shadow
Diocese de Dili > NOTÍCIAS > LETURA DIÁRIA > Sábadu, XXX Semana Tempo Comum

Sábadu, XXX Semana Tempo Comum

Primeira Leitura                 Flp. 1. 18b-26

Lia housi São Paulo nia Surat ba sarani sira iha Filipos:

Maun alin sira: Sira haklaken  Cristo, no tan ne’e ha’u haksolok; ha’u laran la susar ida.

Ha’u hatene katak buat sira ne’e hotu sei sai graça mai ha’u, tanba imi nia hamulak no tanba ulun nebé Cristo nia espírito fó. Ha’u hein, hodi hatene lolós katak ha’u sei la mo’e. Ha’u hatene nafatin hanesan iha tempo uluk nian katak, ha’u moris ka ha’u mate, Cristo sei hetan naran boot housi ha’u.

Mai ha’u, moris katak Cristo; mate mós folin boot mai ha’u. Maibé ha’u moris nafatin karik, ha’u sei bele serbisu ho fuan barak liu tan Ne’e duni, ha’u hanoin rua: ha’u hakarak man’manas atu husik ona moris ne’e hodi ba ona hamutuk ho Cristo; ida ne’e di’ak liu tan; maibé di’ak liu ba imi katak ha’u hela lai iha moris ne’e. Tanba ha’u hatene mós katak ha’u sei hela hamutuk ho imi, atu imi bele ba oin hodi hetan ksolok iha fiar. Ha’u sei fila fali duni ba imi dala ida tan; ha’u sei halo imi gaba an tanba imi Cristo nian.

Maromak Futar Lia.

 

Salmo Responsorial                                                                                                                                                                      Sal. 41(42). 2-3, 5 (R. 3ª)

Refrão : Ha’u klamar hamrook ba Maromak moris!!! Repete-se

  • Hanesan rusa buka Wé lolon,

          Nune’e mós ha’u klamar buka Maromak.

          Ha’u klamar hamrook ba Maromak,

          Hamrook ba Maromak moris,

          Wainhira lós ha’u sei hare Maromak Futar Oin? Refrão

 

  • Ha’u klamar laran susar hanoin,

          Wainhira mak ha’u la’o ba Na’i Nia templo,

          Iha lian ksolok no hahi nia leet,

          Iha festa ema lublubun nian. Refrão

 

Aclamação                                                                                                                                                                                                               Mt. 11. 29ab

Refrão : Aleluia, Aleluia!! Repete-se      

                  Imi tau Ha’u Nia todan  iha imi nia kbás hodi halo tuir Ha’u,

                  Na’i dehan, tan ha’u laran maus, Ha’u haraik-An. Refrão

 

Evangelho                                                                                                                                                                                                             Lc. 14. 1, 7-11

Na’i Jesus Cristo nia Evangelho nu’udar São Lucas haktuir:

Iha loron sábado ida, Jesus tama iha fariseu boot ida nia uma atu han. Sira hotu hateke ba Nia.

Haré tiha oin sá bainaka balun fihir tur fatin di’ak, Jesus haktuir ba sira aiknanoik ida ne’e: “Ema ruma convida karik ó ba festa kaben ida, keta tur iha mesa ulun; keta uma na’in convida ema boot liu ó karik; hafoin, ema nebé convida imi na’in rua sei dehan ba ó: ‘Fó lai fatin ba ema ne’e.” Nune’e o sei moe boot, hodi ba tur iha fatin ikus liu. Maibé wainhira ema convida ó, ba tur iha fatin ikus liu; nune’e, wainhira ema nebé convida ó to’o mai, nia sei dehan ba ó: ‘Belun, mai tur liu leten’. Nune’e ema hotu nebé tur hamutuk iha mesa sei hahi ó. Basá ema nebé foti an, Na’i sei hatun nia; no ema nebé haraik an, Na’i sei foti nia”.

Lia Maksoyn.

Leave a Reply

Your email address will not be published. Required fields are marked *