shadow
Diocese de Dili > NOTÍCIAS > LETURA DIÁRIA > Terça – Feira, VII Semana da Páscoa (ANO C)

Terça – Feira, VII Semana da Páscoa (ANO C)

Primeira Leitura                      Act. 20. 17.27

Lia housi livro Apóstolo sira nia hahalok:

Iha loron hirak nebá, housi Mileto, Paulo haruka bolu katuas sira housi Kreda  iha Éfesu. Wainhira sira to’o mai, nia dehan ba sira:

“Imi hatene, hanesan iha loron ba dala uluk nebé ha’u tau ain iha Ásia, ha’u serbisu hamutuk ho imi nafatin. Ho haraik-an ha’u serbí Maromak, hodi mata-wen no terus mak ha’u simu buat áat housi Judeu sira be laran makerek. Tebes duni, ha’u seida’uk lakon tempo nebé di’ak atu halo buat ruma di’ak ba imi. Buat hotu ha’u fó sai no hanourin ba imi iha ema hotu nia oin housi uma ba uma. Ha’u hakaas’an nafatin to’o oras ne’e hodi hanourin Judeu no Grego sira atu fila ba Maromak hodi fiar iha Na’i Jesus.

Maibé oras ne’e, tan Espírito haruka ha’u, ha’u a Jerusalém, ho neon sala hodi la hatene sá mak sei mosu mai ha’u iha nebá. Ha’u hatene de’it katak housi cidade ba cidade, Espírito Santo fó hatene ona katak, buat nebé sei mosu mai ha’u mak kadeia no terus. Maibé, ha’u sei la buka ksolok ba ha’u nia moris; ha’u buka de’it atu remata ha’u nia serbisu nebé simu housi Na’i Jesus: fó sasin ba Lia-Foun ho Maromak Nia graça.

Oras ne’e imi haré bá! Ha’u hatene katak imi hotu nebé ha’u liu ona fila-fila iha imi nia leet hodi hanourin Maromak Nia Reino, imi sei la haré tan ona ha’u. Tan ne’e, ha’u hateten tebes ba imi katak houri ohin ba oin, ha’u la iha ona buat ida ho imi kona ba imi ruma be lakon. Basá ha’u hanourin ho laran tomak buat hotu nebé imi sei halo atu bele moris tuir Maromak Nia hakaran”.

Maromak Futar Lia.

 

Salmo Responsorial                                                                                                                          Sal. 67(68). 10-11, 20-21 (R. 33ª)

Refrão : Povo rai-klaran, hananu ba Na’i!!! Repete-se

Ou           Aleluia!

Oh Maromak, Ita haraik ona udan graça nian,

Haraik di’ak ba Ita rain bé susar.

Maromak, Ita família hetan ona hôrik fatin,

Nebé Ita laran luak, hadi’a hela ba kiak sira. Refrão

 

Rahun di’ak ba Na’i, loron ba loron,

Maromak ita Maksoyn hamutuk ho ita.

Ita nia Maromak, Maromak be soi;

Na’i soi ita housi mate. Refrão

 

Aclamação                                                                                                                                                                                           Jo. 14. 16

Refrão : Aleluia, Aleluia!! Repete-se

Ha’u sei harohan ba Aman no Nia sei fó ba imi

Espírito Santo atu hela nafatin ho imi. Refrão

 

Evangelho                                                                                                                                                                                       Jo. 17. 1-11ª

Na’i Jesus Cristo nia Evangelho nu’udar São João haktuir:

Iha tempo nebá, Jesus foti matan ba Lalehan, dehan: “Ha’u Aman, oras to’o ona; hahí Ita oan, atu Ita oan hahí Ita tuir kbiit nebé Ita haraik ba Nia boot liu criatura tomak; hodi Nia, ema hotu nebé Ita tau iha Nia liman sei hetan moris rohan laek, atu ema hatene Ita, Maromak lós, Mesak de’it ho Ida nebé haruka mai, Jesus Cristo. Ha’u hahí Ita iha rai, hodi to’o rohan buat nebé Ita haruka halo”.

“Oras ne’e, Ha’u Aman, hahí fali Ha’u, hamutuk ho Ita ho kbiit ida nebé Ha’u iha uluk ho Ita, molok mundo ne’e mosu mai. Ha’u haklaken Ita naran ba ema nebé Ita haraik mai iha mundo. Sira Ita Nian, maibé Ita fó mai Ha’u; sira halo tuir Ita Nia liafuan. Oras ne’e sira hatene katak buat hotu nebé Ha’u simu, mai housi Ita; tan Ha’u haklaken liafuan nebé Ita fó mai Ha’u. Sira simu ona lia hirak ne’e; sira hatene duni katak Ha’u mai housi Ita; sira fiar mós katak Ita haruka Ha’u mai. Ha’u harohan ba sira; Ha’u la harohan ba mundo, maibé ba sira nebé Ita haraik mai Ha’u, tan sira Ita nian. Buat hotu nebé Ha’u nian, mai housi Ita; buat hotu nebe Ita Nian, Ha’u nian mós; iha buat sira ne’e, Ha’u simu hahí tomak. Maibé sira sei hela iha mundo wainhira Ha’u ba hasouru Ita”.

Lia Maksoyn.

Leave a Reply

Your email address will not be published. Required fields are marked *