shadow
Diocese de Dili > NOTÍCIAS > LETURA DIÁRIA > Quinta – Feira, XI Semana Tempo Comum (ANO C)

Quinta – Feira, XI Semana Tempo Comum (ANO C)

Primeira Leitura                     2Cor. 11. 1-11

Lia housi São Paulo nia segunda Surat ba sarani sira iha Corinto:

Maun-alin sira: Imi bele de’it tahan ha’u nia beik uitoan! Favor, tahan ha’u ba! Basá ha’u iha laran moras santo kona ba imi, basá ha’u saran tiha imi ba Cristo nu’udar fetoran momós ida ba nia la’en. Maibé ha’u ta’uk katak, nu’udar samea lohi Eva ho nia laran makerek, imi sei la hanoin tan atu saran imi an ba Cristo ho laran mós no laran lós. Basá ema ruma karik mosu ba imi no haklaken Jesus nebé oin seluk housi Ida nebé ami haklaken tiha, ka imi simu karik espírito nebé oin seluk housi ida nebé imi simu tiha, ka Evangelho nebé oin seluk housi ida nebé imi simu tiha ona, imi halo tuir nia lalais de’it. Ha’u hanoin katak ha’u la kiik liu “apóstolo boot sira” iha buat hotu. Maski ha’u la matenek atu ko’alia, ne’e la dehan katak ha’u kuran matenek; iha buat hotu ami hatudu momós tiha buat ne’e ba imi.

Ha’u sala ka wainhira ha’u haraik an atu imi bele foti an, basá ha’u haklaken Evangelho hodi husu la husu imi atu selu osan? Ha’u husu Kreda sira seluk hodi simu tulun housi sira atu ha’u bele serbi imi. No wainhira ha’u iha imi leet no kuran sasan sira, ha’u la hatodan imi, basá maun alin sira housi Macedónia fó buat nebé ha’u kuran. Nune’e ha’u la hatodan no sei la hatodan imi iha buat hotu. Hodi Cristo nia lialós nebé ha’u iha, ema Acaia sira sei la bele halo ha’u nonok, maibé ha’u sei foti an. No tan sá? Tan ha’u la hadomi imi? Maromak hatene katak ha’u hadomi imi!

Maromak Futar Lia.

 

Salmo Responsorial                                                                                                                                   Sal. 110(111). 1-4, 7-8 (R. 7ª)

Refrão : Na’i, Ita hahalok mak lós no di’ak!!! Repete-se

Ou           Aleluia!

Ho laran tomak ha’u hahi Na’i,

Iha libur hamutuk ema lós nian no iha assembleia.

Na’i Nia hahalok kmanek boot tebes,

Halo nia emar sira hanoin ba nafatin. Refrão

 

Boot no kmanek tebes Nia hahalok sira,

Nia laran-luak no neon mós hela ba nafatin.

Na’i Nia hahalok, ema sei la haluha,

Na’i laran di’ak no laran maus. Refrão

 

Na’i Nia liman nia hahalok mesa mós no los,

Nia lei sira sei la muda,

Sei metin tinan-ba-tinan,

Hari metin iha lia lós no justiça. Refrão

 

Aclamação                                                                                                                                                                                    Rom. 8. 15bc

Refrão : Aleluia, Aleluia!! Repete-se

Imi simu Espírito ida nebé halo imi sai oan fudin,

Nebé lori ita bolu: “Abba! Aman”. Refrão

 

Evangelho                                                                                                                                                                                          Mt. 6. 7-15

Na’i Jesus Cristo nia Evangelho nu’udar São Mateus haktuir:

Iha tempo nebá, Jesus hateten ba escolante sira: “Wainhira imi reza, keta ko’alia barak hanesan gentio sira; sira hanoin katak ho sira nia liafuan bar-barak, Na’i sei rona sira. Keta halo hanesan sira basá imi nia Aman hatene buat nebé imi kuran molok imi husu ba Nia. Ne’e duni, harohan nune’e ba: “Ami Aman iha Lalehan, halo Ita naran sai santo. Halo Ita nia reino to’o mai ami; halo tuir Ita nia hakarak ba iha rai nu’udar iha Lalehan. Haraik aihan loro-loron nian mai ami. Haraik perdua mai ami nia tusan, nu’udar ami perdua sira nebé iha tusan ho ami. Keta husik ami monu ba tentação, maibé hasai ami housi buat áat.

Basá imi perdua karik ema sira nia sala, imi Aman iha Lalehan mós sei perdua imi nia sala sira. Maibé imi la perdua karik ema seluk, imi nia Aman mós sei la perdua imi nia sala sira”.

Lia Maksoyn.

Leave a Reply

Your email address will not be published. Required fields are marked *