shadow
Diocese de Dili > NOTÍCIAS > LETURA DIÁRIA > Sexta-Feira, XXX Tempo Comum

Sexta-Feira, XXX Tempo Comum

Comemoração de todos os fiéis defuntos – Missa Próprio

 

Primeira Leitura       Job. 19. 1, 23-27ª

Lia housi Livro Job nian

Iha loron hirak neba, Job lia tun dehan: “Ha’u hakarak ema hakerek hela ha’u nia liafuan hirak ne’e. Ha’u hakarak tebes hela ha’u atu hakerek iha livro ida; hakerek nafatin iha fatuk ida. Ha’u hatene katak iha loron ikus ha’u sei moris hi’as housi rate; ha’u sei hetan isin foun; sei haré ha’u nia Maromak ho ha’u isin rasik. Ha’u rasik sei haré, hodi hahi Nia.”

Maromak Futar Lia.

 

Salmo Responsorial                                                                                                                                            Sal. 26(27). 1, 4, 7, 8b, 9ª, 13-14 (R.13)

Refrão : Ha’u he’in atu haré Na’i Nia laran-luak

                 Iha ema moris sira rain. Repete-se

  • Na’i ha’u nia naroman, ha’u maksoyn,

          Ha’u ta’uk fali sé?

          Na’i tahan ha’u moris,

          Sé bele halo ha’u nakdedar? Refrão

 

  • Buat ida de’it ha’u buka,

          Ha’u husu ba Na’i;

          Iha ha’u nia moris tomak hôrik iha Nia kadunan,

          Hodi haksolok ho Na’i nia tulun,

          No fihir Nia templo. Refrão

 

  • Na’i, rona ha’u nia harohan,

          Sadi’a ha’u no rona ha’u.

          Na’i, ha’u buka Ita futar oin,

          Keta subar Ita futar oin mai ha’u. Refrão

 

  • Ha’u hein atu haré Na’i Nia laran-luak,

          Iha ema moris sira rain.

          Laran metin iha Na’i, barani ba,

          Tau neon metin iha Na’i! Refrão

 

Segunda Leitura                                                                                                                                                                                             2Cor. 4. 14-5. 1

Lia housi São Paulo nia segundo Surat ba sarani sira iha Corinto

Maun alin sira: Ami mós fiar tan ne’e ami ko’alia, hodi hatene katak Ida nebé halo Jesus moris hi’as, sei halo ita mós moris hi’as no tau ami hamutuk ho imi iha Nia futar Oin. Tebes duni, buat hotu halo tiha ba imi nia di’ak, atu graça barak nebé haraik tiha ba ema wa’in be wa’in bele halo ema fó agradece liu tan ba Maromak nia glória.

Ne’e duni, ami la lakon aten barani; maibé, maski buat nebé iha liur sai dodok daudaun, ami nia laran hafoun-an lor-loron. Basá terus kmaan nebé liu daudaun ne’e hadia glória rohan laek iha ami laran; glória nebé di’ak liu buat hotu; basá ami la hateke ba buat nebé bele haré, maibé ba buat nebé la bele haré, basá buat nebé bele haré liu lalais maibé buat nebé la bele haré rohan laek. Ita hatene katak ita nia tenda rai ne’e nian nebé ita hôrik ba, sei sobu loron ida. Ita iha uma housi Maromak, uma nebé la halo ho ema nia liman, maibé rohan laek, iha Lalehan.

Maromak Futar Lia.

 

Aclamação                                                                                                                                                                                                             cf. Mt. 11. 25

Refrão : Aleluia, Aleluia!! Repete-se

                  Rahun di’ak ba Ita, Aman, Na’i lalehan no rai nian, tan

                  Ita hatudu mistério reino lalehan nian ba kiik sira. Refrão

 

Evangelho                                                                                                                                                                                                             Mt. 11. 25-30

Na’i Jesus Cristo nia Evangelho nu’udar São Mateus haktuir:

Iha oras neba Jesus dehan: “Aman, Na’i lalehan no rai nian, Ha’u hahi Ita tan Ita subar tiha buat hirak ne’e ba ema matenek no neon na’in sira hodi hatudu ba kiik oan sira. Lós duni, Aman, tan Ita hakarak duni nune’e. Ha’u Aman tau tiha buat hot-hotu iha Ha’u liman; ema ida la hatene Oan, Aman de’it mak hatene; nune’e mós ema ida la hatene Aman, Oan de’it mak hatene, no mós ema nebé Oan hakarak hatudu ba nia”.

“Mai besik Ha’u, imi hotu nebé kole no terus; Ha’u sei fó kmaan ba imi. Simu Ha’u nia ukun ba hodi banati tuir Ha’u, tan Ha’u laran maus no haraik-an; no imi sei hetan hakmatek ba imi nia klamar. Basá Ha’u nia ukun mamar, Ha’u nia naha kmaan”.

Lia Maksoyn.

 

 

Segunda Missa

 

Primeira Leitura                                                                                                                                                                                                 2Mac. 12. 43

Lia housi segundo Livro Macabeus nian:

Iha loron hirak neba, Judas Macabeus husu esmola housi nia emar sira osan dracma rihun rua hodi haruka ba Jerusalém, atu hasa’e sacrifício ida penitência nian. Hala’o buat hirak ne’e ho laran mós no kmanek tebes, tan simu naroman housi hanoin moris hi’as nian. Nune’e, nia la hein karik iha sira nebé mate ona nia moris hi’as, nia lalika harohan ba matebian sira. Maibé, nia hanoin ho neon no laran katak prémio kmanek wa’in ida rai hela ba sira nebé mate iha Na’i nia graça; ne’e mak hanoin ida kmanek no santo tebes. Tan ne’e mak nia hala’o duni sacrifício penitência nian ida kona ba matebian sira, hodi bele hamos sira salan.

Maromak Futar Lia.

 

Salmo Responsorial                                                                                                                 Sal. 102(103). 8, 13-14, 15-16, 17-18 (R. Sal. 36. 39ª)

Refrão : Ema laran mós sira nia maksoyn mai housi Na’i!!! Repete-se

  • Na’i mak laran di’ak no laran-luak,

          Laran maus no laran ksolok  tebes.

          La tau matan mai ita, tuir ita salan,

          La fó todan mai ita, tuir ita hahalok áat. Refrão

 

  • Nu’udar aman ida laran-luak ba nia oan sira,

          Nune’e mós Na’i laran-luak ba sira nebé hamtauk Nia.

          Nia hatene katak Nia mak hakiak ita,

          La haluha katak ita mai housi rai-rahun. Refrão

 

  • Ema nia loron hanesan du’ut,

          Nia namlaik hanesan ai-funan rai luan nian.

          Wainhira anin huu, nia lakon,

          Ema la hatene tan nia hôrik fatin. Refrão

 

  • Maibé Na’i Nia laran di’ak

          Hela metin nafatin ho sira be hamta’uk Nia.

          Nia justiça sei hela metin ho oan no bei-oan sira,

          Ho sira nebé rai didiak Nia moruk

          No hanoin hodi moris tuir Nia ukunfuan sira. Refrão

 

Segunda Leitura                                                                                                                                                                                             2Cor. 5. 1, 6-10

Lia housi São Paulo nia segunda Surat ba sarani sira iha Corinto:

Maun alin sira: Ita hetene katak ita nia tenda rai ne’e nian nebé ita hôrik ba, sei sobu loron ida. Ita iha uma housi Maromak, uma nebé la halo ho ema nia liman, maibé rohan laek iha lalehan. Ne’e duni, ita aten barani nafatin; ita hatene katak wainhira ita hôrik iha isin ida ne’e, ita moris dook housi Na’i, basá ita la’o hodi fiar, la’os hodi haré ho matan. Maibé ita aten barani, no ita hakarak liu husik isin ne’e atu bele hôrik ho Na’i. Tan ne’e, ita iha isin ka dook housi isin, ita buka nafatin atu fó ksolok nafatin ba Na’i. Basá ita hotu sei simu iha Cristo nia tribunal, atu ita ida-idak bele simu nia kolen di’ak eh áat, tuir hahalok nebé ita halo iha isin.

Maromak Futar Lia.

 

Aclamação                                                                                                                                                                                                           Jo. 11. 25ª-26

Refrão : Aleluia, Aleluia!! Repete-se

                  Jesus dehan ba Marta: “Ha’u ne’e moris hi’as no moris.

                  Ema nebé fiar Ha’u, maski mate ona, nia sei moris.

                  Ema hotu nebé moris hodi fiar Ha’u, nia sei la mate tan”. Refrão

 

Evangelho                                                                                                                                                                                                               Jo. 11. 21-27

Na’i Jesus Cristo nia Evangelho nu’udar São João haktuir

Iha tempo neba, Marta dehan ba Jesus: “Na’i, Ita iha ne’e karik, ha’u nia maun la mate! Maibé oras ne’e mós ha’u hatene katak Maromak sei haraik ba Ita buat nebé Ita husu ba Nia”. Jesus hatan ba nia: “Ó nia maun sei moris hi’as”. Marta simu: “Ha’u hatene katak nia sei moris hi’as iha loron ikus”. Jesus dehan teni ba nia: “Ha’u ne’e moris hi’as no moris. Ema nebé fiar Ha’u, maski mate ona, nia sei moris. Ema hotu nebé moris hodi fiar iha Ha’u, nia sei la mate tan. Ó fiar ne’e?” Marta dehan “Ha’u fiar, Na’i; Ha’u fiar katak Ita mak Messias, Maromak Oan Mane nebé atu mai iha mundo”.

Lia Maksoyn.

 

 

Terceira Missa

 

Primeira Leitura                                                                                                                                                                                               Is. 25. 6ª, 7-9

Lia housi Livro Isaías nian:

Iha loron neba, Maromak, buat hotu nia Na’in, sei tau hahan mesak di’ak de’it no tua mesak furak ba povo hot-hotu iha foho Sião. Hahan mesak bokur de’it no tua di’ak ninian. Maromak sei hasai iha foho ne’e leten, hena metan nebé taka povo tomak, hena metan nebé hamahan nação tomak. Nia sei halakon nafatin mate. Na’i Maromak sei hamaran ema hot-hotu nia mata wen. Na’i Maromak sei hasai rai tomak moe tomak nebé hanehan Nia povo. Maromak mak hakotu lia nune’e. Iha loron neba sei dehan: “Ita Nia Maromak mak ne’e, housi Nia, ita hein Maksoyn. Nia, ita Nai’in, nebé ita tau laran metin; Ita laran haksolok, hawélok tebes, tan Nia soi ita”.

Lia Maksoyn.

 

Salmo Responsorial                                                                                                                                                       Sal. 22(23). 1-3ª, 3b-4, 5, 6 (R. 1)

Refrão : Na’i ha’u nia mahein, ha’u la kuran buat ida!!! Repete-se

  • Na’i ha’u nia mahein, ha’u la kuran buat ida;

          Lori ha’u ba hakmatek iha du’ut matak,

          Lori ha’u ba wé malirin

          Hodi haksolok ha’u klamar. Refrão

 

  • Nia lori ha’u koa dalan lós tan hadomi Nia naran.

          Maski ha’u la’o housi rai-kle’an nakukun

          Ha’u sei la ta’uk buat áat ida, tan Ita hamutuk ho ha’u.

          Ita nia ai-tonka no ai-tato’an

          Fó laran metin mai ha’u. Refrão

 

  • Ita hadi’a aihan mai ha’u

          Iha ha’u funu baluk sira oin.

          Ho mina, Ita hanourin ha’u ulun;

          Ha’u cálice nakonu resin. Refrão

 

  • Laran di’ak no graça sei la’o tuir ha’u

          Lor-loron iha ha’u nia moris;

          Ha’u sei hela iha Na’i Nia uma

          Tinan-ba-tinan nafatin. Refrão

 

Segunda Leitura                                                                                                                                                                                                1Tes. 4. 13-18

Lia housi São Paulo nia primeira Surat ba sarani sira iha Tessaló:

Maun alin sira: Ami lakohi imi neon beik kona sira nebé mate ona, atu imi labele laran susar hanesan ema seluk nebé esperança laiha. Ita fiar katak Jesus mate no moris hi’as, ne’e duni ita fiar mós katak, housi Jesus, Maromak sei lori hamutuk ho Nia sira nebé mate ona hodi fiar Nia. Ne’e duni, ita sei hela nafatin ho Na’i. Tan ne’e, fó aten barani ba malu ba, ho liafuan sira ne’e.

Maromak Futar Lia.

 

Aclamação                                                                                                                                                                                                                      Jo. 6. 51

Refrão : Aleluia, Aleluia!! Repete-se

                  Na’i dehan: “Ha’u mak pão moris tun housi lalehan mai.

                  Ema sé han pão ne’e, nia sei moris ba nafatin”. Refrão        

 

Evangelho                                                                                                                                                                                                                Jo. 6. 51-58

Na’i Jesus Cristo nia Evangelho nu’udar São João haktuir:

Iha tempo neba, Jesus hateten ba ema lubun boot nune’e: “Ha’u ne’e ai-han moris nebé tun housi lalehan mai. Ema nebé han ai-han ne’e, sei moris ba nafatin. Ai-han nebé Ha’u fó, mak Ha’u nia isin rasik, nebé Ha’u fó ba mundo nia moris”. Judeu sira hateten ba malu: “Oinsá, Nia bele fó nia isin mai ita han?” Jesus dehan teni ba sira: “Tebes, Ha’u dehan tebes ba imi: imi la han karik Mane Maksoyn nia isin, imi la hemu karik Nia ran, imi sei la hetan moris. Ema sé han Ha’u nia isin, ema sé hemu Ha’u nia ran, hetan moris ba nafatin; Ha’u sei halo nia moris hi’as iha loron ikus. Ha’u isin ai-han lós duni, Ha’u ran hemu tebes duni. Ema nebé han Ha’u isin, hemu Ha’u ran, hela ho Ha’u, Ha’u hela ho nia. Hanesan Ha’u Aman nebé moris haruka Ha’u mai, Ha’u moris ho Nia; nune’e mós, ida nebé han Ha’u isin, moris ho Ha’u. Ne’e ai-han nebé tun housi lalehan; la’os hanesan ai-han nebé imi nia aman sira han. Sira mate tiha ona; ema nebé han Ai-han ne’e, sei moris ba nafatin”.

Lia Maksoyn.

Leave a Reply

Your email address will not be published. Required fields are marked *