shadow
Diocese de Dili > NOTÍCIAS > LETURA DIÁRIA > Segunda – Feira, XI Semana Tempo Comum (ANO C)

Segunda – Feira, XI Semana Tempo Comum (ANO C)

Primeira Leitura                        2Cor. 6. 1-10

Lia housi São Paulo nia segunda Surat ba sarani sira iha Corinto:

Maun-alin sira; Hodi serbisu hamutuk, ami husu imi maka’as atu la bele simu Maromak nia graça leet de’it. Basá Nia dehan, “Iha tempo di’ak ida, Ha’u rona imi, no iha loron maksoyn, Ha’u fó tulun ba imi”. Haré ba, ohin mak tempo di’ak ne’e; haré ba, ohin mak loron maksoyn. Ami la halo ema ida sidi kona ba buat ruma, atu nune’e ema ida la bele hetan buat áat hasouru ami kona ba ami nia knar; maibé iha buat hotu, ami hatudu ami an nu’udar Maromak nia emar, hodi tahan susar sira, iha terus, moris todan, ema la husik ami book an, ama baku ami, tau ami iha dadur laran, ema lubun boot hasouru ami, iha serbisu todan, la toba iha kalan, la han; ho laran mós, ho matenek, ho paciência no laran maus, ho Espírito nebé Santo, ho domin nebé la bosok, hodi ko’alia lolós, iha Maromak nia kbiit; ho kilat laran lós nian iha kuana no iha karuk, wainhira ami simu naran boot no wainhira ema hamoe ami, wainhira ema hasara ami no mós wainhira ema hahi ami. Ema trata ami hanesan ema nebé bosok, maibé ami la bosok ida; hanesan ema la hatene ami, maibé ema seluk simu ami; hanesan ami atu mate, maibé ami moris maka’as; hanesan ema fó kastigu, maibé ema la oho; hanesan ema laran susar, maibé ami haksolok nafatin; hanesan ema kiak ida, maibé ami halo ema barak sai riku; hanesan ema nebé la iha buat ida, maibé ami iha buat hotu.

Maromak Futar Lia.

 

Salmo Responsorial                                                                                                                                              Sal. 97(98). 1-4 (R. 2ª)

Refrão : Na’i, hatudu Nia maksoyn!!! Repete-se

Hananu ba Na’i knananuk foun ida,

Basá Nia halo buat mesak kmanek.

Nia futar liman lós manan funu;

Manan ho Nia futar liman Santo. Refrão

 

Na’i fó hatene Nia maksoyn;

Nia hatudu justice ba nação sira hotu.

Nia hanoin Nia domin no laran lós,

Ba Israel uman. Refrão

 

Rai-ikun rai-ulun sasin,

Maksoyn Ita Maromak Nian.

Rai tomak haklaken Na’i,

Haklalak ho haksolok no hananu. Refrão

 

Aclamação                                                                                                                                                                           Sal. 118(119). 105

Refrão : Aleluia, Aleluia!! Repete-se

Na’i, Itaboot nia liafuan mak ahi oan mai

Ha’u nia ain fatin, roman ba ha’u nia dalan. Refrão

 

Evangelho                                                                                                                                                                                      Mt. 5. 38-42

Na’i Jesus Cristo nia Evangelho nu’udar São Mateus haktuir:

Iha tempo nebá, Jesus lia tun ba escolante sira: “Imi rona ema uluk dehan: ‘Matan selu ho matan, nehan selu ho nehan’. Maibé Ha’u dehan ba imi: ‘Keta simu hasouru ema áat. Ema ruma basá karik ó nia hasan lós, sée tan ó nia hasan karuk ba nia. Ema ruma hakarak haksesuk malu ho ó atu hadau ó nia faru karik, fó tan ó nia tais ba nia. Ema ruma obriga karik ó atu la’o kilometro ida, la’o ho nia kilometro rua ba. Fó ba ema nebé husu, keta fila kotuk ba ida nebé hakarak impresta buat ruma”.

Lia Maksoyn.

Leave a Reply

Your email address will not be published. Required fields are marked *