shadow
Diocese de Dili > NOTÍCIAS > LETURA DIÁRIA > Sábado, XI Semana Tempo Comum (ANO C)

Sábado, XI Semana Tempo Comum (ANO C)

Primeira Leitura                     2Cor. 12. 1-10

Lia housi São Paulo nia segunda Surat ba sarani sira iha Corinto:

Maun-alin sira: Ha’u tenki foti an; maski ne’e la lori buat di’ak ruma, maibé ha’u sei ba oin o visão no buat sira nebé Na’i hatudu. Ha’u hatene ema ida iha Cristo, nebé tinan sanulu resin hat liu tiha, iha isin laran ka iha isin nia liur, ha’u la hatene, Maromak mak hatene, foti tiha ba Lalehan ba dala tolu. No ha’u hatene katak ema ne’e, iha isin laran ka iha isin liur, ha’u la hatene, Maromak mak hatene; foti tiha ba Lalehan no rona buat sira nebé ema la bele temi, ema ida la bele dehan sai. Kona ba ema ne’e mak ha’u sei foti an, maibé kona ba ha’u an rasik, ha’u sei la foti an; kona ba ha’u nia an nebé kbiit laek de’it mak ha’u sei foti an. Maibé, maski ha’u hakarak foti an mak ha’u sei foti an. Maibé, maski ha’u hakarak foti an karik, ha’u sei la sai bulak, basá ha’u sei hateten lialós. Maibé ha’u la foti an, atu ema ida la bele hanoin kona ba ha’u liu fali buat nebé nia hare iha ha’u ka rona housi ha’u.

Atu ha’u la bele loko an resin tan buat nebé Maromak hatudu barak tebes, Maromak haraik mai ha’u ai-tarak ba ha’u nia isin; Santanas nia anjo ida, atu baku ha’u; atu ha’u la bele loko an resin. Dala tolu ha’u husu Na’i kona ba ne’e, atu nia husik tiha ha’u, maibé Nia dehan mai ha’u, “Ha’u nia graça to’o ona ba ó, basá Ha’u nia kbiit sai maka’as iha ema nia kbiit laek”. Ho ksolok, ha’u sei foti an liu tan iha ha’u nia kbiit laek, atu Cristo nia kbiit hôrik iha ha’u. Ne’e duni, tan Cristo, ha’u haksolok tanba ha’u kbiit laek, wainhira ema hasara ha’u, iha terus laran, wainhira ema hanehan ha’u, iha susar laran; basá wainhira ha’u kbiit laek, ha’u iha kbiit maka’as.

Maromak Futar Lia.

 

Salmo Responsorial                                                                                                                    Sal. 33(34). 8-9, 10-11, 12-13 (R. 9ª)

Refrão : Imi koko ba hodi haré Na’i di’ak oinsá!!! Repete-se

Na’i nia Anjo tau matan ba sira be hamta’uk Nia,

No hatau sira housi buat áat.

Koko ba hodi haré Na’i di’ak oinsá;

Rahun di’ak ba ema nebé hôrik iha Nia. Refrão

 

Hamta’uk Na’i ba, imi sira be fiar Nia,

Basá la kuran buat ida ba sira be hamta’uk Nia.

Ema riku sira sai kiak no sei hamlaha;

Ba sira be buka Na’i, sira sei la kuran buat ida. Refrão

 

Ha’u oan sira; hakbesik mai hodi rona ha’u;

Ha’u sei hanourin imi hamta’uk Maromak;

Imi sé mak la hadomi moris?

Be la hakarak moris naruk ho laran ksolok? Refrão

 

Aclamação                                                                                                                                                                                         2 Cor. 8. 9

Refrão : Aleluia, Aleluia!! Repete-se

Na’i Jesus Cristo be riku, halo An kiak tan imi,

Atu imi bele sai riku hodi Nia kiak. Refrão

 

Evangelho                                                                                                                                                                                      Mt. 6. 24-34

Na’i Jesus Cristo nia Evangelho nu’udar São Mateus haktuir:

Iha tempo nebá, Jesus hateten ba escolante sira: “Ema ida la bele serbi ba na’i ulun rua, basá nia sei rai odi hasouru ida hodi hadomi ida seluk, ka nia serbi ida hodi hakribi ida seluk. Imi la bele serbi hamutuk Maromak no osan”.

“Tan ne’e Ha’u dehan ba imi: keta hanoin resin kona ba imi nia moris, atu han ka hemu sáida; ka ba imi nia isin lolon, atu hatais sáida. Moris la folin liu fali hahan no isin lolon liu fali hatais? Hare ba manu sira iha lalehan: sira la kuda, la silu batar ka haloot iha hoka; no imi nia Aman iha Lalehan fó han sira. Imi la folin wa’in liu fali sira? Imi ida nebé mak hodi hanoin barak, bele hanaruk nia isin sasukat ida tan?”

Tan sá imi hanoin resin kona ba hatais? Haré ba aifunan liriu sira nebé moris iha rai. Sira la serbisu, mós la souru tais. Maibé, Ha’u dehan ba imi katak Salomão mós iha nia kmanek wa’in tomak la hatais hanesan sira ne’e ida. Ne’e duni, Maromak hafutar karik hanesan ne’e ba du’ut rai nian nebé ohin iha no aban ema  sei soe ba ahi, Nia sei la fó hatais liu tan ba imi, ema nebé fiar ki’i?”

“Ne’e duni, keta laran taridu ba hodi dehan: ‘Ita sei han ka hemu, ka hatais lós sáida? Gentio sira buka buat sira ne’e hotu. Maibé imi nia Aman Lalehan hatene katak imi kuran sira ne’e. Ne’e duni, buka uluk knana’in Maromak Nia reino ho Nia justiça; buat hirak ne’e sei fó tan ba imi. Ne’e duni keta hanoin resin kona ba loron aban, basá loron aban sei hanoin nia susar rasik. Ba loron ida, to’o ona nia todan”.

Lia Maksoyn.

Leave a Reply

Your email address will not be published. Required fields are marked *