shadow
Diocese de Dili > NOTÍCIAS > LETURA DIÁRIA > Sexta – Feira, X Semana Tempo Comum (ANO C)

Sexta – Feira, X Semana Tempo Comum (ANO C)

Primeira Leitura                       2Cor. 4. 7-15

Lia housi São Paulo nia segunda Surat ba sarani sira iha Corinto:

Maun alin sira: Maibé ita rai hela rikusoi ne’e iha sanan rai nia laran, atu kbiit maka’as bele mosu nu’udar Maromak nian, la’os ita nian.

Ami terus oi-oin, maibé ami bele book-an; ami hanoin la to’o, maibé la lakon aten barani; ema fó terus ami, maibé Na’i la husik ami; ema baku ami to’o monu ba rai, ami la rahun áat; ami lori nafatin iha ami nia isin Jesus nia mate, atu Jesus nia moris bele hatudu-an iha ami nia isin. Basá wainhira sei moris, ema saran ami bei-beik ba mate tan Jesus nia moris bele hatudu-an iha ami nia isin nebé la mate.

Nune’e, mate book-an nafatin iha ami, maibé moris iha imi. Ne’e duni, tan ita iha espírito fiar nian hanesan de’it, tuir buat nebé hakerek tiha, “Ha’u fiar, tan ne’e ha’u ko’alia”, ami mós fiar tan ne’e ami ko’alia, hodi hatene katak Ida nebé halo Jesus moris hi’as, sei halo ita mós moris hi’as no tau ami hamutuk ho imi iha Nia futar oin. Tebes duni, buat hotu halo tiha ba imi nia di’ak, atu graça barak nebé haraik tiha ba ema wa’in be wa’in bele halo ema fó agradece liu tan ba Maromak nia glória.

Maromak Futar Lia.

 

Salmo Responsorial                                                                                                                         Sal. 115(116). 10-11, 15-18 (R. 17ª)

Refrão : Na’i, ha’u sei hasa’e sacrifício hahí nian ba Ita!!! Repete-se

Ou           Aleluia!!

Ha’u laran metin nafatin iha Na’i, maski ha’u dehan:

“Ha’u, ema ida iha susar laran!”

Iha susar laran ha’u dehan teni:

“Iha ema, buat di’ak la iha, selaé bosok”. Refrão

 

Iha Na’i futar oin, folin tebes duni

Nia belun sira nia mate.

Na’i, ha’u Ita atan, Ita atan feto nia oan,

Ita silu tohar ha’u besi-dadur . Refrão

 

Ha’u sei hasa’e ba Ita sacrifício hahí nian,

Hodi bolu Ita naran.

Ha’u sei halo tuir duni ha’u lia hakotu ba Na’i,

Iha povo hotu nia oin. Refrão

 

Aclamação                                                                                                                                                                                  F1. 2. 15d, 16ª

Refrão : Aleluia, aleluia!! Repete-se

Imi sei sai nabilan hanesan fitun sira iha mundo,

Hodi haklaken liafuan moris nian. Refrão

 

Evagelho                                                                                                                                                                                         Mt. 5. 27-32

Na’i Jesus Cristo nia Evangelho nu’udar são Mateus haktuir

Iha tempo neba, Jesus lia tun ba escolante sira: “Imi rona dehan ba bei-ala sira nune’e: ‘Keta halo adultério’. Maibé, Ha’u dehan ba imi: Ema nebé kaan hateke ba feto ida, nia halo sala ho feto ne’e iha nia laran. Ó nia matan lós dada karik ó ba sala, fokit sai tiha nia, sóe ba dook; di’ak liu ó lakon ó nia matan ida; keta halo be, ho ó nia isin lolon tomak, monu ba inferno. Ó nia liman lós mak dada karik ó ba sala, tesi tiha nia sóe ba dook; di’ak liu lakon ó nia liman ida; keta halo be, ho ó nia isin lolon tomak, monu ba inferno. Mós ema dehan: ‘Fó surat sóe malu nian ba ema nebé sóe nia féen’. Maibé, Ha’u dehan ba imi: La’os tanba halo sala fo’er mak ema ruma sóe karik nia féen, nia halo sala adultério. Ema nebé káben ho feto ema sóe, nia halo adultério”.

Lia Maksoyn.

Leave a Reply

Your email address will not be published. Required fields are marked *