shadow
Diocese de Dili > NOTÍCIAS > REFLEXÃO > JESUS HANESAN HO ARTISTA?

JESUS HANESAN HO ARTISTA?

Domingo Comum XII-Ano C 2019

 

Degradação boot ida iha fiar Cristão (Católica) ohin loron mak; ema hatene Jesus Maromak maibé, la precisa cumpri saida mak Jesus hanorin. Balu fali considera Jesus hanesan figura importante ida entre figura sira seluk iha mundo nee. Balu tan haré Jesus hanesan modelo de vida maibé, laos sasukat ba comportamento. Iha fatin balu, ema comercializa Jesus nia naran ba interece económica (Business). Artisa no foin sae balu tara Cruz hanesan estilo de vida (Life Style) deit. Intelectual balu considera Jesus nia level hanesan ho figura Che Guevara.

Sarani balu conhece liu Cristiano Ronaldo ho Lionel Messi do que buka conhece Jesus Cristo. Pior liu Católico balun hatene didiak informação artista sira nian liu fali informação kona ba Jesus Cristo nebe Creda Católica haklaken. Político balun haré Jesus nia mandamento ho Igreja nia regra sira hanesan tropeço (batu sandungan) ba sira nia interece política. Pior liu tan mosu profeta falso oioin hari Igreja ho objectivo económico até hatete aat didiak Igreja Católica. Nee mak realidade husi mundo moderno nee. Ba ita sarani Católico nebé sei fiel,  Rahun diak ba ita nobun nebe hatene Jesus nudar Messias.

Base fundamental husi convicção Cristão Católico hatete; Jesus mak Maksoin no Messias prometida. Iha Evangelho Lucas Domingo semana nee, Jesus lao hamutuk ho nia apóstolo sira halao dadaun viagem ba Jerusalém. Tuir São Lucas, Jesus ba Jerusalém hodi halao eh cumpri Ninia missão salvífica. Nunee iha oportunidade determinado ida nee, Jesus hatoo pergunta ba nia apóstolo sira; Ema dehan, HAU nee se los?-pergunta nee horas nee dadaun Jesus mai ita idaidak. Tuir ita nia convicção, Jesus nee se?

Rona tiha resposta balun kona ba oinsa ema nia comentário ba Jesus nia personalidade, tuir mai, Jesus husu directamente ba apóstolo Pedro. Lori apóstolo sira seluk nia naran, Pedro hatan ba Jesus; ITA MAK MESSIAS HUSI MAROMAK.

Ema judeu sira nia compreensão kona ba Messias oioin deit. Bali entende Messias nudar liurai, balu compreende Messias nudar profeta, balu dehan Messias nee lider boot ida nebe iha poder makas, no compreensão seluk tan. Husi nee seidauk iha identificação fixa kona ba conceito Messias. Pedro nia lia hatan ba Jesus nee loos ona maibé, Jesus precisa explica klean liu tan ba sira. 

Precisa ita consciente katak; afirmação kona ba identidade Jesus nudar Messias laos mosu deit iha altura neba, amibé, ohin loron mos polémica kona ba identificação Jesus nudar Messias ho Ninia papel continua coloca iha questão.

Oficialmente ita nobun fiar duni Jesus maibé, será que ita nia fé nee iha sentido tebes ka lae? Jesus nee se los ba ita? Jesus nee ba ema barak importante ka lae?

Ita nia fé dala barak liga liu ho visão ba sistema sira, ideologia sira, instituição sira no situação política sira. Iha âmbito Igreja nian mos, existe ema balu nebe considera nia relação mesmesak ho Jesus sem partilha fiar nee ba ema seluk. Jesus nee Messias ba nia mesak deit.

Pedro nia resposta ba Jesus nee iha sentido saida? Jesus hateten katak; Ninia horik iha mundo, Nia mai nudar Messias ba ema hothotu. Jesus nia identidade Messiánica nee supera buat hotu sem limite. Jesus Messias ba sociedade tomak iha mundo rai klaran. Iha sentido ida nee mak ita foin entende katak Jesus nee Messias ba pessoa hothotu iha mundo nee.

Aparentemente, Jesus nudar Messias nebe funda mundo tomak nudar Igreja ida. Laos harii igreja hanesan kios sira hodi identifica-an tuir vontade deit hafoin coloca igreja nee nudar Igreja nacional, igreja continental, igreja ema mutin sira nian, igreja ema metan sira nian, igreja cultura sira nian, no identificação seluk tan nebe rebo rebo tuir ema nia hakarak deit. Iha altura neba, ema nia haree ba Jesus diferente ba malu. tansa mosu nunee? Tanba; 

  • Nudar Judeu, Jesus laos moris husi suku Levi (suku nailulik sira nian).
  • Jesus laos político.
  • Jesus fo atenção ba mundo político basá, knaar iha mundo impossível bele realize se Jesus la iha interacção ho situação política.
  • Jesus dala barak liu, halao Ninia missão iha área Cafarnaum, Galileia; laos Jerusalem.
  • Jesus fahe tempo barak liu ho ema moras sira, ema pecador sira inclui mos ema hirak nee considerado folin laek iha sociedade.
  • Vida no lalaok Jesus nian nudar cumprimento husi execussão Lia Foun diak nebe Jesus haklaken.
  • Jesus laos haklaken reino político  hanesan David maibé, Jesus haklaken  reino Maromak nian nebe justo no prospero ba ema hotu. Moris no lalaok sira nudar lalaok saran-An tomak ba ema seluk nia diak.

Ho ida nee, Jesus nia identidade nudar Messias mak; saran Nia moris tomak ba ema seluk nia interece. Justificação nebe Jesus hatoo kona ba nia identidade lolos nebe revela ba Jesus nia apóstolo sira be dehan; “ema nebe hakarak tuir Hau, nia sei nega nia-an lori nia Cruz lorloron hodi tuir Hau”(Lc 9,23). Jesus nia afirmação nee se ita interpreta ba linguagem lorloron sei sai hanesan nee;”Se hau lakon hau nia moris ba Cristo, hau sei hetan fila fali moris nee”.

Jesus nia pergunta ba nia apósotolo sira iha tinan rihun rua resin liu ba nee, sei rona hela nia eco/getaran too ita nobun iha século ida nee; tuir ita nia hanoin JESUS ne, se los? Jesus loloos nee hakarak hatene sentido husi Nia personaldade ba ita idaidak nee oinsa? Ita nia fiar ba Jesus too iha nebe ona? Oinsa ona? Ba oin, ita nia fiar nee sei sai oinsa? 

Tuir imi nia haree, Hau nee se los? Pergunta ida nee nudar exame ida ba ita Cristão Católico tomak nebe coloca Jesus nudar centro fiar nian. Ema Católico ida hatene oinsa fo resposta ba Jesus nia pergunta nee. Hanoin ba katak; São Paulo iha nia carta ba sarani Gálatas sira dehan; Maun-alin sira; imi hotu mesak Maromak oan, tan imi fiar Jesus Cristo. Basa, imi hotu ne’ebe simu Cristo nia baptismo; hafutar-an rasik hodi Cristo. Assim Seja e Bem Haja. (IgnasLopes)

Leave a Reply

Your email address will not be published. Required fields are marked *