shadow
Diocese de Dili > NOTÍCIAS > LETURA DIÁRIA > Sexta – Feira, XI Semana Tempo Comum (ANO C)

Sexta – Feira, XI Semana Tempo Comum (ANO C)

Primeira Leitura           2Cor. 11. 18, 21b-30

Lia housi São Paulo nia segunda Surat ba sarani sira iha Corinto:

Maun-alin sira: Tan ema barak foti an tuir isin, ha’u mós sei foti an. Maibé kona ba buat nebé ema ruma barani atu foti an, ha’u ko’alia ona hanesan ema bulak ida, ha’u mós barani. Sira ema Hebreu? Ha’u mós. Sira ema Israel nian? ha’u mós. Sira Abraão nia bei-oan? Ha’u mós. Sira Cristo nia emar? Ha’u di’ak liu sira, ha’u ko’alia duni hanesan ema bulak ida: ho hahalok boot liu tan, ha’u hela iha dadur laran liu tan, ema baku ha’u dala la bele sura, ha’u besik atu mate dala barak liu tan. Ba dala lima iha ema Judeu sira nia liman, ema baku ha’u dala háat nulu kuran ida. Ba dala tolu ema baku ha’u ho fafulu; dala ida ema tuda ha’u; ba dala tolu ro nebé ha’u sa’e baku rahun iha tasi ibun; ha’u iha tasi laran kalan ida loron ida; dala barak ha’u la’o rai, ha’u hetan perigu iha mota laran; perigu housi na’okten sira, perigu housi ha’u nia povo rasik, perigu housi ema gentio sira, perigu housi iha cidade laran, perigu iha ai-laran, perigu iha tasi laran, perigo housi maun alin bosok ten sira; iha serbisu todan no terus laran, iha kalan barak nebé ha’u la bele toba, iha hamlaha no hamrook, iha jejum dala barak, iha rai malirin no rai manas. No liu fali buat hirak ne’e mak ha’u nia laran taridu hodi hanoin Kreda sira hotu. Se mak kbiit laek, no ha’u la kbiit laek? Se mak atu la’o ba sala, no ha’u la laran nakali?

Ha’u tenki foti an karik, ha’u sei foti an iha buat sira nebé hatudu katak ha’u kbiit laek.

Maromak Futar Lia.

 

Salmo Responsorial                                                                                                                    Sal. 33(34). 2-3, 4-5, 6-7 (R. cf. 18b)

Refrão : Maromak soi ema laran mós housi sira nia terus!!! Repete-se

Ha’u sei hahi Na’i loron kalan,

Nia rahun di’ak iha nafatin ha’u ibun.

Ha’u klamar fó glória ba Na’i;

Sira be haraik-an rona no haksolok. Refrão

 

Ha’u sei haksolok ho Na’i,

Ita sei hahi hamutuk Nia naran.

Ha’u buka Na’i, Na’i rona ha’u;

Nia hasa’i ha’u housi buat áat hotu. Refrão

 

Imi fila ba Na’i, imi sei hetan ksolok;

Imi sei la moe lerek.

Ema kiak harohan, na’i rona nia,

Soi nia housi laran susar hotu. Refrão

 

Aclamação                                                                                                                                                                                              Mt. 5. 3

Refrão : Aleluia, Aleluia!! Repete-se

Ksolok ba sira be kiak iha espírito

Basá reino Lalehan sira nian. Refrão

 

Evangelho                                                                                                                                                                                       Mt. 6. 19-23

Na’i Jesus Cristo nia Evangelho nu’udar São Mateus haktuir:

Iha tempo nebá, Jesus hateten ba escolante sira: “Imi keta haloot rikusoi iha rai, nebé ular no ferujem han mohu no na’okten sira sobu hodi na’ok. Maibé imi halibur ba imi an rikusoi iha Lalehan, iha nebé ular no ferujem la hamohu sira, na’okten sira mós la sobu hodi na’ok. Basá iha fatin nebé ó nia rikusoi hela, ó nia fuan mós sei hela iha nebá. Ó nia isin nia ahi oan mak ó nia matan; ó nia matan di’ak karik, ó nia isin tomak sei nabilan. Maibé ó nia matan áat karik, ó nia isin tomak sei iha nakukun. Ne’e duni, roman nebé iha ó laran nakukun karik, nakukun ne’e sei sai boot duni!

Lia Maksoyn.

Leave a Reply

Your email address will not be published. Required fields are marked *