shadow
Diocese de Dili > NOTÍCIAS > LETURA DIÁRIA > Segunda-Feira, II Semana iha tempo Páscoa (ANO C)

Segunda-Feira, II Semana iha tempo Páscoa (ANO C)

Primeira Leitura                    Act. 4. 23-31

Lia housi Livro Apóstolo sira nia hahalok:

Iha loron hirak neba, Pedro ho João nebe ulun sira judeu nian fó tiha liberdade, sira fila ba hamutuk sira nia malukhodi hato’o ba sira buat hotu nebe sacerdote ulun sira no katuas sira dehan ba sira. Wainhira maluki sira rona tiha, ho neon no fuan ida de’it, sira hasa’e lia ba Maromakhodi dehan: “Na’i, Ita mak halo lalehan, rai, tasi no buat hotu nebe moris;Ita mak hato’o Ita lian housi Espírito Santo no housi Ita atan, ami aman David nia ibun: ‘tansá nação sira hatudu sira loko-an no povo sira halo buat ulun sira halibur-an hamutuk hodi hasouro Na’i no nia emar santo. Tebes duni Herodes no Pôncio Pilatos halibur-an iha cidade ne’e, ho nação sira gentio nian no povo sira Israel nian hodi hasouro ita atan Santo, Jesus, ba Ida nebe Ita tau tiha mina ba ulun. Halo tuir lolós tiha buat hotu nebe Ita biit no Ita hanoin hakotu nanis ona atu hala’o. oras ne’e, Na’i, tau matan ba sira nia lia todan; haraik tulun ba Ita antan sira atu bele haklaken ho brani tomak Ita futar lia; halolo Ita futar liman atu bele halo isin di’ak; halo milagre no kmanek oi-oin hodi Ita Santo, Jesus, Nia naran’. Uainhira sira harohan hotu tiha, fatin nebe sira hodi halibur malu ne’e nakdoko tiha. Sira hotu hakonu tiha ho Espírito Santo ho aten brani hahu haklaken Maromak nia futar lia.

Maromak Futar Lia.

 

Salmo Responsorial                                                                                                       Sal. 2. 1-3, 4-6, 7-9 (R. cf. 12d)

Refrão : Rahun di’ak ba sira nebe tau neon iha Na’i!!! Repete-se

Tansá nação sira hamriik?

 Tansá povo sira be folin laek buka dalan?

Liurai sira rai nian habelun malu,

liurai oan sira buka atu oho Na’i no Nia emar santo;

“Ami sei haraun Nia kadeia sira, ami sei liki Nia ukun!” Refrão

 

Maibe ida be hôrik iha lalehan ne’e

hamnasa hela; Na’i halo sira folin la’ek.

Loron ida sei halo ba sira ho laran hirus,

sei hakoi sira ho Nia laran manas wa’in.

Na’i sei dehan “Ha’u mak harí tiha Ha’u liurai

iha Ha’u foho santo Sião nia leten”. Refrão

 

Ha’u haklaken Na’i nia lia hakotu.

Nia dehan mai ha’u “Ó mak Ha’u Oan,

ohin Ha’u halo moris Ó!

Ó husu mai Ha’u, Ha’u sei fó ba Ó

nação sira hanesan riku-soi,

hodi ukun to’o rai nia rohan.

Ó sei ukun sira ho ai-tonka besi nian;

Ó sei hafera sira hanesan vaso tahu nian ida”. Refrão

 

Aclamação                                                                                                                                                                     Col. 3. 1

Refrão : Aleluia, Aleluia!! Repete-se

Imi moris hi’as ona ho Cristo; imi sei tau matan deit ba sasan iha

Lalehan iha nebe Cristo tur iha Aman Maromak nia sorin kuana. Refrão

 

Evangelho                                                                                                                                                                   Jo. 3; 1-8

Na’i Jesus Cristo nia Evangelho tuir São João:

Iha tempo neba, judeu sira nia boot ida. Nia ba hasouro Jesus iha kalan hodi dehan: “Rabi, ami hatene katak ó mai housi Maromak nu’udar mestre, basa ema ida labele halo sinal hirak nebe Ó halo, Maromak la hela ho nia karik”. Jesus hatan ba nia: “Tebes, tebes duni, Ha’u dehan ba ó: ema nebe la moris fali, nia la bele hare Maromak nia reino”. Nicodemos husu ba Jesus: “oinsá mak ema katuas ida bele moris fali?” Bele tama hikas fali iha nia inan nia knotak hodi moris fali?”Jesus hatan ba nia: “Tebes, tebes duni Ha’u dehan ba ó: ema nebe la moris housi we no Espírito Santo, nia la bele tama iha Maromak nia reino. Buat nebe moris housi isin nian ne’e isin no buat nebe moris housi espírito nian ne’e espírito. Ó keta hakfodak tan Ha’u dehan ba ó: imi tenki moris fali. Anin huu housi fatin nebe nia hakarak, ó rona nia lian; maibe ó la hatene nia mai housi nebe no mós la hatene atu ba nebe. Nune’e mós ba ida nebe moris housi Espírito”.

Lia Maksoyn.

Leave a Reply

Your email address will not be published. Required fields are marked *