shadow
Diocese de Dili > NOTÍCIAS > LETURA DIÁRIA > III Domingo iha tempo Páscoa (Ano C)

III Domingo iha tempo Páscoa (Ano C)

Primeira Leitura               Act. 5, 27b-32. 40b-41

Lia housi Livro Apóstolo sira nia hahalok:

Iha loron hirak nebá, sacerdote boot hateten nune’e ba Apóstolo sira:” Ami hateten ona atu imi la bele hanourin hodi Jesus nia naran. Maibé, imi hanourin liu imi nia doutrina iha Jerusalém tomak; imi hakarak mos dun ema ida ne’e ran mai ami”. Pedro ho Apóstolo sira hatán:”Lolós halo tuir Maromak nia hakarak liu ema sira nian. Ita amtauk sira nia Maromak halo moris hias Jesus, Jesus ida be imi oho hodi hedi Nia ba Krus. Maromak ho kbiit hahí duni Nia, halo Nia sai duni Na’i-ilin no Maksoyn, atu Nia bele halo Israel hakribit hodi hetan perdua ba sira salan. Ami fo lia sasin ba buat hirak ne’e, ami ho Espírito nebé tuir Nia hakaran.” Nune’e, Judeu sira haruka baku Apóstolo sira ho óe, hodi bandu sira atu la bele ko’alia tan hodi Jesus nia naran; hafoin, haruka sira fila fali ba uma. Ho laran ksolok teb-tebes, sira sai housi Sunédrio oin mai, tan sira bele terus tan Jesus naran.

Maromak Futar Lia.             

 

Salmo Responsorial                                                                                                        Sal. 29 (30), 2-6. 11, 12ª. 13b

Refrão :  Na’i, ha’u agradece ita, tan ita soy ha’u!!! Repete-se

Ou             Na’i, ha’u Agradece ita, tan ita simu ha’u!!! 

 

Na’i, ha’u hahí ita, tan ita soy ha’u,

Ita la husik ema aat hamnasa ha’u.

Ita hasai ha’u housi mate laran;

Hasai housi mate, wainhira ema atu hakoi ha’u. Refrão

 

Hananu ba Na’i, imi sira ba hadomi Nia;

Hana’i Nia naran santo.

Nia la rai hirus iha laran;

Nia laran luak ba nafatin.

Loraik ita laran susar karik,

Molok rai kmaus, ita sei haksolok. Refrão

 

Na’i, rona ha’u, sadia ha’u,

Tan ita nia kmanek, ami tulun ha’u!

Ha’u nia laran susar hetan ksolok,

Na’i, ha’u hahí ita ba nafatin. Refrão

 

Segunda Leitura                                                                                                                                              Apoc. 5, 11-14

Lia housi Livro Apocalipe:

Ha’u João, ho buat hirak nebé ha’u haré, ha’u rona mos Anjo sira nia lian. Anjo sira ne’e hale’u hela trono, hale’u hela ema moris nanis no ema katuas sira. Anjo sira ne’e rihun ba rihun, tokon ba tokon sura la bele. Sira hatete ho lian maka’as:”Bibi-oan, ema oho ona, nia soy duni atu simu ukun, simu beran no soyn, simu matenek no kbiit; ema hahí, ema hanaran boot, ema haliban Nia.” Hafoin, ha’u rona hatete ba criatura tomak, moris iha lalehan, iha rai, iha rai okos no iha tasi klaran, ba buat hotu iha rai klaran:”Haliban, hahí ema ida be tur iha trono no ba Bibi-oan; ukun ho naran boot tinan nafatin.” Ema moris nanis na’in haat, hatán:”Amen.” Ema katuas sira tuku tur ba rai hodi hana’i.

Maromak Futar Lia.    

 

Aclamação

Refrão : Aleluia, Aleluia!! Repete-se

Cristo moris hias! Nia halo mundo; ho laran luak

Nia soy ema hotu! Refrão

 

Evangelho (Forma longa)                                                                                                                                 Jo. 21, 1-19

Na’i Jesus Cristo nia Evangelho Nu’udar São João haktuir:

Iha tempo nebá, Jesus mosu dala ida tan ba Escolante sira iha tasi ibun Tiberíades. Nia mosu nune’e: Tomé, ida be hanaran Dídimo, ho tan Nataniel, ema housi Caná Galileia nian, sira horik hamutuk ho Simão Pedro. Iha mos nebá Zebedeu nia oan sira, ho tan Jesus nia Escolante na’in rua. Simão Pedro hateten ba sira:” Ha’u ba, tihá ikan.” Sira hatán:”Ami mos ba hotu!” Nune’e, sira sai housi uma ba sa’e ró, maibé iha kalan ne’e, sira la hetan buat ida. Besik rai naroman, Jesus mosu ba sira iha tasi ibun; maibé Nia Escolante sira la hatene. Jesus dehan ba sira:” Labarik sira, iha buat ruma atu han?” Sira hatán:” La iha liu…” Jesus hatete fali ba sira:”Imi soe dahi ba sorin lós, imi sei hetan.” Nune’e sira soe duni dahi; hafoin sira dada mai, susar teb-tebes, tan ikan nakonu resin. Haré ida ne’e, Escolante nebé Jesus hadomi liu dehan ba Pedro:” Na’i mak nebá…”Rona katak Na’i mak nebá, Simão Pedro harais tiha, basá nia isin tanan, hafoin nia haksoit kedas ba tasi. Escolante sira seluk dook housi tasi to’o metro atus ida; sira he’an bero mai tasi ibun hodi hodi dada dahi ho ikan. Tun tiha ba rai, sira haré ahi-klaak balu ho ikan iha leten ho tan Pão. Jesus hateten ba sira:” Imi lori ikan sirafoin kaer ne’e mai.” Simão Pedro sa’e ba ró hodi dada dahi mai rai ho ikan nakonu, ikan boot de’it atus ida lima nulu resin tolu. Ikan barak resin nune’e, maibé dahi la naklés. Jesus hateten ba sira:” Imi mai han ona.” Escolante sira ida mos la hanoin atu husu:”Ita sê?” Tan sira hatete katak ema ne’e Jesus duni. Jesus besik ba sira, kaer Pão ho ikan fo ba sira. Ne’e Jesus duni. Jesus besik ba sira, kaer Pão ho ikan fo ba sira. Ne’e dala tolu ona mak Jesus mosu ba Nia Escolante sira, liu tiha loron nia Moris hias housi mate. Sira han hotu tiha, Jesus husi ba Simão Pedro:” Simão, João nia oan, ó haedomi Ha’u, liu sira ne’e hotu?” Simão hatán:” Tebes duni Na’i, ita hatene katak ha’u hadomi ita.” Jesus dehan ba nia:” Ó matan ba ha’u nia Bibi-oan sira,” Jesus husu tan:” Simão, João nia oan, ó hadomi Ha’u?” Simão hatán:” Tebes duni Na’i, ita hatene katak ha’u hadomi ita.” Jesus dehan ba nia” Ó tau matan ba ha’u nia bibi sira.” Dala ida tan Jesus husu tan ba Pedro: Simão, João nia oan, ó hadomi ha’u?” Pedro neon sala, tan Jesus husu dala tolu ona ba nia:’ Ó hadomi Ha’u?” Hafoin Pedro hatán:” Na’i Ita hatene hotu, Ita hatene katak ha’u hadomi Ita.” Jesus dehan ba nia:” Ó tau matan ba Ha’u nia bibi sira. Tebes, Ha’u hatete lós ba ó:” wainhira ó sei klosan, ó rasik hatais, ó la’o ba fatin nebe ó hakarak. Maibé, katuas tiha, ó sei foti liman atu ema seluk fo hatais ó, nia sei lori ó ba fatin nebe ó lakohi.” Jesus hateten nune’e, atu fo hatene sai oin sá Pedro sei hetan mate atu hahí Na’i Maromak. Ne’e hotu Jesus dehan tan:” Ó tuir Ha’u mai!”

Lia Maksoyn.

Leave a Reply

Your email address will not be published. Required fields are marked *