shadow
Diocese de Dili > NOTÍCIAS > REFLEXÃO > DOMIN : ENTRE TEORIA & PRÁTICA

DOMIN : ENTRE TEORIA & PRÁTICA

REFLEXÃO VI DOMINGO DA PÁSCOA :

 

               Iha loron ida, depois de fila husi misa, amululik ida laran hirus no haksiak nia cozinheiro sira tanba sira seidauk prepara matabisu. Tuir mai, cozinheiro hatan ba amu lulik nee dehan; desculpa amu, horseik hau buka duni pão maibé la iha tanba loja sira taka hotu kedas tanba monu los ho loron feriado nian.

               Halo favor amu paciência lai tanba hau sei ba buka hodi sosa mai amu matabisu. Ohin iha homília amu dehan; Domin nee paciência no ema nebe paciência, Maromak sei hadomi nia.

               Ho oin hirus amu nee hatan; ohin hau koalia iha ambão hanesan Maromak mak koalia. Agora hau mak koalia rasik ba o hodi ba buka lalais pão mai hau matabisu.
Mensagem importante tolu mak ita bele contempla husi Evangelho Somingo semana nee:

  1. Ita hadomi duni Maromak se ita moris tuir Ninia Lia Fuan. 2. Jesus promete atu haruka Espírito Santo (Paráclito) hodi fo aten brani. 3. Jesus promote rahun diak (Paz) ba Ninia escolante sira. Molok ema aat atu kaer no julga Nia, Jesus hanorin escolante sira hodi dehan: : ‘’Ema nebé hadomi ha’u, nia sei halo tuir Ha’u nia Lia–Fuan.Ha’u nia Aman sei hadomi nia; Ami sei mai nia uman,Ami sei horik ho nia. Iha nia carta, São João justifica katak Maromak mak domin (1Jo 4,8.16). Papa Emérito Bento XVI iha ninia Encíclica DEUS CARITAS EST mos confirma característica Maromak nudar Domin.

Jesus nia presença nudar Maromak Oan (Mane Maksoin) nudar provas katak Maromak mak we-matan domin. Jesus nia passagem eh lalaok moris tomak fo imagem kona ba Maromak nia domin nee. Jesus nia missão nudar concretização husi vontade Amor de Deus. Se ita nudar Cristão Católico hadomi tebes Cristo, ita hakarak ka lakohi tenke cumpri mandamento nebe Cristo husik hela. Ita nia dignidade nudar seguidor Cristo nian mak oinsa hakaas-an hodi moruis tuir Cristo nia hanorin.

2. Molok husik Apóstolo sira, Jesus promete atu haruka Espírito Santo (paráclito) hodi fo coragem sira hodi continua missão haklaken Evangelho ba mundo tomak. Buat nebe Jesus promete concretiza duni iha tempo Pentecoste. Espírito Santo ida nee mak sei haroman Apóstolo sira (ita nobun nebe baptizado) hodi kaer metin Jesus nia hanorin sira autênticamente.

3. Mensagem importante seluk mak; Jesus la husik Apóstolo sira iha sentimento tauk maibé encoraja sira hodi dehan: Ha’u dame hela ho imi; Ha’u fo ba imi Ha’u nia dame. Dame nebé ha’u fo ba imi la’os hanesan mundo fo ba imi. Imi keta laran susar, keta hakfodak. Imi rona ona lia nebé ha’u hateten ba imi: Ha’u ba ona, maibé Ha’u sei fila fali mai imi//“Damai sejahtera Kutinggalkan bagimu. Damai sejahtera-Ku Kuberikan kepadamu, dan apa yang Kuberikan tidak seperti yang diberikan oleh dunia kepadamu”(Jo 14,27).

               Maromak nia Domin nee la mai facilmente nem ita hetan facil maibé precisa processo sacrifício ida. Maromak iha Jesus Cristo hatudu domin (Amor) nee ho coragem.

               Ema barak iha perspectiva rasik hodi interpreta lia fuan Domin (Amor). Saida mak Domin? Labarik kiik ida bele compreende Domin wainhira nia husu inan-aman sosa telemóvel ida no nia hetan buat nebe nia husu. Ema balun tan interpreta Domin mak wainhira nia iha namorado eh namorada ida. Balu fali tan interpreta Domin liu husi hakuak malu no rei malu.

               Ema balun tan compreende Domin liu husi ai funan rosa eh presente ho cor pink nebe nia oferece ba belun feto. Ema seluk fali interpreta Domin hanesan ema nain rua nebe tuur hamutuk iha jardim ida hodi sura fitun sira iha lalehan.

               Iha relato Evangelho Domingo semana nee, haktuir nafatin kona ba oinsa Jesus hatoo Mandamento foun ba nia escolante sira hodi hadomi malu nudar Jesus hadomi sira. Lia Fuan hadomi malu ou respeita malu nudar princípio moral ida iha doutrina Cristianismo (Catolicismo), reflecte ba Jesus nia ordem.

               Domin modelo ida nebe mak Jesus prefere? Atu hatan ba pergunta nee, ita precisa hatene contexto foun nebe Jesus hakarak hanorin. Precisa ita recorda fali katak; Jesus nia mandamento foun nee hatoo iha altura sira han kalan ikus nian; wainhira Jesus foin remata fase apóstolo sira nia ain. Liliu iha momento ema besik saran Jesus ba mate nebe nia apóstolo Judas Iscariotes rasik mak sai traidor ba ida nee.

               Ho lia fuan seluk, Jesus fo hatene manadamento foun nee wainhira Nia iha dadaun crise no pressão tan Nia atu hasoru mate. Iha situação ida nee, Jesus sei tenta no disponível nafatin hodi hanorin doutrina Domin ba Nia escolante sira. Iha ponto ida nee mak ita bele compreende Jesus nia intenção Domin nebe Nia hakrak hanorin atu ita sarani sira bele banati tuir. Significa, Domin Jesus nian nee rohan laek. Basá, iha situaçã ansiedade ida nee, Jesus hadomi nafatin Nia emar sira.

               Jesus hadomi nafatin ita nobun maske ita nia hahalok sira halo Jesus sente laran triste. Jesus (Maromak) hadomi ita laos tanba saida mak ita iha maibé, Jesus hadomi nafatin maske ita halo aat ba Nia.

 

               Sentido Domin laos questão ita sente deit mak momento furak sira, situação contente eh haksolok sira deit maibé, Domin lolos mak wainhira ita paciência hodi simu buat nebe la fo ksolok ba ita nia moris. Wainhira ema hasoru dificuldade oioin iha moris, Maromak hatete nafatin: i love you. Provas nebe boot liu husi husi Domin nee mak Nai Jesus nia mate iha Cruz.

 

               Domin mak lia fuan diak nebe facil atu ema temin iha ibun maibé, la facil atu ema halo tuir iha prática moris. Nunee, Domin laos questão lia fuan murak deit maibé, vontade no ação. Domin significa hanoin atu halo diak ba ema seluk no koko bebeik atu concretisa lalaok nee iha moris.

               Paulo ho Barnabe iha primeira leitura Domingo semana nee, sira hamosu sentido domin ba ita hodi koalia liu kona ba oinsa Maromak sira. Sira mos presente iha comunidade hodi hametin sira nia fiar liu husi encoraga comunidade sira katak; Maromak nunca para hadomi ema maske hasoru dificuldade oioin.

Espera katak refelxão nee loke ita nia fuan hodi sai hanesan Maroamk nia domin ba ema seluk liu husi fiar no hahalok loroloron. Assim Seja e Bem Haja. (Ignas)

Leave a Reply

Your email address will not be published. Required fields are marked *