shadow
Diocese de Dili > NOTÍCIAS > LETURA DIÁRIA > Domingo, II Semana Tempo Pascoa (Ano C)

Domingo, II Semana Tempo Pascoa (Ano C)

Primeira Leitura                        Act. 5, 12-16

Lia housi Livro Hatuir Apóstolo sira nia hahalok:

Iha loron hirak nebá, housi Apóstolo sira liman, Na’i Maromak halo milagre no buat foun oi-oin iha povo sira oin. Apóstolo sira hotu halibur hamutuk iha odamatan boot Salomão nian. Sira seluk la brani ba hamutuk ho sira; maibé, povo hahi nafatin sira. Ema Mane ho feto, loron-loron barak liu tan mak la’o tuir sira, hodi fiar iha Jesus. Tan sira fiar, sira lori ema moras ba to’o luron, tau hela sira iha biti no iha hadak leten, atu Pedro liu kraik, nia klalatak hamahan netik sira balu. Housi cidade sira Jerusalém, ema barak mos mai, lori ema moras sira, ho tan ema sira nebé diabo tama iha sira laran; sira hotu-hotu hetan fali isin di’ak.

Maromak futar lia.

 

Salmo Responsorial                                                                                                  Sal. 117 (118), 2-4. 22-24. 25-27ª

Refrão : Imi hahi Na’i, basá nia laran luak; Nia domin rohan laek!!! Repete-se

Israel uman bele dehan ba:

Na’i laran luak nafatin ho imi!

Aarão uman bele dehan:

Na’i laran luak nafatin ho imi!

Ema be hamta’uk bele dehan:

Na’i laran luak nafatin ho imi! Refrão

 

Fatuk ida be ema hewai,

Nakfilak tiha ba fatuk inan boot.

Buat hotu mai housi Na’i liman,

Mosu mai iha oin nu’udar buat foun.

Ne’e Maromak nia loron

Ami hamutuk, haksolok hananu. Refrão

 

Na’i haraik maksoyn mai ami;

Nia haraik rahun di’ak.

Di’ak tebes ida be mai hodi Na’i nia naran;

Housi aas lalehan, Maromak haraik bensa mai ami.

Na’i, ami nia Maromak,

Haraik romak nabilan mai ami. Refrão

 

Segunda Leitura                                                                                                                        Apc. 1, 9-11ª. 12-13. 17-19

Lia housi Livro Apocalipse:

Ha’u João, imi nia maun no imi nia maluk iha susar laran; imi nia maluk iha Maromak nia Reino, maluk ho sira nebé brani tuir Jesus; ha’u mai hela iha rai ki’ik Patmos, tan Maromak futar lia no tan Jesus nia lia sasin. Iha Na’i nia loron, Na’i hola ha’u neon tomak housi ha’u kotuk ha’u rona lian ida maka’as teb-tebes, hanesan korneta ida. Lia ne’e hatete:” Buat hirak nebé ó haré daudaun, hakerek hotu iha surat ida hodi haruka ba kreda ulun hitu.” Ha’u fila oin, atu haré sê mak koalia mai ha’u. Ha’u haré kastisal hitu mesak murak mean de’it; iha kastisal sira leet ha’u haré ema ida hanesan los Mane maksoyn ida. Mane ne’e hatais unuk ida naruk to’o rai; iha nia knotak, kesi futu-kabun ida mesa murak mean; molok haré nia, ha’u monu kedas iha nia ain hodi mate sla tiha. Maibé nia tau liman kuanan iha ha’u kbaas, hatete mai ha’u:”Keta ta’uk, ha’u mak hun, Ha’u mak rohan, Ha’u mak ema nebé moris. Ha’u mate tiha ona, maibé oras ne’e, Ha’u kaer odamatan matebian no inferno nian. Nune’e, hakerek buat nebé ó haré ona, buat ohin nian, no buat nebé aban bain-rua sei mosu tuir mai.”

Maromak Futar lia. 

 

Aclamação                                                                            

Refrão : Aleluia. Aleluia!! Repete-se

Jesus lia tun ba Tomé:

“ O fiar tan ó haré Ha’u;

Rahun di’ak ba sira nebé fiar maski la haré.” Refrão

 

Evangelho                                                                                                                                                            Jo. 20, 19-31

Na’i Jesus Cristo nia Evangelho nu’udar São João haktuir:

Iha loron nebá, iha loron-kraik loron uluk semana nian, odamatan uma nebé Apóstolo sira hela, taka metin lós, tan sira ta’uk Judeu sira. Jesus mosu mai hamriik iha sira leet, hodi dehan:”Hakmatek hela ho imi!” Dehan tiha ne’e, Jesus, Apóstolo sira haksolok teb-tebes. Jesus llia tun teni ba sira:”Hakmatek hela ho imi!” dehan tiha ne’e, Jesus hatudu ba sira, nia liman no sorin kanek. Haré tiha Jesus, Apóstolo sira haksolok teb-tebes. Jesus lia tun tenik ba sira:”hakmatek hela ho imi! Nu’udar Aman Maromak haruka ha’u mai, nune’e mos ha’u haruka imi ba.” Hotu tiha ne’e, Jesus huu iis ba sira dehan:”Imi simu Espíritu Santo ba! Sira nebé imi perdua sira salan, sira hetan duni perdua ba sira salan; sira nebé imi la perdua sira salan, sira la hetan duni perdua ba sira salan!” Tomé, sira sanulu resin rua ne’e ida, nebé ema hanaran Dídimo, nia la iha nebá wainhira Jesus mosu. Apóstolo sira seluk hatete ba nia:”Ami haré ona Na’i!” Maibé, Tomé hatán ba sira:”Ha’u la haré karik besi-kusan fatin iha Nia liman, ha’u la hatama karik ha’u liman iha nia sorin kanek, ha’u sei la fiar!” liu tiha loron walu Apóstolo sira halibur hamutuk fali iha uma laran. Tomé mos iha nebá. Odamatan sei taka metin hela, Jesus mosu mai; Jesus lia tun ba Tomé:”Hakbesik ó liman fuan mai hatama ba ha’u sorin kanek! Ó keta laran to’os, maibé laran mamar atu fiar!”Tomé hasa’e lia ba Jesus dehan:”Ha’u Na’i ha’u niaMaromak!” Jesus lia tun teni ba nia:”ó fiar tan ó haré ha’u. Rahun di’ak ba sira nebé fiar maski la haré.” Iha Apóstolo sira leet Jesus halo tan milahre iha livro ne’e, atu imi bele hatene katak Jesus mak Maromak Oan Mane; atu nune’e, hodi imi nia fiar, imi bele hetan moris rahun di’ak tan Jesus naran.

Lia Maksoyn.

Leave a Reply

Your email address will not be published. Required fields are marked *