shadow
Diocese de Dili > NOTÍCIAS > LETURA DIÁRIA > Quarta – Feira, XXXI Semana Tempo Comum. (ANO B)

Quarta – Feira, XXXI Semana Tempo Comum. (ANO B)

Primeira Leitura                         Flp. 2. 12-18

Lia housi São Paulo nia Surat ba sarani sira iha Filipos:

Doben sira: Ne’e duni, maun alin sira, nu’udar imi hotu halo tuir nafatin ha’u nia liafuan wainhira ha’u sei hela ho imi, ohin, wainhira ha’u dook housi imi, haka’as an liu tan atu buka imi nia maksoyn ho laran ta’uk no laran nakdedar. Maromak mak halo imi, la’os de’it atu hakarak, maibé mós atu halo duni buat nebé monu lós ba nia laran. Halo buat hotu, la hodi ibun botubotu, atu nu’udar ema sala laek no la iha buat áat ruma, imi bele sai Maromak  nia oan lolós iha ema laran áat no maksalak sira leet. Imi mak naroman iha sira leet, hanesan fitun sira iha raiklaran, hodi laran metin ba liafuan moris nian. Ha’u sei haksolok hodi gaba an kona ba imi iha Cristo nia loron, wainhira ha’u sei haré katak ha’u nia haka’as an no serbisu la sai leet de’it. Ha’u fakar ha’u nia ran karik hamutuk ho imi nia fiar nia buat karan no serbisu, ha’u sei haksolok hodi halo parte imi nia ksolok, no imi mós sei haksolok no halo parte ha’u nia ksolok.

Maromak Futar Lia.

 

Salmo Responsorial                                                                                                                                                              Sal. 26(27). 1, 4, 13-14 (R. 1a)

Refrão : Na’i mak ha’u roman no ha’u maksoyn!!! Repete-se

  • Na’i mak ha’u roman no ha’u maksoyn;

          Ha’u sei tauk fali sé?

          Na’i tahan ha’u moris;

          Sé bele halo ha’u nakdedar? Refrão

 

  • Buat ida de’it ha’u buka, ha’u titu ho neon,

          Iha ha’u nia moris tomak, hôrik iha Nia kadunan,

          Hodi haksolok ho Na’i nia tulun,

          No haré Nia templo. Refrão

 

  • Ha’u titu atu haré Na’i laran-luak,

          Iha ema moris sira rain.

          Hein ho laran metin iha Na’i,

          Barani ba, hein iha Na’i. Refrão

 

Aclamação                                                                                                                                                                                                                 1Ped. 4. 14

Refrão : Aleluia, Aleluia!! Repete-se

                  Rahun di’ak ba imi wainhira ema hasara imi tanba Cristo nia naran,

                  Basá iha oras neba Maromak nia Espírito hôrik ona iha imi. Refrão

 

Evangelho                                                                                                                                                                                                              Lc. 14. 25-33

Na’i Jesus Cristo nia Evangelho nu’udar São Lucas haktuir:

Iha tempo neba, ema lubun boot la’o hamutuk ho Jesus. Nia fila oin hodi dehan ba sira: “Ema ruma mai tuir Ha’u karik, maibé la heuwai nia aman, inan, feen, oan sira, to’o nia moris rasik, ema ne’e la bele sai Ha’u nia escolante. Ema nebé la lori nia cruz hodi tuir Ha’u, nia la bele sai Ha’u nia escolante. Imi ida nebé mak, atu halo uma ida, la tur uluk atu sura buat nebé kuran, hodi haré iha osan ka lae atu halo to’o hotu? Keta halo ba, foin hahu hari, nia la iha kbiit atu halo to’o rohan. Hafoin sira nebé haré, hahu hamoe nia dehan: ‘Ema ne’e hahu hari, maibé la bele halo to rohan!’.

Eh liurai ida nebé mak ba funu hasouru liurai seluk, la tur uluk hodi hanoin didi’ak nia bele ka lae ho de’it soldado rihun sanulu ba hasouru ida nebé mai hasouru nia ho soldadu rihun rua nulu? La bele karik, wainhira ida seluk sei dook hela, nia haruka kedas manuain atu ba husu dame. Nune’e mós imi hotu nebé la husik imi nia rikusoin tomak, la bele sai Ha’u nia escolante”.

Lia Maksoyn.

Leave a Reply

Your email address will not be published. Required fields are marked *