shadow
Diocese de Dili > NOTÍCIAS > LETURA DIÁRIA > XI DOMINGO, SOLENIDADE DA SANTISSIMA TRINDADE (ANO C)

XI DOMINGO, SOLENIDADE DA SANTISSIMA TRINDADE (ANO C)

Primeira  Leitura                     Prov. 8, 22-31

Lia housi Livro Provérbios nian:

Na’i haki’ak ha’u uluk liu, hahú kedas housi hun, molok atu haki’ak buat ida. Housi uluk liu, Na’i haki’ak nanis ha’u, hahú kedas housi hun, molok atu haki’ak mundo rai-klaran. Na’I hanoin tiha ona ha’u, maske rai-horun sira la dauk iha, wé-matan sira ladauk suli. Ha’u moris mai, foho sira ladauk hatur-an iha sira nia fatin, foho oan sira mós ladauk iha, mundo, rai-klés, rai horun oan ida mós ladauk iha. Wainhira na’i hatur sei hátur daudaun lalehan, ha’u iha nanis ona nebá; Wainhira na’i sei harí hela rai-horun nia rohan, wainhira nia sei hametin hela kalohan sira iha leten, wainhira nia sei hadia hela wé-matn sira iha rai-okos, wainhira nia haketak daudaun tasi, atu wé sira labele hakat liu sira fatin, wainhira nia sei hátur hela rai nia hun, ha’u horik nanis ona ho nia nu’udar bada’en-mestre. Lor-loron ha’u haksolok, horik nafatin iha na’i nia sorin, hodi halimar iha rai klaran nia fohon; Ha’u nia ksolok boot liu mak hela ho ema oan sira.

Maromak Futar Lia.

 

Salmo Responsorial                                                                                                                                                     Sal. 8, 4-5. 6-7. 8-9

Refrão : Ha’u sei hahí Na’i Maromak iha mundo rai-klaran!!! Repete-se

Housi Maromak nia liman, mosu lalehan,

Fitun no fulan Maromak halo.

Maromak hanoin nafatin ema,

Tahan kalan loron ita ema. Refrão

 

Halo ema atu hanesan Anjo,

Tau kbiit ba liman, neon ba matenek.

Halo ema ukun sasán tomak,

Halo nia matenek liu sasán hotu. Refrão

 

Ukun balada maus iha rai-klés,

Balada fuik iha ai-laran.

Ukun manu iha lalehan,

Ukun ikan iha tasi. Refrão

 

Segunda Leitura                                                                                                                                                                            Rom. 5, 1-5

Lia housi São Paulo nia surat ba sarani sira iha Roma:

Maun-alin sira: Hodi fiar ita hetan ona moris santo, tan ne’e, ita hetan paz ho Maromak hodi Na’i Jesus Cristo. Kmanek ida ne’e, ita hetan duni housi fiar, tan Jesus Cristo. Kmanek ne’e mak halo ita santo nafatin, halo ita bele hahí-an hodi hein ho laran metin Na’i  Maromak nia glória. Maibé, laós mak ne’e de’it: Ita hahí-an mos iha ita nia susar laran, tan ita hatene katak susar fo paciência, paciencia fó kbiit maka’as nafatin, kbiit maka’as fó laran metin, laran metin la bosok ita, basá, Maromak tan Nia domin maka’as iha ita laran, tan Espírito Santo, Espírito nebé ita simu tiha ona.

Maromak Futar Lia.

 

Aclamação                                                                                                                                                                                          Apoc. 1, 8

Refrão :  Aleluia, aleluia!!! Repete-se

Glória ba Aman, ba Oan no ba Espírito Santo:

Hakmanek sira neon no laran hodi ita nia kmanek. Refrão

 

Evangelho                                                                                                                                                                                      Jo. 16, 12-15

Na’i Jesus Cristo nia Evangelho un’udar São João haktuir:

lha tempo nebá, Jesus lia tun ba Nia escolante sira dehan: “Ha’u sei iha tan buat barak atu hateten ba imi, maibé, oras ne’e, imi nia neon sei la to’o atu hatene lolós. To’o tiha mai Espírito lialós nian, Nia sei hanourin lialós tomak ba imi; Basá, Nia sei la ko’alia hodi Nia naran rasik, maibé, Nia sei ko’alia kona ba buat hotu nebé Nia rona; Nia sei fo hatene ba imi buat nebé aban bain-rua sei mosu. Nia sei hahí Ha’u, basá, Nia sei simu Ha’u nia lia-fuan atu hanourin imi. Ha’u Aman nia sasán tomak, Ha’u nian mos. Ne’e duni, Ha’u dehan ona ba imi katak, Nia sei simu Ha’u nia lia-fuan atu hanourin imi.”

Lia Maksoyn.

Leave a Reply

Your email address will not be published. Required fields are marked *