shadow
Diocese de Dili > NOTÍCIAS > LETURA DIÁRIA > Quinta – Feira, XXXI semana Tempo Comum. (ANO B)

Quinta – Feira, XXXI semana Tempo Comum. (ANO B)

Primeira Leitura                          Flp. 3. 3-8ª

Lia housi São Paulo nia Surat ba sarani sira iha Filipos:

Maun alin sira: Ita mak ema nebé simu ona circuncisão lolós, basá ita serbi Maromak tuir Espírito, no ita laran metin ba Cristo Jesus liu fali iha ita rasik nia hahalok.

Ha’u rasik la kuran buat di’ak sira nebé ema tau sira nia laran ba. Ema balun hanoin katak sira iha buat di’ak kari, ha’u mós bele hanoin liu tan! Ha’u simu circuncisão wainhira ha’u foin loron ualu; ha’u moris nu’udar ema Israel ida, housi suku Benjamin nian. Ha’u Ebreu housi ema Ebreu. Kona ba ukufuan, ha’u ema fariseu ida, no ha’u laran manas tebes kona ba ukunfuan, tan ne’e mak ha’u fó susar ba kreda. Kona ba ha’u nu’udar ema lós tuir ukunfuan, ema ida la bele dehan buat ruma kona ba ha’u.

Maibé wainhira ha’u hetan ona Cristo, buat hotu nebé, uluk haré nu’udar folin boot, ha’u haré ona nu’udar la folin liu. Liu tan ida ne’e, wainhira ha’u hatene ona Cristo, ha’u nia Na’i, ha’u hahu haré buat hotu nu’udar folin laek.

Maromak Futar Lia.

 

Salmo Responsorial                                                                                                                                                     Sal. 104(105). 2-3, 4-5, 6-7 (R. 3b)

Refrão : Ema sira be buka Na’i, sira fuan haksolok!!! Repete-se

Ou            Aleluia!

  • Hananu ba Na’i, Ita Maromak,

          Hodi haklaken Nia hahalok kmanek wa’in;

          Hahi-an iha Nia naran santo,

          Haksolok ba, sira nebé buka Na’i. Refrão

 

  • Buka Maromak no Nia kbiit,

          La’o nafatin iha Nia futar oin;

          Imi hanoin hetan nafatin kmanek oi-oin be Nia halo,

          Housi Nia hahalok kmanek, no housi nia hanourin. Refrão

 

  • Bei oan sira Abraão nian, Na’i Nia atan,

          Oan sira Jacob nian be Na’i hili nanis,

          Na’i mak ita nia Maromak,

          Nia ukun rai tomak. Refrão

 

Aclamação                                                                                                                                                                                                                   Mt. 11. 28

Refrão : Aleluia, Aleluia!! Repete-se

                 Imi sira hotu nebé kole no terus, mai buka Ha’u.

                  Ha’u sei kasu imi todan. Na’i dehan. Refrão

 

Evangelho                                                                                                                                                                                                                 Lc. 15. 1-10

Na’i Jesus Cristo nia Evangelho nu’udar São Lucas haktuir:

Iha tempo neba, ema publicano no maksalak sira hotu hakbesik Jesus atu rona Nia. Fariseu no escriba sira hahu’u dehan: “Ema ne’e simu maksalak sira hodi han hamutuk ho sira”. Tan ne’e, Nia haktuir ba sira aiknanoik ida ne’e: “Imi ida nebé mak, iha karik bibi atus ida no lakon tiha ida, la husik sianulu resin sia seluk iha rai fuik maran, hodi ba buka ida nebé lakon to’o hetan nia?? Hetan tiha, nia tau bibi ne’e ho ksolok iha nia kbás. To’o tiha uma, nia bolu belun no maluk sira, hodi dehan ba sira: ‘Haksolok ho ha’u ba, basá ha’u hetan fali ona ha’u nia bibi nebé lakon’. Ha’u dehan ba imi katak iha lalehan sei haksolok tanba ema maksalak ida nebé hakribi nia sala, liu fali ema di’ak sianulu resin sia nebé la kuran atu hakribi sala”.

“Eh feto ida nebé mak, iha karik osan mean sanulu, lakon tiha ida, nia la sunu ahi oan, dasa uma laran hodi buka didi’ak osan nebé lakon to’o hetan nia? Hetan tiha, nia bolu nia belun no maluk sira dehan: ‘Haksolok ho ha’u ba, basá ha’u hetan ona osan mean nebé lakon. Ha’u dehan ba imi katak Maromak nia Anjo sira mós sei haksolok tanba ema maksalak ida hakribi sala”.

Lia Maksoyn.

Leave a Reply

Your email address will not be published. Required fields are marked *