shadow
Diocese de Dili > NOTÍCIAS > Notícias > VIA SACRA LIFAU : LIU HUSI JESUS NIA MATE MAK HUSIK HELA SALVAÇÃO MAI ITA

VIA SACRA LIFAU : LIU HUSI JESUS NIA MATE MAK HUSIK HELA SALVAÇÃO MAI ITA

DCDD-Sexta feira Santa loron 19/4/2019 ne’ebé sai biban ida ba ema fiar nain sira iha mundo hodi celebra Jesus Cristo ninia terus. Iha tinan ne’e Prelado Diocese Dili nian Dom Virgilio do Carmo da Silva, SDB celebra Via Sacra hamutuk ho sarani sira iha Lifau- Oecusse, hafoin halao dalan Cruz hamutuk prelado ne’e dehan “Ohin ita mai hamutuk iha fatin nee ida-idak lori nia sentido rasik atu hateke ba Maromak hodi agredece ba Maromak ba domin bo’ot ne’ebe Na’i Maromak haraik mai ita, tan domin bo’ot ida ne’e Maromak ho Ninia Oan ka Maromak oan mai moris hamutuk ho ita no terus hamutuk hamutuk ho ita to’o hakotu i’is iha foho Calvario nia tutun tanbá ne’e liu husi Jesus Nia mate mak husik hela salvação mai ita. Tan ne’e Na’i Maromak foti Nia to’os liu hotu no criatura hotu-hotu ida ne’e mak ohin lori ita hotu atu mai iha fatin ne’e atu agradeçe ba Maromak liu-liu ba ida ne’ebe haluhan nia a’an rasik fo ninia oan doben tanba nia domin bo’ot ba ita sarani sira; tan ida ne’e ita sente orgulho bangga ba domin bo’ot ne’ebe Nai Maromak haraik mai ita no hakoak fila fali ita nudar Ninia oan doben sira, tan ne’e mak ohin ita mai iha ne’e ita la’o tuir Cruz hanesan Jesus ne’ebe lori Cruz no ita mos koko atu halo tuir Jesus ida-idak lori ninia Cruz rasik hahu husi primeiro estação mai to’o remata”.

Bibi atan Diocese Dili nian ne’e mos hatutan iha ninia mensagem katak “Wainhira ita lori ita nia Cruz la’o tuir Jesus, ita mos atu hanoin no hare ba iha Cruz  ne’ebé lori sinal salvação ninian, Cruz sinal domin ninian, Cruz sinal perdão ninian no sinal esperança”. 

“tinan-tinan iha Quaresma,  uma Creda convida ita sarani hotu atu foti matan hateke ba Cruz no convida ita atu hatene hanesan Maromak atu hamamuk a’an atu ita mos hateke ba iha Cruz laos atu admira deit kona ba Maromak iha Ninia Cruz maibe oinsa ita ida-idak aprende atu hakraik a’an atu reconhece Na’i Maromak ninia grandeza no hakraik a’an atu reconhece katak diak hotu ne’ebe haleu ita no ita hare iha to’os, iha tasi no iha foho buat furak ne’ebe iha, furak ne’e Na’i Maromak ninian. Hakraik a’an atu ba reconhece ita nia incapacidade, ita nia fraqueza no iha ne’ebe ita lafolin buat ida iha Na’i Maromak ninia oin” Dom Virgilio fo hanoin.

Liutan ne’e Bispo Diocese Dili nian ne’e observa “dala barak ho buat hotu ne’ebe mak acontece iha ita nia rain no iha mundo liu-liu iha ita ema nia moris no dala barak mos ita haluhan Na’i Maromak tan ne’e mak iha tempo quaresma liu-liu iha loron importante ida ohin la’o tuir lori Jesus nia Cruz sente loron manas, rai manas, kosar, hamrok no hamlaha maibe lori ita ida-idak atu hare fila-fali ita nia misseria ema ninian wainhira ita koko dunik ita nia fraqueza mak lori ita sente katak ita ne’e folin laek iha Na’i Maromak ninia oin. Ne’e duni hahu ohin ba oin ita agradeçe ba Maromak tanba fo forca ba ita atu ita lao to’o foho Lifau ninia leten maibe to’o iha tem que tulun mos ita atu reconhece aprende atu hakruk ba iha Cruz hodi husu perdão ba Na’i Maromak no reconhece ita nia fraqueza, reconhece ita nia misseria ne’ebe ita lafolin buat ida iha Na’i Maromak Ninia futar oin, ida ne’e mak cada tinan quando ita lao tuir Jesus continua fanun ita atu bele cada tinan ita celebra festa Pascoa nian no atu hakat tan passo ida ba oin”.

Ikus liu Bispo Diocese Dili nian ne’e explica kona ba sentido Pascoa nian hodi dehan “Pascoa mak tempo ne’ebe ita atu curize a’an no hamos ita an hodi  hadia liu tan ita nia a’an nudar sarani, nudar oan, nudar foinsa’e, nudar inan-aman no nudar Timor oan. Ita precisa continua hadia ita nia an no quaresma convida ita atu brani hodi simu ita nia terus manmanas hirak ne’e mak ita mos aprende atu simu ita nia a’an iha Na’i Maromak Ninia futar oin. Ne’e duni ita sira ne’ebe mak iha Cruz hun iha foho Lifau ninia leten ita harohan atu Nai Maromak bele haraik mai ita iha Espírito ida ne’e, Espírito haraik a’an ninian, Espírito atu hatene ita nia limitação, ita nia fraqueza, ita nia folin laek no espírito hatene atu loke ita nia a’an ba Na’i Maromak no husi Nai Maromak atu hakerek historia foun atu foti ita nia fuan, ita moris, ita nia familia no iha ita nia sociedade ida ne’e ezige coragem iha ita nia parte, ezige aten brani wainhira ita aprende atu loke ita nia a’an ba Na’i Maromak tan ne’e mak ohin ita mai hamutuk iha ne’e no orasida lorokraik ita sei continua tan adoração Cruz mai ita iha loron ida ne’e ita lao hamutuk ho Jesus ne’e duni mos ita bele moris hias hamutuk ho Nia bele fo moris, fo esperança ba ita dala ida tan mesmo que ho situação familia no sociedade no buat barak ne’ebe ita hare nakukun maibe hamutuk ho Jesus iha Cruz sempre sai nafatin consolação esperança no salvação ba ita sarani”.

Participa iha dalan Cruz ne’e mak Liurai Oecusse, membro segurança F-FDTL no PNTL, religiosos/as, inclui sarani tomak iha suco 18 iha municipio Oecusse. Padre Juvito do Rego mak preside dalan Cruz ne’e. (Leo)

Leave a Reply

Your email address will not be published. Required fields are marked *