shadow
Diocese de Dili > NOTÍCIAS > LETURA DIÁRIA > Quarta – Feira, XI Semana Tempo Comum (ANO C)

Quarta – Feira, XI Semana Tempo Comum (ANO C)

Primeira Leitura                   2Cor. 9. 6-11

Lia housi São Paulo nia segunda Surat ba sarani sira iha Corinto:

Maun-alin sira: Hanoin ida ne’e ba: Ema nebé kari uitoan sei ko’a mós uitoan, no ema nebé kari barak sei ko’a mós barak. Ida-idak sei halo nu’udar nia decide ona, la hodi laran susar ka obriga an, basá Maromak hadomi ema nebé fó ho laran haksolok. No mós, Maromak bele halo presente ida-idak sai barak liu tan ba imi, nune’e iha buat hotu, buat nebé imi precisa iha nafatin; no iha imi buat barak ba hahalok dia’k hotu. Nu’udar hakerek tiha, “Nia kari sai, nia fó ba ema kiak sira; nia laran lós tahan ba nafatin”.

Ida nebé fó fini ba to’os na’in no pão atu han sei fó no haua’in imi nia fini no halo barak imi laran lós nia fuan. Imi sei sai riku iha buat hotu tan imi nia laran luak, nebé housi ami ema sei fó obrigado ba Maromak.

Maromak Futar Lia.

 

Salmo Responsorial                                                                                                                                        Sal. 111(112). 1-4, 9 (R. 1ª)

Refrão : Ksolok ba ema nebé hein iha Na’i!!! Repete-se

Ksolok ba ema nebé hamta’uk Na’i,

No hadomi tebes Nia ukunfuan.

Nia bei-oan sira sai kbiit-na’in iha rai,

Derasaan ema laran lós nian hetan bensa wa’in. Refrão

 

Iha nia uma, iha aihan no riku-soin wa’in,

Ema sei la haluha nia laran di’ak.

Nia nabilan ba ema lós sira

Nu’udar naroman iha nakukun,

Nia laran mós, laran-luak no laran di’ak. Refrão

 

Nia fahe nia riku-soin ba kiak sira;

Nia laran di’ak sei hela metin nafatin,

Ho barani, nia foti ulun. Refrão

 

Aclamação                                                                                                                                                                                           Jo. 14. 23

Refrão : Aleluia, Aleluia!! Repete-se

Na’i dehan: Ema nebé hadomi Ha’u, sei halo tuir Ha’u nia liafuan;

Ha’u Aman sei hadomi nia, Ami sei mai hela ho nia. Refrão

 

Evangelho                                                                                                                                                                               Mt. 6. 1-6, 16-18

Na’i Jesus Cristo nia Evangelho nu’udar São Mateus haktuir:

Iha tempo nebá, Jesus lia tun ba escolante sira: “Haré katak imi la halo buat di’ak iha ema sira oin atu sira haré imi. Imi halo nune’e karik, imi sei la simu imi nia kolen housi imi nia Aman Lalehan. Ne’e duni, wainhira ó fó esmola, keta huu karau dikur iha ó nia oin, hanesan ema laran makerek sira halo iha sinagoga ka iha dalan atu ema hahi sira. Tebes, Ha’u dehan ba imi, sira simu ona sira nia kolen. Maibé, wainhira ó fó esmola, o nia liman karuk la bele hatene ó nia liman lós halo sá, atu ema ida la bele hatene ó nia esmola, no ó nia Aman nebé haré buat subar, sei fó ó nia kolen”.

“Wainhira imi reza, keta halo hanesan ema laran makerek sira nebé hakarak harohan hodi hamriik iha sinagoga sira no iha praça. Tebes, Ha’u dehan ba imi, sira ne’e simu ona sira nia kolen. Maibé, wainhira ó harohan, tama iha ó nia quarto laran, taka odamatan hodi harohan sub-subar ba ó nia Aman, basá Nia nebé haré buat nebé subar, sei fó ó nia kolen.

“Wainhira imi hadera an, keta oin nakraik, hanesan ema laran makerek sira, nebé halo sira oin la di’ak atu ema haré katak sira hadera an. Tebes, Ha’u dehan ba imi katak ema sira ne’e simu ona sira nia kolen. Maibé wainhira ó hadera an, tau mina morin ba ó ulun, no fase ó nia oin, atu ema la bele hatene katak ó hadera an; ó nia Aman de’it nebé subar hela mak hatene; nune’e ó nia Aman, nebé haré buat nebé naksubar, sei fó ó nia kolen”.

Lia Maksoyn.

Leave a Reply

Your email address will not be published. Required fields are marked *