shadow
Diocese de Dili > NOTÍCIAS > LETURA DIÁRIA > Quinta-Feira, III Semana iha tempo Páscoa (ANO C)

Quinta-Feira, III Semana iha tempo Páscoa (ANO C)

Primeira Leitura                     Act. 8. 26-40

Lia housi livro Apóstolo sira nia hahalok:

Iha loron hirak neba, Na’i nia Anjo dehan ba diácono Filipe:” Ó sai hodi la’o ba Tasi-mane, tun tuir luron ba Jerusalém, liu ba iha Gaza; Iha neba iha rai ida sei fuik hela”. Nia sai kedas hodi ba lós iha neba. Hafoin, mosu mai, ema eunuco ida, housi Etiópia, empregado boot housi Candace, luirai feto Etiópia nian no mós empregado riku-soi rai ne’e nian. Nia ba halo adoração iha Jerusalém; fila housi neba, tuir dalan, tur iha nia kareta laran, Nia lê daudaun lia housi profeta Isaías. Espírito Santo fó hanoin ba Filipe: Ó la’o ba in hodi hakbesik ba kareta ne’e”. Filipe ba besik, nia rona ema ne’e lê hela sagrada Escritura kona ba Profeta Isaías; nia hsus ba ema Etiópia ne’e”. “Ó hatene buat ruma kona ba buat nebe ó lê?” Nia hatan ba Filipe: “Oinsá ha’u bele hatene, la iha karik ema ida atu hanourin buat ne’e mai ha’u?” Hafoin nia bolu tiha Filipe hodi sa’e ba kareta no tur hamutuk tiha ho nia. Passagem Escritura nian nebe nia lê mak ne’e:

“Ha’u hanesan bibi-malae, ema lori atu ba oho, hanesan bibi oan lian laek; uainhira ema tesi nia fulun, nia la loke nia ibun. Ema hamoe nia no la halo ba nia tuir Justiça. Sé mak sei bele haktuir nia descendência? Tanba nia moris, ema hakotu tiha housi rai!”

Empregado boot ne’e husu ba Filipe: Favor, hateten mai, profeta ne’e ko’allia kona ba sé lós? Kona ba nia-an eh kona ba ema seluk?” Tan ne’e Filipe hahu ko’alia, housi passagem Escritura nian ne’e hodi haklaken Jesus ba nia. Sira la’o daudaun tuir luron, uainhira sira haré ué boot ida. Ema eunuco ne’e dehan:”Ué mak neba! Sá mak hakaik netik ha’u atu la bele simu baptismo?” Nia haruka para kareta. Filipe sarani tiha nia. Uainhira sira sai housi ué, Na’i nia Espírito taka netik Filipe, nune’e, eunuco la haré heran nia: nia tuir nia dalan ho ksolok ua’in tebes. Filipe hela iha cidade Azoto, hahu la’o ba rai hot-hotu iha cidade sira, hodi ba to’o iha Cesaria.

Maromak Futar Lia.

 

Salmo Responsorial                                                                       Sal. 65(66). 8-9, 16-17, 20 (R. 1)

Refrão : Rai-klaran tomak hahi Na’i!!! Repete-se

Ou            Aleluia!

Povo tomak, mai, ita  hahi ita Maromak!

Ita hotu hananu Nia glória!

Na’i mak lori ita ba moris rohan laek;

Nia la husik ita monu ba sala. Refrão

 

Mai rona, imi be Maromak Nia belun sira;

Ba imi ha’u sei haktuir,

Buat di’ak nebe Na’i halo mai ha’u.

Ha’u nia ibun hahi Nia,

Ha’u nia nanal hananu nia glória. Refrão

 

Rahun di’ak ba Na’i,

Basá la heuuai ha’u nia harohan;

Na’i tulun nafatin ha’u. Refrão

 

Aclamação                                                                                                                                        Jo. 6. 51

Refrão : Aleluia, Aleluia!! Repete-se

 Na’i lia tun: “Ha’u mak pão moris tun housi Lalehan mai.

Ema sé han pão ne’e, nia sei moris ba nafatin”.  Refrão

 

Evangelho                                                                                                                                   Jo. 6. 44-51

Na’i, Jesus Cristo nia Evangelho nu’udar São João haktuir:

Iha tempo neba, Jesus lia tun ba ema lubut ua’in:”Ha’u Aman nebe haruka Ha’u mai, la dada karik, ema ida la bele hakbesik mai ha’u; Ha’u sei halo nia moris hi’as iha loron ikus. Profeta sira hakerek nanis ona, dehan:’ Maromak rasik sei hanourin ema hotu’.ema hotu nebe fó laran ba Aman Maromak no rona nia hanourin, ema me’e mak hakbesik mai Ha’u. Ne’e la’os katak ema ruma haré ona Aman Maromak. Ha’u dehan tebes ba imi: Ema nebe fiar, ema ne’e hetan duni moris rohan laek. Ha’u mak aihan moris nian. Iha rai fuik maran, imi bei-ala sira han maná; sira mate hotu ona. Ema nebe han aihan ne’e, nia sei la mate. Ha’u rasik mak Ai-han moris nian tun mai housi Lalehan. Ema nebe han ai-han ne’e, nia sei moris ba nafatin. Ai-han Ha’u atu fó mak Ha’u Nia isin saran ba rai-klaran nia moris.

Lia Maksoyn.

Leave a Reply

Your email address will not be published. Required fields are marked *