shadow
Diocese de Dili > NOTÍCIAS > Notícias > NA’I MAROMAK NIA HAKARAK IDA DE’IT MAK ITA NIA ‘SANTIDADE’

NA’I MAROMAK NIA HAKARAK IDA DE’IT MAK ITA NIA ‘SANTIDADE’

DCDD 20/06/2019 iha Quinta-feira lorokarik tuku 3:00 Htl, liburan hamutuk iha Paróquia Balide Bispo de Dili Dom Virgílio do Carmo da Silva, Encarregado Santa SÉ nian iha Timor, padres, madres, religiosos e religiosas seminaristas, grupo categoriais, estudantes no sarani tomak iha capital Dili hodi halao processão Corpo e Sangue de Cristo mai to’o iha Jardim Nossa Senhora Imaculada de Conceição Lecidere Dili. Iha processão ne’e hotu-hotu lao iha ambiente oração mai to’o iha Largo Lecidere hodi taka ho Adoração Santíssimo ne’ebe preside housi Dom Virgílio do Carmo da Silva.

Dom Virgílio do Carmo da Silva hateten “Maluk doben sira, tinan-tinan ita celebra loron boot ida ne’e hodi adora ita Na’i Jesus Cristo nia Futar Isin no Ran. Mai ita mos lori ba uma novidade ruma iha tinan ida ne’e. Laos de’it ho buat boot mak ita bele halo buat ne’ebe boot hodi adora, maibe mos ho ita nia fiar ita Na’in Jesus Cristo ho oração housi buat ne’ebe kiik, ita bele halo acção diak ne’ebe boot. Jesus hanourin ita atu la desanima, maibe buka nafatin atu koko no fahe ita nia moris ho ema seluk basá wainhira ó fo, ó mos sei simu wain liu tan. Jesus la’os de’it habosu ema ho aihan ninian, maibe mos hanesan aihan domin, paz, unidade, comunhão, lialos no moris nian”.

Liu tan ne’e Prelado ne’e dehan, “ Ita hotu ohin tun housi Balide mai ita tuir didiak rona reflexão sira ne’ebe ohin lê durante iha ita medita kona ba terço, reflete teb-tebes ita nia realidade. Ho ida ne’e mak ohin ita hasa’e no consagra dala ida tan ba Na’i Maromak. Ho haraik an hakarak mos convida sarani sira hotu, atu ita hafoun ita nia domin ba Jesus ho gesto ida ne’ebe ita bele loke ita nia an, loke ita nia família ba Santíssima Corpo e Sangue do Senhor basá Nia mak aihan unidade, comunhão. Nia ne’ebe buka no hakarak atu horik iha ita nia fuan, maibe dala barak ita nia fuan taka metin. Hanesan dehan iha apocalipse hau mak ne’e iha hela odamatan oin, tuku hela o nia odamatan. Se ema ruma rona karaik ha’u nia lian no sei loke odamatan mai ha’u, no ha’u sei tama no han hamutuk ho nia to’o rohan”.

Atu taka Dom Virgílio do Carmo da Silva haklean tan katak, “Corpo de Deus hakarak ita atu compreende duni katak Na’i Maromak dere nafatin ita nia fuan, maske dala barak ita ema lakohi atu rona, Nia tuku ita nia odamatan fuan nian lor-loron, loke odamatan atu Ha’u bele tama, Hau moris ho ó. Ida ne’e laos atu fo de’it ho minuto ida ka tempo ruma hanesan ita ba missa, maibe loron ida ne’e hakarak loke duni ita nia fuan atu ita nain Jesus cristo bele horik ho ita. Mai ita nia oração ohin nian ita fila ho liafuan ida ne’e; loke ó nia fuan mai Ha’u hanesan Ha’u loke Ha’u nian ba ó, nune’e Ha’u bele hamamar ó nia fuan ne’ebe to’os.

Hanoin ohin ita halo ita nia processão mai iha ne’e ho objetivo ida, finalidade ida hodi tuku tur hanai, adora Jesus nia Futar Isin, hodi harohan ba Nia atu bele tama iha ita nia fuan, atu bele hetan fatin iha ita nia fuan, iha ita nia família, iha ita nia comunidade, iha ita nia escola sira, iha instituições oi-oin nian iha rai ida ne’e atu Nia bele hamamar ita ema nia fuan, loke hodi moris tuir Na’i Maromak nia hakarak ida de’it mak ita nia Santidade”. (Alin/Marta)

Leave a Reply

Your email address will not be published. Required fields are marked *