shadow
Diocese de Dili > NOTÍCIAS > LETURA DIÁRIA > Quinta-Feira, VII Semana da Páscoa (ANO C)

Quinta-Feira, VII Semana da Páscoa (ANO C)

Primeira Leitura                    22, 30. 23,-11

Lia housi livro Apóstolo sira nia hahalok:

Iha loron hirak nebá, tríbuno hakarak hatene lolós lia kesar be hasouru Paulo housi Judeu sira; nia haruka hasai tiha Paulo housi kadeia, haruka amululik boot ho assembleia sira atu halo reunião. Hafoin lori Paulo hodi hatudu ba sira. Paulo hare katak sira balu mesak ema saduceu no balu ema fariseu, ho lian makaas nia hakilar dehan: “Maun-alin sira, ha’u ema fariseu, ema fariseu sira nia oan. Tan ami nia esperança no tan moris hias housi mate sira leet mak oras ne’e, ha’u atu ba simu julgamento.” Uainhira nia hateten tiha lia hirak ne’e, ema fariseu no saduceu sira hahu haksesuk malu, no assembleia hafahe tiha ba grupo rua. Saduceu sira katak la iha moris hias housi mate, la iha Anjo no espirito; maibé, sira housi grupo fariseu nian, sira fo sasin hateten katak, buat hirak ne’e, sei mosu iha loron ikus. Escriba sira housi grupo fariseu nian, ho hakilar dehan: “Ami la hetan sala ida iha ema ne’e! Espirito ruma ou Anjo ruma ko’alia ho nia karik”. Tan sira haksesuk malu liu tan, tríbuno ta’uk katak sira sei halo buat aat ruma hasouru Paulo. Ne’e duni, nia haruka soldado sira lori tiha Paulo housi sira leet hodi ba tiha iha fortaleza. Iha kalan tuir mai, Na’i mosu ba Paulo hodi dehan; “Aten barani ba! Hanesan sasin nebe ó fo sai ona kona ba Ha’u iha Jerusalém, nune’e mos ó sei fo sai iha Roma.”

Maromak Futar Lia.

 

Salmo Responsorial                                                                                                                       15 (16), 1-2a. 5. 7-8. 9-10. 11 (R. 1ª)

Refrão :  Na’i, tahan ha’u tan Ita ha’u heli-an-fatin!!! Repete-se

Ou              Aleluia!

Tahan ha’u, Na’i, tan Ita ha’u nia heli-an-fatin,

Ha’u dehan ba Na’i, “Ita ha’u nia Maromak”.

Na’i, Ita ha’u nia lima-rohan no cálice,

Ha’u nia moris iha Ita futar liman. Refrão

 

Ha’u sei hahi Na’i tan Nia mak ha’u Mahein;

Iha kalan Nia fo conselho mai ha’u neon.

Na’i iha nafatin ha’u matan nia oin,

Nia iha ha’u sorin kuana, ha’u sei la monu. Refrão

 

Tan ne’e, ha’u fuan haksolok,

Ha’u klamar hananu ho ksolok boot,

No ha’u isin toba hakmatek.

Tan Ita sei la saran ha’u ba horik fatin mate nian,

Sei la husik Nia atan nia isin dodok. Refrão

 

Na’i hatudu dalan moris nian mai ha’u,

Haraik ksolok boot iha Ita futar oin;

Iha Ita sorin kuana, haksolok ba nafatin. Refrão

 

Aclamação                                                                                                                                                                                           Jo. 17. 21

Refrão : Aleluia, Aleluia Repete-se

Aman, sira hotu sai ida de’it hanesan Ita iha Ha’u no Ha’u iha sira,

atu nune’e mundo sei hatene katak Ita mak haruka Ha’u mai. Refrão

 

Evangelho                                                                                                                                                                                    Jo. 17. 20-26

Na’i Jesus Cristo Nia Evangelho nu’udar São João haktuir:

Iha tempo nebá, Jesus foti matan ba Lalehan,  hodi harohan nune’e:  “Aman Santo, Ha’u la harohan de’it ba escolante sira ne’e, maibé, Ha’u harohan mos ba sira nebe sei fiar Ha’u, tan sira ne’e nia liafuan, atu sira hot-hotu sai ida de’it. Ha’u Aman, nu’udar Ita horik iha Ha’u, Ha’u horik iha Ita, nune’e mos, sira horik iha Ita rua, atu mundu fiar katak Ita mak haruka Ha’u mai.  Ha’u fo ona ba sira naran boot nebe Ita fo mai Ha’u, atu sira sai ida de’it, nu’udar Ita rua ida de’it atu Ha’u horik iha sira, Ita horik iha Ha’u no sira sai laran ida de’it atu nune’e mundu sei hatene katak Ita mak haruka Ha’u mai no Ha’u hadomi sira nu’udar Ita hadomi Ha’u rasik.  Ha’u Aman, sira nebe Ita fo mai Ha’u, Ha’u hakarak atu iha fatin nebe Ha’u hela ba, sira mos hela hamutuk ho Ha’u.  Ha’u hakarak atu sira hare Ha’u Nia naran  boot,  naran nebe Ita fo ona mai Ha’u, tan Ita hadomi Ha’u molok atu hakiak mundu. Ha’u Aman Santo, mundu la hatene Ita, maibe Ha’u hatene ona Ita no sira ne’e hatene ona katak Ita mak haruka Ha’u mai. Ha’u halo sira hatene Ita nia naran.  Ha’u sei halo sira hatene liu tan Ita naran atu sira bele hadomi Ita nu’udar Ita hadomi Ha’u, atu Ha’u horik iha sira.”

Lia Maksoyn.

Leave a Reply

Your email address will not be published. Required fields are marked *