shadow
Diocese de Dili > NOTÍCIAS > LETURA DIÁRIA > Sexta-Feira, II Semana iha tempo Páscoa (ANO C)

Sexta-Feira, II Semana iha tempo Páscoa (ANO C)

Primeira Leitura                       Act. 5. 34-42

Lia husi livro Apóstolo sira nia hahalok:

Iha loron hirak nebá, membo ida iha Sinédio, ema fariseu ida naran Gamaliel, doutor lei nian, nebe povo tomak hamta’uk, hamriik hodi haruka atu hasai Apóstolo sira iha tempo ruma nia laran. Hafoin nia hateten ba ulun sira judeu nian: “Ema Israel sira, imi neon moris ba ho buat sira nebe imi hakarak atu halo kona ba ema hirak ne’e. Iha tempo uluk nian, mosu ema ida naran Teudas, nebe hahi-an hodi hateten katak nia mós ema ida be naran boot; ema besik atus háat mak tuir nia. Tuir mai, ema oho nia no sira hotu nebe tuir nia halai namkari no mate mohu. Tuir ida ne’e, iha tempo arolamento nian, mosu fali Judas, ema Galileu nebe lori povo tomak tuir nia. Nia mós mate no nia maluk sira hotu halai namkari. Oras ne’e! Ha’u fó lia meno ida ba imi: Imi keta book ema sira ne’e! Basá buat nebe sira hala’o mai housi ema karik, sei lakon mohu. Maibe mai housi Maromak karik, imi keta halo áat ba sira, atu nune’e, atu nune’e imi la bele funu hasouro Maromak!” Sira simu hodi halo tuir doutor Gamaliel nia lia meno. Sira bolu Apóstolo sira mai iha sira oin; haruka baku tiha sira, hateten ba sira atu la bele haklaken tan hodi Jesus nia naran; hafoin, fó liberdade ba sira. Sira sai housi assembleia ho ksolok boot basá sira simu terus tan Jesus. Lor-loron iha templo, iha uma-uma, sira la descansa hodi hanourin Lia-Foun, be simu housi Jesus, Messias.

Maromak Futar Lia.

 

Salmo Responsorial                                                                                                                         Sal. 26(27). 1, 4, 13-14 (R. cf. 4ab)

Refrão : Buat ida de’it ha’u husu ba Na’i, atu ha’u hôrik iha Nia kadunan!!! Repete-se

Na’i ha’u nia Maromak. Ha’u maksoin;

Ha’u ta’uk fali sé?

Na’i tahan ha’u moris;

Sé bele halo ha’u nakdedar? Refrão

 

Buat ida de’it ha’u buka, ha’u husu ba Na’i

Iha ha’u nia moris tomak;

Hôrik iha Nia kadunan;

Hodi haksolok ho Na’i nia tulun,

No fihir Nia templo! Refrão

 

Ha’u hein atu haré Na’i nia laran-luak

Iha ema moris sira rain.

Aten brani! Laran metin iha Na’i,

Habuis-an ba! Hein Maromak! Refrão

 

Aclamaçào                                                                                                                                                                                            Mt. 4. 4b

Refrão : Aleluia, Aleluia!! Repete-se

Ema la moris de’it ho aihan, maibe ho lia fuan sira nebe

sai housi Maromak futar ibun. Refrão

 

Evangelho                                                                                                                                                                                         Jo. 61. 1-15

Na’i Jesus Cristo nia Evangelho nudar São João haktuir:

Iha tempo nebá, Jesus liu tiha ba tasi Galileia, katak tasi Tiberiádes nia sorin balun ba. Ema lubun boot tuir Nia, tan sira haré milagre hirak Jesus halo ba ema moras. Jesus sa’e tiha ba foho leten hodi tur hamutuk ho Nia escolante sira iha neba. Páscoa, katak Judeu sira nia festa, besik dau-daun ona. Jesus haré katak ema lubun boot mai hasouro Nia, nia lia tun ba Filipe dehan: “Ita sei sosa lós pão iha nebe hodi fó han ema sira ne’e?” Jesus ko’alia nune’e, atu koko nia, basá Nia hatene tiha ona atu halo sá. Filipe hatan, dehan: “Pão osan atus rua nian mós sei la to’o atu bele ida-idak simu baluk oan ida”. Andre, Simão Pedro nia alin, hateten ba Jesus: “iha ne’e, labarik oan ida iha pão cevada fuan lima ho ikan kiikoan rua. Maibe, ne’e to’o oin sá ba ema sira ne’e hotu”. Jesus lia tun dehan: “Haruka ema sira ne’e tur hotu”. Iha fatin nebea du’ut barak. Ema sira tur tiha hotu;nmane de’it sura to’o besik rihun lima. Jesus ka’er tiha pão hirak ne’e, fó agradece ba Maromak, hodi fahe ba ema sira. Ikan sira mós Jesus halo hanesan ne’e. Ema sira hotu han to’o bosu. Hafoin Jesus lia tun ba escolante sira: “Imi ba halibur baluk oan sira hotu be han la hotu, atu keta lakon rohan oan ida”. Escolante sira halibur duni pão cevada fuan lima nia rohan-rohan sira be ema han la hotu, hodi tau hamutuk ba luhu sanulu resin rua. Haré milagre nebe Jesus halo, ema hateten ba malu: “Tebes, ida ne’e mak Profeta nebe atu mai iha mundo”. Maibe, Jesus hatene katak sira atu mai hola Nia hodi foti ba Liurai, Nia hadook-An mesa-mesak fali ba foho.

Lia Maksoyn.

Leave a Reply

Your email address will not be published. Required fields are marked *