shadow
Diocese de Dili > NOTÍCIAS > LETURA DIÁRIA > VI Domingo da Páscoa (ANO C)

VI Domingo da Páscoa (ANO C)

Primeira Leitura          Act. 15, 1-2. 22-29

Lia husi livro Apóstolo sira nia hahalok:

Iha loron hirak neba, ema balu moris iha Judeia, mai hanorin hela maun-alin sira iha Antioquia hodi dehan: ‘’imi la simu karik circunsição tuir lisan mai nanis husi Moises, imi sei la hetan Maksoyn”. Tan ida nee, sira haksesuk malu maka’as teb-tebes hasoru Paulo no Barnabé. Nunee sira hakotu lia atu Paulo ho Barnebé ho tan sira balu, sa’e ba Jerusalem atu ko’alia ho Apóstolo ho katuas sira kona ba lia nee. Apóstolo sira ho katuas sira, hamutuk ho kreda hotu hakotu lia atu fihir maun-alin balu hodi haruka sira ba Antioquia hamutuk ho Paulo ho Barnabé: Judas, ida be hanaran Barsabas ho Silas, mesak ema lia naindeit, sira nain rua mak ba. Sira haruka lori surat ida nee: “Apóstolo ho katuas sira, imi nia maun-alin sira nebé mai husiema gentio sira leet, tuur iha Antioquia, iha Círia no iha Cilícia: ami nia haksolok, ami rona katak ema balu husinee, ba halo imi nia laran susar hodi sira nia lia–fuan, maski ami la haruka. Tan nee, ami hakotu lia atu fihir saseluk hodi haruka sira ba imi. Sira ba hamutuk ho maluk doben Paulo ho Barnabé. Sira nee saran ona sira nia moris ba mate, tan Na’i Jesus Cristo nia naran. Nunee, ami haruka Silas ho Judas atu sira rasik fo hatene  ba imi, ami nia hanoin. Espírito Santo ho ami hakotu lia atu la bele fo tan ukun-fuan ruma ba imi. Ida needeit mak imi sei tuir duni. Keta han naan lulik, keta  hemu ran, ho naan maten, keta halo sala foer. Imi halo tuir ukun-fuan hirak nee mak di’ak duni. Adeus.’’

Maromak Futar Lia.

 

Salmo Responsorial                                                                                                                                              Sal. 66 (67), 2-3. 5-6. 8

Refrão : Hahí Na’i Jesus ema tomak rai klaran!!! Repete-se

Maromak hanoin ita, tulun ita,

Leno mai ita nia futar oin nabilan. Refrão

 

Iha rai ema hatene Maromak dalan,

Povo rai klaran hetan nia maksoyn. Refrão

 

Rai hotu sei hetan haksolok,

Tan Maromak tesi lialos, Refrão

 

Hanourin  ema hadomi justica,

Hatudu dalan lós  ba povo rai klaran, Refrão

 

Segunda Leitura                                                                                                                                                       Apoc. 21, 10-14. 22-23

Lia husi livro Apocalipse:

Anjo ida lori ha’u neon, ha’u João sa’e to’o foho aas ida nia tutun nia hatudu mai ha’u cidade santa Jerusalem, tun mai daudaun husi lalehan, husiMaromak futar oin nabilan boot hodi Maromak kbiit. Cidade nee nia roman boot hanesan fatuk ida kmanek no folin boot teb-tebes, kmanek hanesan fatuk jaspe ida nabilan. Cidade nee boot no aas, ho odamatan sanulu resin rua. Odamatan hirak nee, anjo sanulu resi rua mak hein. Iha odamatan hirak nee mos hedi hela uma ka’in sanulu resin rua Israel oan sira nia naran. Husi loron-sa’e odamatan tolu, husi raé odamatan tolu, husi loron odamatan tolu, husi loron-monu odamatan tolu. Cidade ida nee, iha didin hun sanulu resin rua. Iha didin hun hirak nee hakerek hela bibi-oan nia Apóstolosanulu resin rua, sira nia naran. Iha cidade laran, ha’u la hare uma kreda ida, basa, Na’i Maromak kbiit wa’in mak uma kreda, nunee mos bibi oan. Cidade nee la kuran loron ka fulan atu fo naroman ba nia, basa, Na’i Maromak nia roman boot fo naroman ba nia. Ninia ahi-oan mak bibi-oan.

Maromak Futar Lia.

(Para a segunda Leitura, pode-se ler a que segue)

 

Segunda Leitura                                                                                                                                                Apoc. 22, 12-14. 16-17. 20

Lia housi livro Apocalipse:

Ha’u João, rona lia ida hateten mai ha’u nune’e: “La kleur Ha’u sei mai, mai kedas ho Ha’u folin ho Ha’u kolen, atu fahe ba ida-idak, tuir ida-idak nia hahalok. Ha’u mak Alfa no Omega, Ha’u mak uluk no ikus, Ha’u mak hun no rohan! Rahun-di’ak ba sira nebé fase sira nia hatais atu bele hetan ai-hun moris nian, hodi bele tama iha cidade lalehan nian housi odamatan sira. Ha’u, Jesus,  haruka tiha ona Ha’u nia Anjo, atu bele fo lia sasin kona ba Kreda sira. Ha’u mak ai-delun David nian, Ha’u mak David nia Bei-oan, Ha’u mak fitun naroman rai nian”. Espírito ho nia Káben dehan: “Mai!” Ema nebé rona dehan tuir: “Mai!” Ema nebé hamrook hakbesik mai. Ema nebé buka Nia, simu wé moris la selu. Ema nebé fo lia sasin kona ba buat hirak ne’e, hateten: “Nune’e duni, la kleur Ha’u sei bá”. Amen! Maranathá! Mai Na’i Jesus!

Maromak Futar Lia.

 

Aclamação                                                                                                                                                                                           Jo. 14. 23

Refrão : Aleluia, Aleluia!! Repete–se

Ema nebé hadomi Ha”u, nia rai Ha’u nia lia-fuan;

Ha’u Aman sei hadomi nia, ami mai hela iha nia. Refrão

 

Evangelho                                                                                                                                                                                     Jo. 14, 23-29

Na’i Jesus Cristo nia Evangelho nu’udar são João haktuir:

Iha tempo nebá, Jesus hateten ba nia Escolante sira: ‘’Ema nebé hadomi ha’u, nia sei halo tuir Ha’u nia Lia–Fuan.Ha’u nia Aman sei hadomi nia;Ami sei mai nia uman; Ami sei horik ho nia. Ema nebe la hadomi ha’u nia sei la halo tuir ha’u nia lia–fuan. Lia–fuan imi rona daudaun, la’os ha’u nian, maibé,Ha’u  Aman nian, Aman ida be haruka Ha’u mai. Ha’u hateten sai lia hirak nee ba imi wainhira Ha’u sei hela iha imi leet. Maibé,  ksolok nain, katak EspíritoSanto, ida be ha’u Aman haruka mai husi ha’u nia naran, nia mak sei hanourin imi ba buat hot-hotu, nia mak sei halo imi Hanoin hetan fali buat tomak nebé Ha’u hanourin ona ba imi.Ha’u dame hela ho imi; Ha’u fo ba imi Ha’u nia dame. Dame nebé ha’u fo ba imi la’os hanesan mundo fo ba imi. Imi keta laran susar, keta hakfodak. Imi rona ona lia nebé ha’u hateten ba imi: Ha’u ba ona, maibé Ha’u sei fila fali mai imi. Imi hadomi karik Ha’u, imi sei haksolok, basá Ha’u ba ha’u Aman boot liu Ha’u. Ha’u hateten sai kedas ida nee ba imi molok atu mosu mai, atu nunee imi bele fiar, wainhira buat hiraknee mosu mai.’’

Lia Maksoyn.

(Pode-se ler o Evangelho que sague, com a sua respectiva Aclamação, em vez do anterior)

 

Aclamação                                                                                                                                                                                           Jo. 14. 18

Refrão : Aleluia, Aleluia!! Repete–se

Na’i lia tun dehan: “Ha’u la husik imi sai oan-ki’ak;

Ha’u bá, maibé Ha’u sei fila fali mai hamutuk ho imi,

Imi laran sei haksolok”. Refrão

 

Evangelho                                                                                                                                                                                     Jo. 17, 20-26

Na’i Jesus Cristo nia Evangelho nu’udar são João haktuir:

Iha tempo nebá, Jesus foti matan ba lalehan, harohan nune’e: “Ha’u Aman Santo, Ha’u la harohan de’it ba Escolante sira ne’e, maibé, Ha’u harohan mos ba sira nebé sei fiar Ha’u, tan sira ne’e nia lia-fuan, atu sira hotu-hotu sai ema ida de’it. Ha’u Aman, nu’udar Ita horik iha Ha’u, Ha’u horik iha Ita, nune’e mos, sira horik iha Ita rua, atu mundo fiar katak Ita mak haruka Ha’u mai. Ha’u fo ona ba sira naran boot nebé Ita fo mai Ha’u, atu sira sai ida de’it, nu’udar Ita rua ida de’it: Atu Ha’u horik  iha sira, Ita horik iha Ha’u. Nune’e, mundo sei hatene katak Ita mak haruka Ha’u mai; Nune’e, mundo sei hatene katak Ita hadomi sira nu’udar Ita hadomi Ha’u rasik. Ha’u Aman, sira nebé Ita fo mai Ha’u, Ha’u hakarak, atu iha fatin nebé Ha’u hela, sira mos hela hamutuk ho Ha’u. Ha’u hakarak atu sira haré Ha’u nia naran boot. Naran nebé Ita fo ona mai Ha’u, tan Ita hadomi Ha’u, molok atu haki’ak mundo. Ha’u Aman Santo, mundo la hatene Ita karik, Ha’u hatene Ita. Sira ne’e hatene ona katak Ita mak haruka Ha’u mai. Ha’u halo sira hatene Ita nia naran. Ha’u sei halo sira hatene liu tan Ita naran atu sira bele hadomi, nu’udar Ita hadomi Ha’u, atu Ha’u horik iha sira”.

Lia Maksoyn.

Leave a Reply

Your email address will not be published. Required fields are marked *