shadow
Diocese de Dili > NOTÍCIAS > LETURA DIÁRIA > Terça – Feira, XI Semana Tempo Comum (ANO C)

Terça – Feira, XI Semana Tempo Comum (ANO C)

Primeira Leitura                         2 Cor. 8. 1-9

Lia housi São Paulo nia segunda Surat ba sarani sira iha Corinto:

Maun-alin sira; Ami hakarak imi hatene kona ba Maromak nia graça nebé haraik tiha ona ba Kreda sira iha Macedónia, basá wainhira Maromak koko sira ho terus boot, sira nia ksolok naresin no sira hatudu katak maski sira kiak, sira laran luak teb-tebes. Tuir sira nia kbiit, ha’u bele fó sasin, no liu fali sira nia kbiit, ho laran, sira husu ami maka’as atu sira bele halo parte iha serbisu ba santo sira, no ida ne’e, la’os nu’udar ami hanoin, maibé sira saran sira nia an ba Na’i no ba ami housi Maromak nia hakarak, tan ne’e, ami husu Tito atu, nu’udar nia hahu ona, nia remata mós ba imi ho hahalok kmanek ida ne’e. Ne’e duni, nu’udar imi di’ak liu iha buat hotu: iha fiar, iha liafuan, iha matenek, iha laran manas, no iha domin nebé imi hadomi ami, ha’u hein mós katak imi sei sai di’ak liu kona ba serbisu ida ne’e.

Ha’u dehan ne’e la’os hodi haruka, maibé atu koko omo nia domin lós ka lae, wainhira imi hanoin ema seluk sira. Basá imi hatene ita Na’i Jesus Cristo nia graça, katak, tan imi, Nia halo an kiak maski Nia riku, atu housi nia kiak, imi bele sai riku.

Maromak Futar Lia.

 

Salmo Responsorial                                                                                                                             Sal. 145(146). 1-2, 5-9ab (R. 2ª)

Refrão : Ha’u klamar, hahi Na’i ba!!! Repete-se

Ou           Aleluia!!

Ha’u klamar, hahi Na’i ba,

Ha’u sei hahi Na’i iha moris tomak.

Wainhira ha’u moris,

Ha’u sei hananu ba ha’u nia Maromak. Refrão

 

Rahun di’ak ba ema nebé hetan

Tulun housi Jacob nia Maroma;

Tau laran metin iha Na’i,

Nia Maromak, nebé hakiak lalehan no rai,

Tasi no buat hotu nebé moris iha nia. Refrão

 

La haluha Nia liafuan ba nafatin,

Nia halo justiça ba sira be ema hanehan;

Haraik aihan ba sira be hamlaha. Refrão

 

Na’i haraik liberdade ba sira be iha dadur;

Na’i halo matan-delek sira haré,

Na’i tahan sira be kbiit laek. Refrão

 

Na’i hadomi sira be laran mós;

Na’i souri ema la’o lemo rai,

Tau matan ba oan kiak no feto faluk sira. Refrão

 

Aclamação                                                                                                                                                                                           Jo. 13. 34

Refrão : Aleluia, Aleluia!! Repete-se

Na’i dehan: Ha’u fó ba imi mandamento foun:

Imi sei hadomi malu nu’udar Ha’u hadomi imi. Refrão

 

Evangelho                                                                                                                                                                                      Mt. 5. 43-48

Na’i Jesus Cristo nia Evangelho nu’udar São Mateus haktuir:

Iha tempo nebá, Jesus lia tun ba escolante sira: “Imi rona sáida mak ema dehan ba bei-ala sira: ‘Ó hadomi ó nia maluk, rai kuna hasouru ó nia funu baluk’. Maibé, Ha’u dehan ba imi: “Hadomi imi nia funu baluk sira; harohan ba ema sira nebé duni imi atu imi bele sai oan ba Aman nebé iha Lalehan. Nia halo Loro mosu ba ema di’ak no ba ema áat; Nia haruka udan ba ema laran mós no ba ema sala-na’in. Imi hadomi karik ema nebé hadomi imi, sá prémio imi bele simu? Ema publicano sira mós la halo hanesan ne’e? Imi cumprimento de’it karik imi nia maun-alin sira, imi halo buat foun sáida? Ema gentio sira mós la halo hanesan ne’e? Ne’e duni, imi buka sai ema di’ak, hanesan imi nia Aman Lalehan di’ak”.

Lia Maksoyn.

Leave a Reply

Your email address will not be published. Required fields are marked *