shadow
Diocese de Dili > NOTÍCIAS > LETURA DIÁRIA > Quarta-Feira, III Semana iha tempo Páscoa (ANO C)

Quarta-Feira, III Semana iha tempo Páscoa (ANO C)

Primeira Leitura                Act. 8. 1-8 (1b-8)

Lia housi livro Apóstolo sira nia hahalok:

Iha loron neba, Kreda be iha Jerusalém hahu terus ua’in; ema duni hodi buka atu halo áat ba nia. Apóstolo sira de’it mak hela, maibe ema sira hotu la’o namkari iha rai Judeia no Samaria tomak.

Ema sarani di’ak balu hakoi iha Estêvão nia isin, tanis tan hanoin nia. Saulo fali, hahu buka halakon Kreda; tama sai uma ba uma hodi káer ema mane no feto hodi ba hatama iha kadeia.

Sarani sira nebe la’o namkari ba rai-rai, hahu haklaken Na’i nia doutrina. Filipe ba iha cidade ida iha rai Samaria nian hodi haklaken Messias iha neba. Ema lubun boot lós ho hanoin ida de’it, simu Filipe nia hanourin, uainhira rona no haré Filipe halo milagre. Tebes duni, ema barak nebe iha demónio, uainhira demónio sai housi sira isin, sira hakilar maka’as no mós ema moras barak, la’o la di’ak no ain áat, sira hotu hetan fali isin di’ak. Nune’e. Ema tomak iha kadeia ne’e hetan ksolok.

Maromak Futar Lia.

 

Salmo Responsorial                                                                      Sal. 65(66). 1-3ª, 4-5, 6-7ª (R. 1)

Refrão : Rai-Klaran tomak hahi Na’i!!! Repete-se

Ou       Aleluia!

Rai- klaran tomak hahi na’i!

Hananu Nia naran kmanek,

Hauélok ho ksolok ba Na’i!

Imi dehan ba Na’i: Refrão

 

‘Ita hahalok sira kmanek ua’in tebes!’ Refrão

Rai hotu hakru’uk iha Ita oin,

Nia hananu ita naran.

Mai hotu no haré buat be Maromak halo,

Nia hahalok kmanek ua’in tebes ba ema. Refrão

 

Halo tasi nakfila ba rai isin,

Hamaran mota atu ema bele liu.

Mai ita haksolok iha Maromak;

Nia ukun ho biit rohan laek. Refrão

 

Aclamação                                                                                                                                       Jo. 6. 40

Refrão : Aleluia, Aleluia!! Repete-se

Na’I lia tun, “Ida ne’e mak Ha’u Aman Nia hakaran: Ema hotu nebe fiar iha Maromak Oan, bele hetan moris rohan laek. Ha’u sei halo nia moris hi’as iha loron ikus”. Refrão

 

Evangelho                                                                                                                                  Jo. 6. 35-40

Na’i Jesus Cristo nia Evangelho nu’udar São João haktuir:

Iha tempo neba, Jesus lia tun ba ema lubun ua’in:”Ha’u mak Ai-han moris nian; ema nebe hakbesik mai ha’u, nia sei la hamlaha tan; ema nebe fiar ha’u, nia sei la hamrook tan. Nune’e mós Ha’u dehan lós ba imi: ‘Maski imi haré Ha’u, imi la fiar. Buat hotu nebe Ha’u Aman haraik mai Ha’u, sei mai iha Ha’u; nebe mai iha Ha’u, Ha’u sei la heuuai nia, tan Ha’u mai housi Lalehan la’os atu halo tuir Ha’u Nia hakaran maibe atu halo tuir Ida be haruka Ha’u mai ne’e Nia hakaran. Ida bele lakon sira nebe Nia haraik mai Ha’u, maibe atu hamoris hi’as iha loron ikus. Ne’e mak Ha’u Aman Nia hakaran: Ema hotu nebe haré Oan Mane Maksoi hodi fiar iha Nia, bele hetan moris rohan laek. Ha’u sei halo nia moris hi’as iha loron ikus”.

Lia Maksoyn.

Leave a Reply

Your email address will not be published. Required fields are marked *