shadow
Diocese de Dili > NOTÍCIAS > LETURA DIÁRIA > DOMINGO DA PÁSCOA DA RESSUREIÇÃO DO SENHOR (ANO C)

DOMINGO DA PÁSCOA DA RESSUREIÇÃO DO SENHOR (ANO C)

Primeira Leitura                 Act. 10, 34-43

Lia housi Livro haktuir Apóstolo sira nia hahalok:

Iha loron hirak nebá,  Pedro hamríik, ko’alia nune’e: “Liu tiha João Baptista nia Baptismo imi hatene ona sá lós mak mosu iha rai  Judeia tomak, hahú housi Galileia: Maromak halo Espírito Santo tun ba Jesus Nazaré hodi haraik kbiit wa’in ba Nia. Jesus Nazaré la’o lemo rai hodi halo di’ak no fó matenek oi-oin ba ema hotu-hotu nebé moris hela iha diabo nia liman tan Nia ho Maromak la’o hamutuk. Ami hirak ne’e, Jesus Nazaré nia sasin: Ami fó lia sasin kona ba Jesus Nazaré Nia hahalok iha rai Judeia, iha Jerusalém. Ami fó lia sasin katak ema sira hedi mate Nia iha Krus. Maibé, Maromak haraik ba Nia moris hias, liu de’it loron tolu. Maromak haraik mos, Nia atu mosu, laós ba ema tomak, maibé ba sasin sira nebé Maromak fihir kedas houri uluk, katak mosu de’it mai ami, ami nebé han-hemu hamutuk ho Nia, wainhira Nia moris hias tiha fali. Jesus haruka ami hanourin lia-foun ba povo; Nia haruka mos ami, atu fó hatene katak Maromak foti duni Nia, nu’udar ema mate no ema moris sira nia Juíz. Lia hotu nebé Profeta sira fó hatene sai kona ba Jesus mak ida ne’e: Tan Jesus nia naran, ema hotu-hotu nebé fiar Nia, hetan duni perdua ba sira nia salan.”    

Maromak Futar Lia.

 

Salmo Responsorial                                                                                                                           Sal. 117 (118), 1-2. 16ab-17. 22-23

 Refrão : Loron ida ne’e Maromak fó tulun, mai hawelok haksolok!!! Repete-se

Hana’i Maromak tan Nia di’ak!

tan Nia laran luak ba nafatin.

Israel nia uma laran bele dehan,

Nia laran luak ba nafatin. Refrão

 

Na’i nia liman halo buat kmanek,

Na’i nia liman kmanek tebes.

Sei la mate maibé sei moris,

atu haklaken Na’i nia hahalok. Refrão

 

Fatuk ida be badaén sira hewai,

nakfilak ba fatuk inan.

Buat ne’e hotu mai housi Maromak,

kmanek oi-oin mosu iha ita oin! Refrão

 

Segunda Leitura (1)                                                                                                                                                                        Col. 3, 1-4

Lia housi S. Paulo nia surat ba sarani sira iha Colosso :

Maun-alin sira: Imi moris hias ona ho Cristo! Tan ne’e, imi sei tau de’it matan ba sasán leten nian. Iha lalehan, Cristo moris, tur iha Maromak sorin kuanan. Imi nia laran sei monu de’it ba lalehan nia di’ak; keta hadomi sasán rai-klaran ida ne’e nian. Imi nia moris subar hela iha Maromak, hamutuk ho Cristo, tan imi mate tiha ona ho Cristo. Wainhira Cristo hiit-An mai hikas, imi nia moris sei sai kmanek lolós, nu’udar Cristo Ninian, tan Cristo, imi nia moris hun.

Maromak Futar Lia.

 

Segunda Leitura (2)                                                                                                                                                                  1Cor. 5, 6b-8

Lia housi São Paulo nia surat ba sarani sira iha Corinto:

Maun-alin sira: Imi la hatene katak fermento witoan de’it mak halo massa tomak sa’e? Ne’e duni, halakon ferment tuan iha imi laran, atu imi sai duni ferment foun, tan oras ne’e imi hanesan pão síin. Cristo ita nia Bibi-Oan Páscoa nian, ema saran tiha ona ba mate. Tan ne’e, ita sei halo festa la ho fermento tuan. Ita sei halo festa la ho fermento laran aat, ita sei halo festa la ho laran dodók, maibé ho laran mós no neon mós.

Maromak Futar Lia.

 

Aclamação                                                                                                                                                                                  1Cor. 5, 7b-8ª 

Refrão : Aleluia!!! Repete-se

Cristo, ita nia Páscoa, hasa’e ona;

Haksolok hahí ita Na’i nia fatin! Refrão

 

Evangelho    (de manha)                                                                                                                                                              Jo. 20, 1-9

Na’i Jesus Cristo nia Evangelho nu’udar São João haktuir:

Iha loron uluk semana nian, dadersan de’it, rai sei nakukun hela, Maria Madalena ba to’o rate. Nia haré fatuk boot iha rate nia oin duka hela ba sorin. Tan ne’e, nia halai fila hikas ba hasouru Simão Pedro ho Apóstolo ida seluk nebé Jesus hadomi. Nia dehan ba sira na’in rua: “Ema lori tiha ona Na’i housi rate! La hatene sira tau lós Nia iha nebé!” Pedro ho Apóstolo ida seluk, hamríik ba kedas rate. Sira na’in rua halai hamutuk, maibé Apóstolo ida seluk lais liu Pedro, hodi to’o uluk rate. Nia hakruuk hateke ba laran, hodi haré hena sira namkari iha rai, maibé nia la tama. Simão Pedro mos to’o daudaun. Nia tama ba rate laran hodi haré hena sira namkari iha rai; Nia haré hena mutin nebé hodi falun Jesus nia ulun, la sóe iha rai ho hena seluk, maibé lulun iha fatin seluk. Hafoin, tama mos Apóstolo ida seluk nebé to’o uluk. Nia haré ho matan hodi fiar duni! Tebes, sira neon ladauk nakloke ba lia Escritura nian. Tuir Escritura, Jesus sei moris hias duni housi mate.

Lia Maksoyn.

 

Evangelho    (de tarde)                                                                                                                                                             Lc. 24. 13-35

Na’i Jesus Cristo nia Evangelho nu’udar São Lucas haktuir:

Iha tempo nebá, Jesus nia Escolante na’in rua la’o daudaun ba knuan ida, naran Emaús; knuan ne’e dook housi Jerusalém, kilómetro sanulu resin rua. Sira na’in rua ko’alia hela kona ba lia hirak la’o iha loron ikus nian. Sira sei ko’alia hodi haksesuk malu hela, Jesus rasik besik ba hodi la’o hamutuk ho sira. Maibé, sira matan sei taka hela; sira na’in rua la hatene ema ne’e sê lós. Nune’e, Jesus husu ba sira: “Kona ba sê lós, mak imi rua ko’alia hela tuir dala?” Sira rua hamríik ho oin nakraik tebes. Sira ida naran Cléofas, hatán ba Jesus: “Iha Jerusalém laran, ó mesak de’it mak la hatene buat hotu-hotu nebé mosu iha loron hirak ikus ne’e!” Jesus simu hodi husu ba sira: “Sá ida lós!” Sira hatán dehan: “Buat hotu kona ba Jesus Nazaré. Jesus Nazaré, ema duína ida, nia hahalok ho lia maka’as iha Maromak ho povo nia oin. Maibé, sacerdote boot ho ulun sira saran tiha Nia ba mate iha Krus. Ami hanoin katak Nia mak sei sai Israel nia Maksoyn. Maibé, liu tiha ona loron tolu mak buat hirak ne’e hotu mosu. Tebes, feto balu housi ami leet, halo ami hakfodak. Dadersan de’it, sira to’o ba rate. Tan de’it sira la hetan Jesus nia isin mate, sira mai hateten katak Anjo ruma lia tun ba sira katak Jesus moris hela. Ami nia maluk balun ba rate, hetan buat hotu, tuir feto sira hateten. Maibé, sira la hare Jesus ida”. Jesus lia tun ba sira dehan: “Ema sei beik, ema ulun to’os! Ema la fiar duína sira lian! Messias sei la simu terus hirak ne’e hotu, atu bele tama ba Nia Reino?” Nune’e, hahú housi Moisés to Profeta sira hotu, Jesus hanourin daudaun sira ba lia Escritura hotu nebé ko’alia kona ba Nia. Besik atu ba tama knuan sira hela ba, Jesus hakfudik liu ba oin. Maibé, sira husu lisuk ba Jesus, dehan: “Hela ona ho ami, tan loron monu daudaun ona!” Nune’e, Jesus hela duni ho sira. Molok atu han, Jesus kaer pão, haraik bensa, silu, hodi fahe ba sira. Iha ne’e, sira matan nakloke atu hatene Nia. Maibé, Jesus lakon tiha housi sira leet. Nune’e, sira hateten ba malu: “Nia lian la monu lós ba ita laran, wainhira Nia ko’alia hodi leno Escritura mai ita, tuir dalan?” Sira hamríik, fila kedas ba Jerusalém. Sira heta Apóstolo sanulu resin ida no maluk seluk tan, hamutuk iha nebá. Sira ne’e hateten ba sira rua: “Tebes, ita Na’in moris hias duni! Nia mosu tiha ona ba Simão Pedro!” sira haktuir ba sira hotu buat tomak nebé mosu iha dalan Emaús. Sira rua haktuir mós oin sá sira hatene Jesus, wainhira Jesus fahe pão.

Lia Maksoyn.

Leave a Reply

Your email address will not be published. Required fields are marked *