shadow
Diocese de Dili > NOTÍCIAS > LETURA DIÁRIA > V Domingo da Páscoa (ANO C)

V Domingo da Páscoa (ANO C)

Primeira Leitura    Act. 14, 20b-26  (21b-27)

Lia housi Livro Apóstolo sira nia hahalok:

Iha loron hirak nebá, Paulo ho Barnabé fila fali ba Listra, ba Icónio no ba Antioquia. Sira fo aten boot ba Escolante sira atu sira laran metin nafatin tuir sira nia fiar. Hafoin sira hateten tan: “Atu tama ba Maromak nia Reino, ita sei terus barak.” Tau tiha liman iha katuas sira be hili ne’e nia ulun, hodi foti sira, atu sira ida-idak ukun Uma kreda ida; halo tiha oração no jejun, Paulo ho Barnabé fo sira ba Maromak, Maromak be sira fiar ona. Hafoin, Paulo ho Barnabé liu kona Pisídia too rai Panfília. Hanorin tiha Maromak nia Lia-Fuan iha Perga, Paulo ho Barnabé tun ba Atália. Housi nebá, sira ba Antioquia ho bero; housi Antioquia, hodi Maromak nia tulun, sira sai ba halo serviço nebé sira hahú tiha ona. Too tiha nebá, sira halibur sarani hotu hodi haktuir buat hotu nebé Maromak halo hodi sira. Sira haktuir mos, oin sá Na’i Maromak loke ema gentio sira nia laran atu fiar.

Maromak Futar Lia.

 

Salmo Resposorial                                                                                                                                                    Sal. 144 (145), 8-13ab

Refrão : Hananu haksolok,hahí Jesus nia naran!!! Repete-se

Na’i Jesus laran luak hadomi ita,

La rai hirus, hadomi, perdua.

Na’i Jesus hakarak di’ak ba ema hotu,

Fo tulun ba ema laran susar. Refrão

 

Ema hotu haklaken Na’i Jesus,

Sarani hotu hahí hananu.

Povo hotu haklaken Reino lalehan,

Haklaken di’ak hotu ba nafatin. Refrão 

 

Povo rai-klaran hatene Na’i nia kbiit,

Hatene kmanek ne’e boot oin sá.

Na’i nia ukun Reino rohan laek,

Ukun ema hotu ba nafatin. Refrão

 

Segunda Leitura                                                                                                                                                                         Apoc. 21, 1-5

Lia housi Livro Apocalipse:

Ha’u João, haré lalehan foun ida, rai foun ida, tan lalehan uluk nian ho rai uluk nian lakon tiha ona. Hafoin, ha’u haré cidade Santa, katak Jerusalém foun, tun dau-daun mai housi lalehan, tun mai housi Maromak futar oin, furak no kmanek, nu’udar feto-rán ida hafutar-an atu simu la’en. Housi Maromak nia Trono, ha’u rona lia maka’as ida dehan:” Ne’e Maromak nia uma fatin atu hela iha ema sira leet. Maromak sei tur iha ema sira leet: ema sira sei moris nu’udar Maromak nia povo; Maromak rasik sei hela nu’udar sira nia Maromak. Na’i Maromak sei hamaran sira nia mata-wén; mate sei lakon, ema sei la hatais tan lutu; ema sei la halerik tan, sei la terus tan. Sasán uluk nian lakon hotu tiha ona. Ema ida be tur hela iha Trono, lia tun dehan: “ Ha’u sei halo foun sasán hotu-hotu.” 

Maromak Futar Lia.

 

Aclamação                                                                                                                                                                                           Jo. 13, 43

Refrão : Aleluia, Aleluia!! Repete-se

Ha’u fo ba imi mandamento foun,

Imi sei hadomi malu. Refrão

 

Evangelho                                                                                                                                                                      Jo. 13, 31-33a. 34-35

Na’i Jesus Cristo nia Evangelho Nu’udar São João haktuir:

Iha tempo nebá, sira sei han daudaun Páscoa nian, Judas sai tiha. Hafoin, Jesus hateten ba Escolante sira: “Ohin duni, Na’i Maromak hahí Mane-Maksoyn; ohin duni, ema mos hahí Na’i Maromak hodi Mane-Maksoyn. Ema hahí karik Maromak hodi Mane-Maksoyn, Na’i Maromak mos sei hahí Mane-Maksoyn iha Nia-An rasik. Besik ona atu Na’i Maromak hahí duni Mane-Maksoyn. Oan doben sira: Ha’u sei horik tempo witoan de’it ona ho imi. Ha’u fo ba imi ukun foun ida; imi sei hadomi malu. Tebes, nu’udar Ha’u hadomi imi, nune’e mos imi sei hadomi malu. ImI hadomi malu karik, ne’e sinal ida atu ema hotu-hotu hatene katak imi Ha’u nia Escolante duni.” 

Lia Maksoyn.

Leave a Reply

Your email address will not be published. Required fields are marked *