shadow
Diocese de Dili > NOTÍCIAS > LETURA DIÁRIA > Quarta-Feira, VII Semana da Páscoa (ANO C)

Quarta-Feira, VII Semana da Páscoa (ANO C)

Primeira Leitura                 Act. 20. 28-38

Lia housi livro Apóstolo sira nia hahalok:

Iha loron hira nebá, Paulo hateten ba katuas sira housi Kreda Éfeso nian: “Imi sei neon moris hamutuk ho imi bibi sira, nebé Espírito Santo tau iha imi nia liman, hodi hamatan ba Maromak Nia Kreda, Kreda nebé Maromak manan ba Nia hodi Nia ran rasik. Ha’u hatene katak, wainhira ha’u sai tiha housi ne’e, asu fuik siak sira sei mai iha imi leet, nebé sei han mós bibi oan sira housi bibi-luhan. Housi imi leet, sei mosu ema ho hahalok áat oi-oin, nebé hakarak dada escolante sira ba áat. Tan ne’e, imi neon moris ba! Imi sei hanoin hi’as katak iha tinan tolu nia laran, kalan eh loron, ha’u la descansa, hodi haklaken Lia-foun ba imi ida-idak ho mata-wen. Ora ne’e, ha’u saran imi ba Maromak, ba liafuan housi Nia graça; Nia iha kbiit atu perdua imi nia salan no mós iha kbiit atu haraik prémio ba imi, nu’udar liman-rohan, hanesan ba ema sira be simu ona santidade.

Ha’u la kan ema nia sasan, hanesan osan mean, osan mutin  eh hena hatais. Imi ida-idak hatene katak hodi ha’u liman rasik ha’u halo serbisu atu ha’u bele han, fó han ha’u maluk sira nebé la’o ho ha’u. ha’u hatudu ona ba imi katak hodi serbisu mak ita bele hetan buat ruma hodi fó tulun fali ba maun-alin sira be kiak eh fraco. Ha’u hanoin hetan fali liafuan hirak nebé Na’i Jesus dehan: ‘Ita hetan ksolok boot wainhira ita fó, liu fali wainhira ita simu’”.

Hateten tiha lia hira ne’e, nia hakneak hodi harohan hamutuk ho sira hotu. Hafoin sira hako’ak Paulo, hodi tanis no rei nia dala barak. Sira hotu neon sala, hanoin nia, tan nia hateten ba sira katak sira sei la haré tan ona nia oin. Tuir mai sira hotu ba ho nia hodi ba to’o ró.

Maromak Futar Lia.

 

Salmo Responsorial                                                                                                     Sal. 67(68). 29-30, 33-35a, 35b-36c (R. 33ª)

Refrão : Povo rai-klaran nian, hananu ba Na’i!!! Repete-se

Ou             Aleluia!!

Hatudu mai Na’i, Ita kbiit,

Kbiit nebé fó ksolok mai ami!

Liurai rai hotu nian;

Iha templo Jerusalém

Liurai sira hasa’e sira bua karan. Refrão

 

Liurai rai hotu nian, hananu ba Na’i,

Hananu hino ba Na’i,

Ba Nia be hôrik iha Lalehan;

Halo ema rona Nia futar-lia. Refrão

 

Nia kmanek nabilan iha Israel nia leten,

Nia kbiit áas liu kalohan.

Israel nia Maromak fó kbiit ba Nia povo,

Rahun di’ak ba Maromak. Refrão

 

Aclamação                                                                                                                                                                                       Jo. 17. 17b,a

Refrão : Aleluia, Aleluia!! Repete-se

Ita liafuan, Na’i, mak lialós tebes;

Hametin ami iha lialós. Refrão

 

Evangelho                                                                                                                                                                                    Jo. 17. 11b-19

Na’i Jesus Cristo nia Evangelho nu’udar São João haktuir:

Iha tempo nebá: Jesus foti matan ba Lalehan, harohan nune’e: “Aman Santo, hodi Ita naran tau matan ba sira nebé Ita haraik mai Ha’u, atu sira sai ida de’it nu’udar Ita mós ida de’it. Wainhira Ha’u sei hôrik ho sira, Ha’u rasik tau matan ba sira hodi Ita naran. Ha’u tau matan duni ba sira nebé Ita haraik mai Ha’u. Sira ida la lakon; lakon de’it mak ema-oan-áat; nune’e mai sai tuir lolós Escritura. Maibé, oras ne’e, Ha’u atu fila daudaun ona ba Ita. Sira sei iha mundo rai-klaran, Ha’u dehan sai ona ida ne’e, atu sira bele hetan Ha’u nia ksolok to’o rohan. Ha’u fó hatene sai ona ba sira Ita liafuan. Mundo hakribi sira, tan sira la’os mundo nia emar, nu’udar Ha’u mós la’os mundo nia emar. Ha’u la husu Ita hasai sira housi mundo, maibé Ha’u husu de’it atu soi netik sira housi áat na’in. Sira la’os mundo nia emar, nu’udar Ha’u mós la’os mundo ninian. Halulik sira iha lialós. Ita nia liafuan mak lialós. Nu’udar Ita haruka Ha’u mai iha mundo, nune’e mós Ha’u haruka sira ba mundo. No tanba sira mak Ha’u halulik-An, atu sira mós bele halulik-an iha lialós”.

Lia Maksoyn.

Leave a Reply

Your email address will not be published. Required fields are marked *