shadow
Diocese de Dili > NOTÍCIAS > REFLEXÃO > JESUS VALORIZA MATRIMÓNIO CATÓLICO

JESUS VALORIZA MATRIMÓNIO CATÓLICO

LEITURA & REFLEXÃO DOMINGO COMUM II/Ano C/2019
Is 62,1-5 1cor 12,4-11 Jo 2,1-11

 

 

Premeira Leitura                            Is. 62, 1-5

Lia housi Livro Profeta Isaías:

Tan hadomi Sião, Ha’u ibun sei la taka. Tan hadomi Jerusalém, Ha’u sei la hakmatek, to’o oras nebé nia justiça nabilan hanesan rai-hun mutin, nia Maksoyn naroman nu’udar áhi-knulu. Iha oras ne’e de’it mak ó nia justiça to’o ba povo hotu, liurai hotu-hotu sei haré ó nia kbiit. Sira sei hanaran ó ho naran fóun–mai husi Maromak. Iha Na’i nia liman, ó, belak-mean ida. Iha Maromak futar liman, ó, kaibauk liurai nian. Ema sei la bolu tan ó:“feto la’en hewai”; sei la bolu tan ó rain: “rai-fuik maran”. Maibé, ema sei hanaran ó: “Ha’u doben”; sei hanaran ó rain: “rai ho fólin”! Basá, Na’i sei haksolok ho ó. Ó rai sei iha na’in ida. Hanesan mane klósan hola fetorá, nune’e mos, ó nia Maromak sei haksolok ho ó.

Maromak Futar Lia.

 

Salmo Responsorial                                                                                      Sal. 95(96), 1-2a. 2b-3. 7-8a. 9-10ac

Refrão : Haklaken ba povo hotu-hotu, Na’i nia kmanek!!! Repete-se

  • Hananu ba Na’i, knananuk fóun,

          hananu ba Na’i, rai ikun rai ulun.

          Hananu ba Na’i, hawelok Nia naran. Refrão

             

  • Haklaken lor-loron, Nia Maksoyn;

          hananu ba povo sira, ninia beran.

          Fó sai ba reino sira. Ninia kmanek. Refrão

 

  • Hawelok, povo sira, hawelok ó Na’in;

          hawelok nia beran, hawelok nia kbiit.

          Hawelok liu tan, Nia naran naroman. Refrão

 

  • Iha Nia oin, rai hotu nakdoko.

          Fó sai ba ema tomak: “Na’i mak Liurai”.

          Nia ukun povo tomak, ukun ho justiça. Refrão

 

Segunda Leitura                                                                                                                                       1 Cor. 12, 4-11

Lia housi São Paulo ba sarani sira iha Corinto:

Maun-alin sira: Maromak nia tulun iha oi-oin: maibé, Espírito ida de’it. Iha knaar oi-oin, maibé, Na’i ida mesak. Iha hahalok oi-oin, maibé, Maromak ida de’it mak halo buat hotu iha ema tomak. Ema ida-idak simu tulun Espírito nian ba hotu-hotu nia di’ak. Ida simu kbiit lia-na’in, ida seluk simu matenek housi Espírito ida de’it. Ida simu fiar, ida seluk simu tulun, halo isin di’ak nian, housi Espírito ida de’it. Ida simu tulun halo milagre nian; ida seluk simu tulun duína nian. Ida simu tulun atu hatene fihir didi’ak ema nia laran; ida seluk simu tulun atu hatene ka’olia lia oi-oin. . Ida fali simu tulun atu durbasa lia hirak ne’e: maibé ne’e hotu, Espírito ida de’it mak halo. Espírito ida ne’e mak fahe ba ida-idak, tuir Nia hakaran.

Maromak Futar Lia.

 

Aclamação                                                                                                                                                             Jo. 8, 12

Refrão : Aleluia, Aleluia!! Repete-se

                  Iha festa casamento iha rai Caná, Jesus fila wé ba tua.

                  Nia hatudu Nia kbiit, Nia Escolante fiar tebes Nia. Refrão

 

Evangelho                                                                                                                                                          Jo. 2, 1-12

Na’i Jesus Cristo nia Evangelho nu’udar São João haktuir:

Iha tempu nebá, ema halo festa casamento ida iha Caná, Galileia nian. Jesus nia Inan mos hela iha nebá. Jesus ho nia Escolante sira simu mos convite ba festa. Tan tua la iha ona, Jesus Nia Inan dehan ba Nia: “Sira nia tua hotu ona”. Jesus Simu dehan: “Na’i feto, ita atu sá lós? Ha’u nia loron ladauk to’o”. Nia Inan dehan ba ema sira hamríik mesa: “Imi sei halo tuir buat nebé Nia haruka”. Kusi neen iha hela nebá, atu Judeu sira fase ain no liman. Kusi ida-idak bele lori litru walu-nulu ka atus ida rua-nulu. Jesus lia tun ba sira: “Imi tau wé ba kusi sira ne’e to’o nakonu”. Sira tau wé nakonu didi’ak to’o ibun. Hafóin, Jesus lia tun ba sira: “Imi bele hasai ona, lori ba uma-na’in tenda”. Sira lori duni. Uma-na’in tenda koko tiha wé nakfila ba tua–tan nia la hatene tua ne’e mai husi nebé, maibé, ema sira nebé hamríik mesa mak hatene hela katak sira kuru wé, – Nia bolu noivo hodi dehan: “Ema hotu fó uluk tua di’ak nian; ema sira hemu didi’ak ona, hafóin mak fó tua ladun di’ak. Ó fali, rai subar tiha tua di’ak to’o oras ne’e”. Ne’e mak milagre Jesus hahú halo iha Caná Galileia nian. Jesus hatudu Nia kbiit. Nia Escolante sira fiar tebes Nia. Liu tiha, Jesus ho Nia Inan, maun-alin sira no Escolante sira tun ba Cafernaun. Sira hela loron ruma iha nebá.

Lia Maksoyn.

 

JESUS VALORIZA MATRIMÓNIO CATÓLICO

Iha festa casamento iha rai Caná, Jesus fila wé ba tua. Nia hatudu Nia kbiit, Nia Escolante fiar tebes Nia Bíblia Sagrada nebe ita lé, rona no contempla iha semana nee diak no kmanek nakonu ho sentido tebes. Primeira leitura fo imagem kona ba boot oinsa Maromak nia domin ba humanidade (ema) hanesan domin husi Laen kaben ba fen kaben iha família ida. Segunda Leitura, São Paulo sublinha kona katak; ita hotu Maromak haraik dom eh carisma oi-oin maibé, hotu-hotu iha Espírito ida deit. Carisma oi-oin atu servi maibé, Maromak ida deit. Carisma hirak nee hotu be interece comum (Bem Comum). Ita nia situação impasse política oras nee quase que halo máquina estado la lao talvés tanba ukun nain ida rua seidauk reflecte katak carisma eh poder política nebe tula iha ninia kbaas nee ba Bem Comum Timor Leste laos ba Partido A, B, C, D deit.
Iha Ninia Evangelho, São João Evangelista hakarak hatudu katak saida mak acontece iha festa casamento Caná nudar imagem prefiguração comunidade ideal Cristão nian basá, iha nee Jesus no Maria marca presença ou hola parte mos iha ecento nee.
Matrimónio (casamento) nudar evento eh acontecimento ida iha ema nia moris. Iha nee mak expressa (revela) relação domin nebe klean tebes entre pessoa rua (feto ida ho mane ida). Nudar primeira leitura koalia sai kona ba Maromak nia posição perante povo Israel, povo escolhido, Maromak compara hanesan expressão domin husi laen ida ba nia fen kaben. Iha nee São João Evangelista hatudu ba ita katak festa casamento Caná nebe nia relata, nudar festa nebe fo ksolok ba ema hotu nebe presente. Nee significa saida?
Tanto tradição Judeu tanto Uma Kreda Católica, fo valor aas tebes ba Matrimónio (perkawinan). Tanbe nee, iha Uma Kreda Católica eleva Matrimónio ba Sacramento iha Igreja Católica nia Sacramento sira. Matromónio nee ligado directamente ho Maromak (relaçãi Igreja ho Cristo). Basea ba pano de fundo ida nee mak, festa casamento Caná hatudu papel importante figura nain rua (Jesus & Maria) nudar exemplo moris ba comunidade Cristã.   
Primeiro: Maria presente iha festa nee. Maria nebe hahoris Jesus nudar ema nebe participa iha processo salvação. Wainhira Jesus apresenta-An iha público, desta ves iha festa casamento ida, Maria mos marca presença maske la sobresai liu. Relato Evangelho haktuir katak Maria husu Jesus atu tulun festa nain nebe hasoru dificuldade. Liu husi pediodo nee, Maria hakarak Jesus fo laran metin no ksolok ba sira hotu iha festa nee. Maske pedido nee simples la obrigatório maibé, Jesus responde duni pedido Nain Feto nian nee. Tan Maria hatene katak Jesus sei halo tuir saida mak Nia husu, então Maria haruka servente sira halo tuir saida mak Jesus haruka atu prepara. Iha nee, ita foin bele nota oinsa Maria nia sensibilidade domin nudar inan ida ba oan sira nia susar. Sensibilidade nee simples no ema barak la nota tan Maria koalia ba Jesus ho lian neneik, ema barak la hatene tuir, inclui festa nain maibé, nia resultado fo ksolok ema barak nebe presente iha neba.
    Segundo: Jesus mos marca presença iha festa casamento nee. Jesus laos deit mai hodi hatan convite maibé, iha fatin nee, Jesus mos haksolok ema wain iha festa casamento neba. Jesus lakohi hatudu-An sai conhecido hodi hatudu Ninia kbiit milagrosa sira. Jesus halo duni we nakfilak ba tua maibé, la públicamente. Maske nunee, iha sentido nebe klean hodi expressa Jesus nia sentido paternal (ke Bapa an) nudar lidér eh Messias nebe concreto. Lalaok milagre ba dala uluk nee significa mos katak Jesusrespeita no tau consideração ba ema seluk. Jesus husik ema halo tuir capacidade nebe iha tuir necessidade no too ponto ruma mak Jesus foin intervem. Jesus intervem iha momento nebe ema nia esperança hahu mihis ba dadaun. No wainhira no resolve ema nia dificuldade laos hodi buka naran boot maibé, atu halo ema hatene oinsa Maromak nia domin boot ba ema.. (IgnasBAFS)

Ornai, 13/01/2019

Leave a Reply

Your email address will not be published. Required fields are marked *