shadow
Diocese de Dili > NOTÍCIAS > LETURA DIÁRIA > Sábado, VII Semana da Páscoa (ANO C)

Sábado, VII Semana da Páscoa (ANO C)

Primeira Leitura                28, 16-20. 30-31

Lia housi livro Apóstolo sira nia hahalok:

wainhira  ami to’o iha Roma ho Paulo be dadur hela, sira fo fatin ida ketak ba nia, ho soldado ida hein nia. Liu tiha loron tolu, Paulo bolu ulun sira Judeu nian, no wainhira sira halibur hotu, nia dehan ba sira: “Maun-alin sira, ha’u la halo buat ida hasouru povo eh hasouru lisan housi ita bei-ala sira nian; maibé sira ka’er ha’u iha Jerusalém hodi lori ha’u ba saran iha romano sira liman. Sira ne’e husu tuir ha’u hodi hare ha’u katak ha’u la iha sala atu simu mate, sira hakarak atu husik tiha ha’u, maibé ema Judeu sira la kohi. Tan ne’e, sira obriga ha’u apela ba Imperador César, maibé ha’u la halo buat ida hasouru ha’u rain. Tan ne’e, mak ha’u husu atu hasouru malu ho imi hodi ko’alia ho imi, basá tan de’it povo Israel nia esperança mak oras ne’e ema tau korenti iha ha’u liman no ain”.

Paulo hela iha uma nebe nia aluga ho nia osan rasik iha tinan rua nia laran. Lor-loron iha nia fatin, nia simu sira nebe buka nia. Ba sira, nia haklaken Maromak Nia Reino hodi hanourin buat nebe hateten kona ba Na’i Jesus Cristo, ho matenek no kbiit tomak.

Maromak Futar Lia.

 

Salmo Responsorial                                                                                                                                    Sal. 10(11). 4, 5, 7 (R. cf. 7b)

Refrão : Ema laran mos sei hare Maromak. Repete-se

Ou            Aleluia!

Na’i horik iha Nia templo Santo,

Iha Lalehan, Na’i hari Nia trono;

Nia hamatan nafatin ba mundu rai-klaran,

Nia matan hare borus ema hotu nia fuan. Refrão

 

Na’i tulun ema sala la’ek,

Fo kastigu ba ema maksalak,

Be ema aat nia belun, basá Na’i justo no hadomi justisa,

Ema santo sira hanoin Nia futar oin. Refrão

 

Aclamação                                                                                                                                                                                       Jo. 16. 7, 13

Refrão : Aleluia, Aleluia!! Repete-se

Na’i dehan:  “Ha’u sei haruka Espirito lialos nian mai.

Nia sei hanourin lialos hotu ba imi”. Refrão

 

Evangelho                                                                                                                                                                                     Jo. 21. 20-25

Na’i Jesus Cristo Nia Evangelho nu’udar São João haktuir:

Iha tempo nebá, Pedro la’o tuir daudaun Jesus, wainhira nia fila ba kotuk, hare tuir sira, escolante nebé Jesus hadomi. Ida ne’e duni, uainhira iha Ceia, hakru’uk ba Jesus Nia hirus matan hodi husu ba Nia: “Na’i, se lós atu ba saran Ita?” Hare tiha nia, Pedro dehan ba Jesus: “Nia ne’e, Na’i?”  Jesus hatan ba nia: “Ha’u hakarak karik, nia bele hela to’o loron nebe Ha’u fila hias mai, ó iha buat ruma ho ne’e? Ó tuir Ha’u mai”. Nune’e, hahu namkari novidade katak escolante ne’e sei la mate. Maibé, Jesus la dehan ba Pedro: “Nia la mate”, maibé: “Ha’u hakarak karik, nia bele hela to’o loron nebe Ha’u fila hias mai, ó iha buat ruma ho ne’e?”

Escolante ida ne’e mak fo sasin kona ba buat hirak ne’e, nia mak hakerek buat hirak ne’e hotu; no ami hatene katak nia sasin mak los liu. Jesus halo tan buat ua’in seluk. Buat hirak ne’e ida-idak hakerek hotu karik, ha’u hanoin, iha mundu la hetan fatin atu halot livro sira nebe hodi hakerek sasan hirak ne’e ba.

Lia Maksoyn.

Leave a Reply

Your email address will not be published. Required fields are marked *