shadow
Diocese de Dili > NOTÍCIAS > LETURA DIÁRIA > Segunda-Feira, III Semana iha tempo Páscoa (ANO C)

Segunda-Feira, III Semana iha tempo Páscoa (ANO C)

Primeira Leitura                        Act. 6. 8-15   

Lia housi livro Apóstolo sira nia hahalok:

Iha loron hiran neba, Estevão iha graça no biit nakonu, halo buat foun no milagre oi-oin iha povo nia leet. Maibe, ema balun housi grupo sinagoga nian be hanaran Libertos, housi Cirene, housi Alexandria, housi Cilícia no Ásia, sira mai haksesuk malu ho Estevão, maibe sira la tahan nia matenek no Espírito nebe hodi nia ko’alia.

Sira futu lia ho ema balu atu dehan:” Ami rona Esetvão hateten áat Moisés no hasoru Maromak’. Sira hasa’e lia ba povo, ba katuas no ba escriba sira. Hafoin, sira haruka ema ba káer nia; lori nia ba iha Sinédrio, hodi sasin bosok, hatete: “ Ema ida ne’e, lor-loron, hateten lia áat hasoru fatin Santo ne’e hodi ko’alia áat hasouru Lei. Basá, ami rona mós nia hateten katak Jesus Nazaré ne’e, bele sobu fatin ne’e no haruka muda hahalok sira be ami simu housi Moisés”. Sira hotu nebe tur iha Sinédrio, hateke ba Estevão, sira haré nia oin hanesan anjo ida nian.

Maromak Futar Lia.

 

Salmo Responsorial                                                      Sal. 118(119). 23-24, 26-27, 29-30 (R. 1b)

Refrão : Rahun di’ak ba sira be moris tuir  Na’i nia ukunfuan!!! Repete-se

Ou        Aleluia!!

Maski liurai oan sira tesi lia hasouro ha’u;

Ita atan hanoin ita lei.

Na’i, Ita ukunfuan mak ha’u ksolok;

Ita Nia hakaran mak ha’u lia meno. Refrão

 

Ba ita, ha’u hasa’e ha’u moris;

Na’i, rona ha’u, hatudu Ita hakaran mai ha’u.

Hatudu Ita dalan mai ha’u,

Ha’u sei hanoin Ita kmanek sira. Refrão

 

Na’i, hasai ha’u housi dalan bosok nian;

Haraik tulun mai ha’u atu hatene Ita hakaran.

Na’I, ha’u hili dalan lós nian;

Iha ha’u oin, ha’u rai Ita ukunfuan sira. Refrão

 

Aclamação                                                                                                                                                                   Mt. 4. 4b

Refrão : Aleluia, Aleluia!! Repete-se

Ema la Moris de’it ho aihan, maibe ho liafuan sira nebe

Sai housi Maromak futar ibun. Refrão

 

Evangelho                                                                                                                                                              Jo. 6. 22-29

Na’i Jesus Cristo nia Evangelho nu’udar São João haktuir:

Iha tempo neba, tuir loron haua’in Pão no ikan nian, ema barak sei hela iha tasi Tiberíades nia sorin balu ba. Sira haré katak iha neba iha de’it ró ida; Jesus la tama iha ró hamutuk ho nia escolante sira, maibe sira ne’e mesak mak ba tiha. La kle’ur de’it, ró selu-seluk housi Tiberíades to’o iha fatin nebe sira han Pão ba, uainhira Na’i fó tiha bensa. Ema sira haré katak Jesus ho nia escolante sira la iha ona tasi ibun. Tan ne’e, sira sa’e hotu ba ró, hean to’o  Cafarnaum atu buka Jesus. Hetan tiha Jesus iha tasi sorinbalu ba, sira dehan ba Nia:”Mestre, Ita to’o iha ne’e houri uainhira?”

Jesus lia tun ba sira:”Ha’u dehan tebes ba imi: imi buka Ha’u, la’os tan imi haré milagre sira, maibe tan imi han Pão to’o bosu didiak. Imi sei káer serbisu la’os tanba aihan nebe mohu maibe tan aihan nebe la mohu tinan-ba-tinan. Ai-han ne’e Mane Maksoi mak sei haraik ba imi. Ba Mane Maksoi ne’e duni mak Aman MAromak tau marka”. Sira hasa’e lia ba Nia, dehan:” Ami sei halo lós” Maromak Nia serbisu? Jesus lia tun ba sira: “Maromak Nia serbisu mak ida ne’e: Imi fiar Ida nebe Nia haruka mai”.

Lia Maksoyn.

Leave a Reply

Your email address will not be published. Required fields are marked *