shadow
Diocese de Dili > NOTÍCIAS > HOMILIA DO BISPO > DOMINGO II DA PÁSCOA OU DA DIVINA MISERICÓRDIA

DOMINGO II DA PÁSCOA OU DA DIVINA MISERICÓRDIA

Evangelho loron ohin ninian, repete bebeik liafuan ida nebe dehan; “Hare”. Liafuan ida nee se ita boot sira tuir ituan ita hare katak, liafuan nee mosu dala barak. Escolante sira haksolok wainhira Hare Jesus mosu iha sira nia le’et. Hafoin sira dehan ba Tomé; ‘Ami hare ona Jesus’. Evangelho la hatudu oinsa mak sira hare, la descreve mos Jesus nebe moris hias husi mate, maibe simplesmente dehan; ‘Nia hatudu Nia liman no sorin kanek ba sira’. parece Escolante sira ho dalan ida nee mak sira reconhece liu husi Nia kanek sira. Tomé mos hakarak atu hare besi kusan fatin no Nia sorin nebe kanek. Wainhira hare tiha Nia, Tomé mos fiar. Dalabarak ema hanoin kona ba Tomé nee mak ema nebe lafiar maske nia incredibilidade ita precisa agradece Tomé. Tanba sa! basta atu rona deit saida mak ema seluk dehan kona ba Jesus katak Jesus moris, lato’o ba nia, maibe nia hakarak hare Jesus. Maibe hakarak atu hare lato’o deit hare ho matan. Nia hakarak atu tama klean liu tan ba Jesus nia kanek sira, nia hakarak kona rasik Jesus nia kanek ho nia liman. E Jesus nia kanek mak saida! Jesus nia kanek mak prova ida kona ba sinal Maromak nia domin mai ita. Tomé lato’o atu hare deit, maibe nia hakarak kaer rasik ho liman-tama liu ba laran atu koko hare, kona no kaer kanek sira Jesus ninian. Ida nee mak sinal domin boot liu.

Iha Evangelho ita rona mos ema hanaran Tomé ho liafuan Dídimo katak kaduak. Tomé nia kaduak mak sé? Ita sira nee mak Tomé nia kaduak. Kaduak katak idéntico-hanesan. Kaduak ida nee atu dehan katak, maske ita moris dook malu, maibe ita lori iha ita nia ran, iha ita nia isin no ita nia fuan nee sentimento ida Tomé ninian. Kaduak ida nee atu hatudu katak, ita hanesan mos ho nia. Hanesan iha sentido ita mos hakarak koko Maromak ida moris hias lato’o atu hatene deit, miabe ita mos hakarak atu kaer, ita mos hakarak atu kona, ita mos hakarak atu tama klean liu tan ba iha mistério boot ida nee. Maromak ida moris hias, maibe laos ida nebe dook, maibe ita hakarak ida nebe besik mai ita. Ita mos la atrai Maromak ida nebe dook husi ita nia moris ka ida nebe ita hanoin deit Maromak santo e justo, maibe ita nunca hare. Ita precisa hare Maromak ida nebe kaer ho ita nia liman, hare ho ita nia matan. Dala barak ita hare Nia iha se! Ita hare Nia iha ita nia maluk sira nebe halo diak.

Então Nia ida nebe moris hias no Nia moris hias duni mai ita. Tomé hakarak liga ida nee, hare Jesus nia moris hias nee laos dehan katak Nia moris hias ona, maibe oinsa mak atu Jesus nia moris hias nee toca, kona, influencia, afecta hau nia moris nuudar jovem ida, nuudar inan-aman ida, nuudar político ida, nuudar líder ida ka nuudar inan-aman sira nebe terus, moras, mesak, katuas ferik, oinsa mak sira bele koko Maromak ida nebe besik ba nia, oinsa mak ita bele hare Nia, Escolante sira liu husi Nia kanek sira hare ba kanek hirak nee sira compreende kedas katak, Nia domin laos domin bai-bain. Hare ba Jesus nia kanek hirak nee Nia domin laos buat nebe halimar ninian, Nia perdua maske sira fila kotuk, maske sira abandona, maibe Nia ba buka sira. tanba iha Nia kanek tama liu tan ba ita mos dalabarak hakarak atu hare experiência Jesus nia kanek. Ida nee atu dehan experiência Jesus nia kanek significa contempla domin ida nebe laiha sukat. Dalaruma ita dehan oinsa mak ita bele sukat ita nia domin ba malu; oan ida oinsa bele sukat inan-aman nia domin, oinsa bele sukat hau nia domin; ema dehan’ sasukat domin nian nee dehan katak hadomi ba laos sukat. Ohin ó hadomi diak aban ó hadomi fila fali. Domin ida nee nunca para. Tan nee dalaruma ita lakon paciência katak ohin ó halo diak tiha aban descança tiha bainrua mak halo fali. Maibe domin nee dehan katak se ó hakarak halo diak buka tem que continua, labele dehan ohin ó halo ona para lai ba aban mak continua. Tan nee, sasukat domin ninian nee hadomi laos sukat. Domin nee buat ida nebe bele dehan fo ninia an laos sukat. Ida nee mak Maromak nia dalan. Maromak nia dalan dalaruma ita la compreende, Maromak nia dalan dalaruma ita tau iha perguntas atu ita husu tanba sa, oinsa! Dala barak liu husi dalan oi-oin ita labele compreende, ita labele hatan pergunta hirak nee.

Imi hare atu hatudu katak Maromak nia fuan nee tuku, Maromak nia fuan nee baku hanesan quando ita tau ita nia liman iha ita nia fuan ita sente ita nia fuan tuku makas. Wainhira koalia kona ba Jesus nia domin tuku mai ita, Nia domin nee book ba hau ba ita ida-idak. Nee duni ohin mai iha nee atu hahi no adora Jesus Misericórdia. Nee duni hau hakarak fo parabens ba Aileu tanba marca tan história foun ida hodi haburas devoção Jesus Misericórdia. Tanba nee parabens ba sarani Aileu tanba imi mos acolhe, imi hare katak devoção Misericórdia ida nee bele toca mos ita nia fuan no hakarak atu sente liu tan ida nee ho ita ida-idak ninia moris.

Nee duni maun-alin inan feton sira, ita concidera ita nia an ita hanaran sarani, nunee mos koalia buat furak hotu ita nia fiar ninian, maibe hanesan Escolante sira ita precisa hare Jesus kona ho Ninia domin nunee deit mak ita bele tama liu ba iha fiar fuan ninian, tama liu ba iha Jesus nia fuan latoo deit ba buat nebe ita hatene hanesan Escolante sira descobre paz, hakmatek, ksolok, forte, maske sira iha dúvida, maibe wainhira Jesus mosu hodi dehan ‘Hakmatek hela ho imi’ sira sente kedas. Maske sira sidauk hatene lolos katak ida nee Jesus mak koalia nee ka sidauk, maibe sira sente katak liafuan ida nee comove sira, liafuan sira nee book sira hodi sente katak ida nee laos mate klamar ida, maibe nee menságem ida. ida nee mos mak iha Páscoa ida nee Tomé wainhira hare Jesus nia kanek sira nia dehan; ‘hau nia Nai no hau nia Maromak’. Oinsa mak ita bele halo Maromak nee sai hau nian, ita nian! Ita nia Amo Papa dehan; “wainhira ita refere ba Maromak buat nebe hau nian laos profanação, maibe ita hahi Ninia misericórdia. Nia hakarak hali Nia sai ita nian, hanesan iha história domin ninian ita sai ema tanba hau, ita mate tanba hau, ita moris fali tanba hau. Maibe agora Ita laos Maromak deit, maibe Ita hau nia Maromak.

Ita hotu dala barak ita nia oração sira, iha ita nia susar sira, dala barak mosu iha ita nia liafuan sira mak ida nee; hau nia Maromak-hau nia Nai. Ita hetan ona domin ida nebe buka kleur ona nunee mos domin ida nebe ita nunca imagina. Nee duni maluk doben sira, Maromak la ofende ita atu ita dehan; Nia nee hau nian basá sira dehan katak; ‘domin exige familiaridade-misericórdia requere confiansa’ katak wainhira ita koalia kona ba familiaridade, ita labele koalia kona ba hadomi ema ida nebe ita la conhece. Familiaridade katak liafuan domin ida nebe hau hadomi no hatudu hau nia atenção no hatudu hau nia preucupação ba ema ida wainhira ema nee sente katak ema nee besik ba hau. Nee duni wainhira ita dehan katak ita nia domin ba Maromak, ita sente katak Maromak hola parte iha hau nia vida, hola parte iha hau nia família, hola parte iha hau nia história, hau la hare Nia nebe hanesan dook, tan nee sira dehan; domin exige familiaridade-Misericórdia requere confiança. Nee duni ita hatudu ita nia misericórdia ba ema wainhira ita laran luak uluk nanain tanba ita confia ema ida. ita atu halo diak uluk nanain ita mos precisa iha mos amizade ida ressíproca entre hau ho nia, hau tau hau nia moris iha ninia liman atu buat nebe nia atu halo hau fiar katak nia bele. Tan nee mak ita buka Nai Maromak tanba ita confia iha Nia.

Domin exige familiaridade-Misericórdia requere confiança. Então husi kedas liafuan dahuluk mandamento ninian Nai Maromak hakerek ona dehan; ‘Hau mak “o nia Nain ó nia Maromak ida nebe laran luak’, ida nee mak ita hetan Maromak ninia proposta. Sira nebe hadomi ho laran luak hanesan ó nia Maromak, hanesan mos buat ida sai husi Tomé nia fuan mai ita nebe dehan; ‘hau nia Maromak no hau nia Nai’. Wainhira Tomé kaer rasik Jesus nia kanek sira, nia tama rasik ninia experiência ho Jesus nia kanek nia dehan; ‘hau nia Maromak no hau nia Nai’.

Liu husi Jesus nia kanek sira maluk doben sira ita comprieende katak Misericórdia laos qualidade baibain ida Jesus ninian, maibe ida nebe mai husi Nia fuan. Ita ema nia fuan mak centro. Nee duni Misericórdia nee mai husi Jesus nia fuan rasik hanesan Tomé ita laos ona Escolante ida nebe ita dehan katak Escolante ida nebe bilan ituan ka lahatene atu ba los nebe ka Escolante ida nebe nafatin nakonu ho incerteza, dúvidas iha nia fuan, maibe ita tem que sai duni Escolante sira nebe hadomi tebes ita nia Nai Jesus. Ita nia Santo Padre uja liafuan ida nee; ‘keta tauk atu dehan Maromak nee hau nia doben’ tan deit hadomi ida nebe fo an. Oinsa mak domin ida nee ema hotu bele koko no oin sa mak ohin ita bele sente duni Maromak nia laran sadia ida nee.

Evangelho ohin haktuir mai ita katak, iha kedas loron Páscoa ninian liu tiha Jesus nia moris hias Jesus lia tun ba nia Escolante sira; ‘Hau fo Espírito atu perdua sala sira’ atu experimenta domin precisa liu husi! Atu koko Maromak nia domin uluk nanain ita mak tem que koko husik ita nia an atu Maromak bele perdua ita. Ita bele husu ba ita ida-idak nia an; hau fo duni hau nia an atu Nai Maromak bele perdua hau! Dala barak ita dehan Sim! Hau ba comfessa hau halo hau nia obrigação tanba hakarak buka Maromak nia perdão. Maibe mos dalabarak laos fácil. Iha Maromak nia futar oin ita mos hanesan Escolante sira, sira nia fuan taka metin hela. Sira halo nee tanba tauk. Maibe mos ita dalabarak tanba tauk no moe atu koalia sai ita nia sala sira.

Iha Santo ida naran São João Crisóstomo nia dehan nunee; ‘lolos nee wainhira ita halo sala mak ita moe’. Ita iha realidade ita contrário; atu halo sala ita la moe, atu husu desculpa ita moe. Maibe santo nee dehan ‘lolos nee wainhira ita halo sala mak ita moe. Tanba sala ita hatun ita nia dignidade nudar ema ka nudar Maromak oan. Maibe wainhira ita husu desculpa hatudu fila fali katak, hau hakarak atu ganha fila fali, hetan fila fali hau nia dignidade nebe hau lakon ho hau nia sala. Maibe, quando ita moe nia dehan; moe nee tanba diabo nia hahalok nebe la permite ita lakohi atu simu ita nia miséria. Então ida nee halo ita sente nafatin as hodi lakohi simu ita nia limitação. Nee duni hakasan an atu aprende haraik an no iha nafatin corágem ida nee no brani atu husu, la moe atu hakribit ita nia sala no brani liu tan atu buka Maromak hodi husu perdão. Ita nuudar sarani, ita precisa teb-tebes iha tempo hirak nee nia laran hanesan Apóstolo sira ita mos hein Nai Maromak nia graça atu ita bele comprieende mistério boot perdão ida nee nian ita mos sei la moe. Hodi hare ba ida nee laos hanesan odamatan nebe taka metin, maibe hanesan prémio, passo atu hasoru malu ho Nai Maromak. Wainhira ita sente moe ita lolos tem que agradece tanba ita lakohi simu buat nebe at no ida nee hadook ita husi Nai Maromak. Amo Papa dehan; ‘Moe nee convite ida segredo klamar nian nebe precisa transmite atu manan buat nebe at. Ita lolos la precisa tauk ita la precisa moe. Nunee deit mak ita bele husik moe mak ita bele hetan perdão. Maibe liu husi ita nia moe mak ita bele simu perdão. Ida nee mak ita nia amo Papa completa reflexão ida São João Crisóstomo nian. Keta tauk tanba moe.

Maske nunee odamatan ida nebe tak nafatin ba Nai Maromak nia perdão mak saida! ita nia hakmatek, la bookan, kalma, dalabarak husik odamatan taka nafatin. Se ita fila fali ba Escolante sira ita hare katak sira mos koko iha Páscoa. Depois Jesus moris hias sira fila fali ba moris uluk ninian hanesan Pedro fila fali ba tasi. Maibe wainhira nia opta atu fila fali ba neba mak Jesus mosu dala ida tan hodi fo hanoin ba nia laos atu sai pescador ikan ninian maibe atu sai pescador ema ninian. Nee ita mos liu tiha Páscoa ita mos dalabarak fila fali ba tempo uluk ninian. Ita mos hein katak ita mos la monu iha tentação ida nee.

Fila mai ita nudar sarani tinan barak ita mos hare ba ita nia an katak tinan hirak ona mak hau sai sarani, tinan hirak ona hau celebra Páscoa, maibe hau ladun hare mudansa iha hau nia moris. Nee ita rasik lakohi aproveita didiak Maromak nia Misericórdia. Maske nunee Nai Jesus ohin hakarak hateten mai hau; ó la fair katak Maromak nia Misericórdia boot liu ó nia miséria. Tan nee mak liafuan Misericórdia ema dehan husi liafuan rua; cordis(fuan)+miséria(ita ema nia fraqueza=incapacidade). Iha Maromak ninia fuan Ita ninia miséria hirak nee la folin buat ida. Maromak nia fuan nebe boot bele absolve ita nia fuan hirak nee hotu basá Maromak nia fuan boot, ita nia miséria kiik liu. Nee duni, ita lalika tauk tanba hau nia sala nee hadook hau husi Maromak. Maromak mai hili ita no convida ita atu ita mos sente katak Maromak buka hau.

Imagem boot nebe horseik no ohin ita boot sira venera lori haleu capital Aileu ninian, iha Jesus nia fuan nee sulin mai ita hare raís rua; mean no mutin. Sinal rua nee símbolo sacramento boot rua nebe ita hotu simu. Mutin koalia kona ba sacramento batismo no ran mak símbolo Eucaristia. Sacramento boot rua nee mak fo nafatin esperansa ba ita, bolu nafatin ita atu loke nafatin ita nia an ba Nai Maromak. Cada perdão ita simu aspiração foun, ita hetan corágem. Força Nai Maromak nian mak simu Nai Maromak nia perdão. Nee duni ohin momento diak ida convida ita atu loke ita nia odamatan. Dalabarak buat nebe halo ita hakmatek nafatin tanba ita nia odamatan taka hela ba Nai Maromak. Ita nia fuan taka hela tanba ita nia sala. Maibe iha loron Páscoa nee convida ita nafatin atu fo opurtunidade ida nee atu reza Nai Maromak bele nakfilak ita nia fuan nebe toos sai mamar. Nee duni mai ita agradece ba Nai Maromak ita celebra Nai Maromak nia Misericórdia ida nee atu ita mos bele koko dala ida tan buat hotu nebe ita halo ita nia odamatan tem que nakloke ba Nai Maromak. Husik Maromak tama, husik Maromak kona, husik Maromak nia kanek nee penetra iha ita nia fuan no laran ho nunee ita bele sai instrumento dame, paz e alegria iha ita nia família, iha ita nia comunidade no iha ita nia sociadade.

Leave a Reply

Your email address will not be published. Required fields are marked *