fó ksolok ba sira nia-an no familia, partido, etc. Povo maioria sei hela iha uma tali okos, escola barak labarik sira sei tur iha rai, maibé nai deputado sira iha MEHI nebé boot atu fó privilégio ba sira nia-an  rasik. Sae kareta Hilux no Landcruiser ne’e deputado sira nia dignidade tun, no la level ona nudar cidadão. TENKI sae duni mak PRADO vidru metan, PAJERO modelo 2018 nian mak sira fóin iha dignidade no level nudar ema REPRESENTANTE POVO NIAN. Será que kareta PRADO deit mak bele ba pesquiza iha baze?? Hilux no Landcruiser ne’e laiha traxão no la level ba nai deputado sira?? Se ita boot sira tau a’an nudar representante povo Timor-Leste nian duni, reflete took pergunta hirak ne’e ba! Nai no lou sira mak mosu hanesan Anjo ka Malaikat husi lalehan mai derepente ba tuur iha neba. Então cria lei tuir imi nia gosto, imi selera, imi nia gengsi, maibé heroi sira nebé mate ba rai ida ne’e sei loke matan ba ita! Tamba nação ida ne’e nia dignidade la’os lori PRADO no PAJERO mak dignifica maibé lori RAN HO RUIN mak sosa. Povo hakilar bei-beik ba imi la rona, maibé povo hakilar ba heroi sira sei rona no sei considera povo nia lian. Heroi sira sei julga ita ida-idak sei ba para iha Hotel Luxo Becora no Gleno hanesan factos hirak nebé hatudu hela daudaun. La’os deit povo ain tanan mak ba hela iha Hotel Luxo maibé nai no lou balu mos agora hamahaan-an hotu iha neba tamba serbi povo la ho fuan no la liman mos.

 

Hakerek nain: Agostinho Piedade

Estudante Finalista: Instituto Superior de Filosofia e de Teologia D. Jaime Garcia Goulart

Hela fatin : Same, Manufahi

Email : agusbabo3108@gmail.com

 

 

Leave a Reply

Your email address will not be published. Required fields are marked *