shadow
Diocese de Dili > NOTÍCIAS > REFLEXÃO > DOMINGO XII TC. ANO C-2019

DOMINGO XII TC. ANO C-2019

Maun alin sarani doben sira, ema sira dehan hau Se? Nai Jesus ninia pergunta ba apostolo sira. Pergunta ida hanesan ne’e pergunta kona ba identidade ema ida nian. Iha ita nia moris identidade mak sai hanesan buat dahuluk liu iha afirmação ema ida ninia an hodi halo ema seluk hatene kona ba ema ne’e se ida. Nune’e comcerteza Jesus ninia pergunta be halo ne’e pergunta be exige  resposta afirmativa ida kona ba Jesus ninia-An.Resposta afirmativa ne’e mai husi experiência de vida ida nebe halao hamutuk ho Jesus Cristo ka koko iha Jesus Cristo. Balun rona deit kona ba Jesus, balun hare Jesus ninia hahalok sira, balun moris no halo hamutuk ho Jesus Maromak ninia obra maksoin nian iha ema sira nia leet. Nune’e mak resposta nebe dehan fo kona ba Jesus ne’e claro sai tuir  ema ida idak ninia experiência ho Jesus.

Leitura sira ohin nian liu liu Evangelho apresenta mai ita afirmação diferentes husi ema sira nia experiênciakona ba Jesus Cristo ninia-an. Ema sira nebe hatene Jesus liu deit, rona deit ema koalia no hare buat nebe Jesus halo sira dehan katak Jesus ne’e João Baptista, Elias ka profeta ruma mak moris hias fali. Maibe Apostolo sira be moris hamutuk ho Jesus Cristo iha buat hotu nebe Jesus halo no koalia sira afirma liu husi Pedro dehan katak Jesus ne’e Maromak nia Oan, Maksoin ema no rai klaran nian “Ita bo’ot Maromak ninia oan Mane, Messias mundo nian”.Maun alin sira, mas que resposta oioin maibe ninia resposta nebe los ida deit, basa Jesus ne’e ida deit. No tuir fiar nebe ita ita, ita hatene katak resposta los ne’e mak Cristo Jesus ne’e Maksoin, Maromak nia Oan. Resposta ida ne’e hatudu revelação Maromak nian mai ita ema sira kona ba ninia-An be bele halo hotu hotu, no sai salvador ema no mundo tomak rai klaran nian.

Maun alin doben sira ita afirma ita nia fiar iha Jesus Cristo nundar Maromak ninia Oan, ita nia maksoin. Ne’e tem que claro ba ita sarani sira.  Ba ita sarani católico Jesus ne’e Maromak Oan-Maksoin ema no buat hotu nian. Jesus Cristo laos lider carismático ida, laos ema famosu ida iha mundo, laos político sucesso ida, laos mos lider famosu grupo ida nian, laos presidente ka orador, no laos artista famosa ida. Jesus Cristo Maromak ninia oan. Nia Maromak nia oan tamba ninia moris revela momos ida nee’ mai ita. Ninia moris fo moris ba ema, fo isin diak ba ema, halo ema mate sira hetan fila fali moris, ema hamlaha no hamrok sira hetan aihan hodi la hamlaha no hamrok tan, ema diuk sira rona, ema neon susar sira haksolok, etcetera. Testemunho moris ida hanesan ne’e mak sem duvida hatudu duni mai ita katak Jesus ne’e Maromak oan, ita fiar metin duni iha Nia katak Nia Maromak Ona, ita nia Maksoin. Nia halo ita hotu hetan maksoin hodi sai mos Maromak ninia oan sira  liu husi ninia terus, mate no moris hias. Hodi ne’e nia halo ita sai ida deit ona ho Maromak no ho maun alin sira.

Maun alin sira, hau hanoin ita nain Jesus Cristo de propósito halo pergunta ida ne’e atu afirma liu tan Maromak ninia-AN no ninia hahalok boot sira be halo hodi soi ema no rai klaran tomak nafatin ba nafatin to’o mundo no tempo nia rohan. Ida ne’econcretamente ita hare hetan iha Jesus Cristo ninia moris rasik. Iha Jesus Cristo mak realiza promessa Maromak nian nebe dehan sai mai ita iha primeira leitura katak “Hau sei haraik ba David nia uma kain no mos ba ema sira tur iha Jerusalem NEON DIAK NO LARAN KMAN ATU HAMULAAK”. Maromak hatudu ninia neon diak iha Cristo Jesus no haraik neon diak ba ita ema sira liu husi Jesus Cristo. Maromak hanorin ita hamulak iha Jesus Cristo, halo ita bolu Maromak ita Aman-ABBA. La hodi Cristo ita labele iha neon diak no badinas hamulak, ho Cristo no iha Cristo mak Maromak kuda neon diak no laran kman nee iha ita nia moris atu ita bele hatene moris lolos nundar Maromak oan. Sai laran diak ba ema hotu hotu no harohan nafatin ba Maromak atu labele lakon Maromak ninia graça, atu horik hamutuk nafatin ho Maromak, nune’e ho Maromak ninia tulun ninia emar ka oan sira bele moris hamutuk sai ida deit iha ninia familia. Familia ida deit moris iha dame, domin no ksolok nia laran.

Segunda leitura hanorin ita katak iha Jesus Cristo ita hotu mesak Maromak ninia oan, maun alin ida deit iha familia boot Maromak ninian. Iha familia ida ne’e laiha grupo ida diak liu grupo sira seluk, laiha ema atan no laiha ema riku, laiha ema metan ka mutin mak diak liu, laiha beik ka matenek mak diak liu. Buat nebe iha mak ida ne’e mesak maun ho alin deit. Ita nia maun alin ida deit iha Maromak ne’e tem que ultrapassa ita ninia diferença sira be ohin temi no sira nebe ita labele temi hotu iha ne’e. Katak ita la nega diferença sira ne’e maibe ita moris nafatin diferença sira ne’e nundar maun ho alin no la halo diferença sira ne’e sai sasukat ba ita nia moris atu diak liu ka lae. Buat nebe sai sasukat ba ita nia moris tenki mak Jesus Cristo. Jesus Cristo nebe bele soi ita, bele halo ita nia diferença sira la boot liu ita nia fiar ba Maromak, ita nia domin, ita nia laran metin ba malu, ita nia paz no ita nia ksolok ba Maromak no ba maun alin sira.

Mai ita hametin liu tan ita nia fiar iha ita nia Nai Jesus Cristo hodi halao ita nia moris nundar maun alin iha familia boot Maromak nian ho laran metin lolos. Amen.

 

Bidau, 23 de Junho 2019, Pb.

Leave a Reply

Your email address will not be published. Required fields are marked *