shadow
Diocese de Dili > NOTÍCIAS > LETURA DIÁRIA > Quinta – Feira, XI, SANTÍSSIMO CORPO E SANGUE De CRISTO (ANO C)

Quinta – Feira, XI, SANTÍSSIMO CORPO E SANGUE De CRISTO (ANO C)

SOLENIDADE

 

Primeira Leitura                 Gen. 14, 18-20

Lia housi Livro Génesis:

Iha loron hirak nebá, Melquisedec, Liurai Salém, lori pão no tua mai, basá nia Maromak aas liu tomak, Na’ilulik. Nia fó bensa ba Abraão, hodi dehan: “Rahun-diak ba Abraão, housi Maromak aas liu tomak, lalehan ho rai sira nia Na’in. Rahun-di’ak ba Maromak aas liu tomak, tan Nia saran ba ó nia liman, ó nia funu balu sira”. Hafoin, Abraão selu kole ba buat hotu.

Maromak Futar Lia.

 

Salmo Responsorial                                                                                                                                              Sal. 109(110). 1, 2, 3, 4

Refrão : Cristo Na’ilulik ba nafatin!!! Repete-se

Maromak nia lia-fuan ba ha’u Na’in:

“Imi tur iha Ha’u sorin kuanan.

Ha’u seu hanehan ema aat iha ó nia ain okos”. Refrão

 

Na’i sei foti ó liman atu ukun to’o Sião,

Ó sei manán funu-balu sira. Refrão

 

Iha kbiit Liurai, molok ó moris.

Ha’u ko’us ó,

Nu’udar maha-wén taka rai. Refrão

 

Na’i hakotu lia, la fila fali ba kotuk:

Ita mak Na’ilulik ba nafatin,

Tuir Melquisedec nia lian. Refrão

 

Segunda Leitura                                                                                                                                                                    1 Cor. 11, 23-26

Lia housi São Paulo nia Surat ba sarani sira iha Corinto:

Maun-alin sira: Ha’u rasik simu housi Na’i Jesus, lia-fuan nebé ha’u fó hatene ona ba imi: Na’i Jesus, iha kalan molok atu terus, Nia kaer tiha pão, haraik bensa, silu hodi fahe dehan: “Ne’e Ha’u nia Isin nebé sei terus ba imi. Imi halo tuir nune’e hodi hanoin Ha’u”. Nune’e mós, sira han hotu tiha, Jesus foti Kalis dehan: “Tua Kalis ida ne’e, tua moruk foun nian kona ba Ha’u nia Ran; wainhira imi hemu tua Kalis ida ne’e, im halo tuir ne’e hodi hanoin Ha’u”. Wainhira imi han pão ida ne’e, hemu tua kalis ida ne’e, imi fó hatene Na’i nia mate, to’o Nia fila hikas mai.

Maromak Futar Lia.

 

Aclamação                                                                                                                                                                                       Jo. 6, 51-52

Refrão : Aleluia, Aleluia!! Repete-se

Na’i dehan: Ha’u aihan moris tun housi lalehan:

Ema nebé han ai han ne’e sei moris ba nafatin. Refrão

 

Evangelho                                                                                                                                                                                         Lc. 9, 11-17

Na’i Jesus Cristo nia Evangelho nu’udar São Lucas haktuir:

Iha tempo nebá, ema lubun boot hatene tiha katak Jesus hela iha Betsaida, sira ba tuir Nia. Jesus simu duni sira, hodi ko’alia ba sira kona ba Maromak nia Reino. Hafoin Nia fó isin di’ak ba sira nebé hetan moras. Loron monu daudaun ona. Iha oras ne’e sira sanulu resin rua besik ba Jesus hodi dehan: “Ita haruka ema lubun boot ne’e fila ona ba knua, ba uma besik, atu buka ai-han no fatin atu toba, basá, iha ne’e rai fuik”. Maibé Jesus hatán ba sira: “Imi rasik fó han ba sira”. Sira hatán fali: “Ami iha de’it pão fuan lima ho ikan oan rua; ne’e sá, ami ba sosa ai-han ba povo ne tomak!” Ema mane de’it besik rihun lima. Nune’e, Jesus lia tun ba Nia Escolante sira: “Imi haruka sira tur tiha, lima-nulu lima-nulu hamutuk”. Sira halo nune’e duni; sira haruka ema sira ne’e tur tiha hotu. Jesus kaer tiha pão fuan lima ne’e ho ikan rua ne’e, foti matan ba lalehan, haraik bensa ba sira, silu fahe tiha, fó ba Nia Escolante sira, atu fahe ba ema lubun ne’e. Sira hotu han to’o bosu didi’ak. Baluk oan sira nebé resin, Escolante sira halibur hamutuk ba luhu sanulu resin nua nakonu.

Lia Maksoyn.

Leave a Reply

Your email address will not be published. Required fields are marked *