shadow
Diocese de Dili > NOTÍCIAS > Notícias > BISPO DILI : CRUZ MAK ITA NIA SALVAÇÃO, AI-HUN NOBRE NO AI-HUN GLORIOSO

BISPO DILI : CRUZ MAK ITA NIA SALVAÇÃO, AI-HUN NOBRE NO AI-HUN GLORIOSO

DCDD-liafuan evangelico iha leten mak sai foco ba reflexão iha celebração ba adoração Cruz senhor Morto nian ne’ebé preside husi Dom Virgilio do Carmo da Silva, SDB, iha Igreja antiga Santo António, Oe-cusse. Iha ninia reflexão Bispo Dili dehan “loron ida ohin sexta-feira santa maka loron ida atu ita hare no contempla kona ba ita nia liurai ne’ebe ukun iha Cruz ida ne’ebe sai lia-los ne’ebe a’as no nobre liu hotu iha humanidade, loron ida Cruz nian no loron ida sofremento ninian, loron ida esperança ninian, loron ida abandono, loron ida vitoria ninian, loron ida alegria ninian no loron ida ne’ebe loron ikus maibe mos loron uluk ida ne’e mak drama sexta-feira santa nian  Continua ita Na’i Jesus Cristo Nia moris mai ita tan domin, sei ita fiar ba ita a’an hodi husu karik husi ita nia leet sei mak hakas a’an duni atu tulun Jesus lori Cruz, laos Cruz tuir deit ita nia gosto maibe ida ne’ebe tuir Na’i maromak Ninia hakarak; Ita dala barak lori duni Cruz no tara ita nia Cruz maibe tuir ita nia gosto, tuir ita nia estilos no tuir ita nia maneira”.

“Iha tempo ne’eba Simão Sirene agricultor oan ida ne’ebe tulun Jesus lori ninia Cruz mesmo que Nia sente nudar ema kiak no ema kiik oan ida maibe Nia pronto duni atu lori Jesus Nia Cruz, laos deit uluk maibe ohin mos dala ruma hanesan. Jesus la tun husi Cruz basá Cruz hanesan Ninia domin ne’ebe encarna ona iha humanidade ne’ebe precisa domin ida ne’ebe extraordinario, domin ida ne’ebe harahun ema ne’ebe foti a’an no violencia; Jesus mos tun husi Cruz basá Nia mai atu fo sasin kona ba verdade ida ne’e mak maromak nia emar sira la haluhan maibe hakarak tau iha ita nia leten mundo nia salan, Jesus la tun husi Cruz basá Nia mak lia-los iha nia moris, iha Nia liafuan, iha Nia gesto no iha Ninia verdade ema hotu ninian, ne’e mak salvação ita ema ninian” explica Bibi Atan Diocese Dili nian ne’e.

Liutan ne’e Bispo Diocese Dili ne’e dehan “Cruz mak instrumento ida ba ema hotu no aliança rohan laek entre Maromak ho ita ema, iha Cruz la iha lia bosok, iha Cruz laiha lia lohi malu nian, lia bobar malu nian no laiha karak ten no ka’an ten laiha laran moras no odio malu la dispeza malu entre ema bo’ot ho kiik ka matenek ka beik maibe Cruz mak missericordia. Atu ita tanis duni tanba domin maromak nian ne’ebe ita fila kotuk lori maromak nian ne’ebe ita hewa’i”.

 “Ho sentimento ida ne’e mak ohin sarani Oe-cusse halibur hamutuk hanesan tinan-tinan haleu Senhor Morto hodi halo proceção lao haleu ita nia le’et no ita mai iha ne’e laos iha obrigação maibe nudar sarani mai atu adora no agradece ba graça oi-oin ne’ebe ita simu husi Senhor Morto” dehan Dom Virgilio.

Iha Jesus ka Senhor Morto ita mos hare iha ita nia rai laran dala barak laiha unidade, iha violencia ne’ebe ita halo hasoru kiik oan sira ka kosok oan sira ne’ebe hakarak atu moris iha mundo ne’e maibe dala barak tanba familia inan-aman nia hakarak nia fama ka nia naran estraga kosok oan sira ne’e liu husi dalan  aborto. Iha Cruz ita hare mos abuzu oi-oin ne’ebe ita halo inosente hasoru labarik kiik oan sira iha ita nia sociedade no ita hare mos foinsae sira ne’ebe monu iha lasu cria organizado hanesan droga, trafico humano iha timor karik rama ambon, arte marsiais. Ita continua adora nafatin hakilar hodi dehan “Ha’u Nia Maromak, Ha’u Nia Maromak tansá Hewa’i Hau” Observa Dom Virgilio.

Iha biban ida ne’e Bibi Atan Diocese dili nian ne’e dehan “ ida ne’e hanesan convite ida mos mai ita wainhira atu besik  no rei atu loke ita nia fuan no loke ita nia neon atu ita halo aat ba timor oan hotu feto-mane, katuas-ferik, ukun na’in ka povo bai-bain, ema hotu nebe responsavel hahu husi familia, comunidade ba to’o  iha rai ida ne’e. Mai ita hotu nebe ohin iha ne’e atu hatene  loke ita nia matan, hamanas ita nia fuan hamoris fila fali sentidu iha ita nia fuan loke ita nia consencia atu rona, hare, sente ema wain nebe terus tanba lakon sira nia dignidade nu’udar ema, terus tanba laiha ema atu defende tan lakon sira nia direito no sel-seluk tan”.

Ikus liu Dom Virgilio hatoo nia liafuan refletiva ba sarani hodi dehan“Ha’u nia Na’i laran luak tebes, ha’u nia Na’i pronto atu perdua, ha’u adora, ha’u hahi no ha’u hanai, Ita hafoun buat hotu hodi Ita nia paixão ba mate,  Ita nia cruz harii metin iha rai ida ne’e nu’udar sinal esperanca foun ida”. (Leo)

Leave a Reply

Your email address will not be published. Required fields are marked *