shadow
Diocese de Dili > NOTÍCIAS > LETURA DIÁRIA > Segunda – Feira, XII Semana Tempo Comum (ANO C)

Segunda – Feira, XII Semana Tempo Comum (ANO C)

Solenidade São João Baptista Nia Moris

 

Primeira Leitura                           Is. 49. 1-6

Lia housi livro Isaías nian:

Povo sira be dook iha tasi sorin balu ba, ho neon moris, rona ha’u ba! Na’i bolu nanis  ha’u housi ha’u inan nia knotak, halia ha’u naran housi ha’u inan nia laran.

Nia halo ha’u ibun sai surik kroat ida, ho Nia liman hanehan tiha ha’u. Halo ha’u sai tiha nu’udar besi kroat ida, rai tiha ha’u iha Nia fatin.

Nia dehan mai ha’u: “Ó, ha’u, Nia be halo ha’u iha ha’u inan nia knotak, atu halo ha’u sai nia atan, hodi halibur Jacob, hodi halibur Israel besik ba Nia. Tan ha’u hetan kmanek iha Na’i nia oin, Maromak mak ha’u nia kbiit. Ne’e duni, Na’i dehan mai ha’u: “La to’o sai de’it ha’u atan, atu hari Jacob nia knua, atu halibur Israel oan sira be sei moris; Ha’u sei halo ó hanesan naroman ba nação hot-hotu atu ha’u nia maksoyn to’o ba rai hot-hotu”.

Maromak Futar Lia.

 

Salmo Responsorial                                                                                                         Sal. 138(139). 1-3, 13-14ab, 14c-15 (R. 14ª)

Refrão : Na’i, ha’u agradece Itaboot, tan kmanek wa’in, Ita halo moris ha’u!!! Repete-se

Na’i, Ita hatene ha’u laran tomak;

Ita hatene wainhira ha’u tur no wainhira ha’u hamriik;

Housi dook, Ita hatene ha’u hanoin,

Ita haré ha’u wainhira ha’u la’o no ha’u descansa;

Ita hamatan ha’u nia hakat hotu. Refrão

 

Ita mak halo ha’u an tomak

Ita mak halo moris ha’u iha ha’u inan nia knotak.

Ha’u agradece Itaboot, tan Ita halo ha’u kmanek tebes

Ita hahalok sira kmanek tebes duni. Refrão

 

Ita hatene nanis ha’u klamar,

Ha’u isin baluk ida la subar ba Ita,

Wainhira halo ha’u moris iha segredo,

Halo iha kle’an tebes rai nian. Refrão

 

Segunda Leitura                                                                                                                                                                       Act. 13. 22-26

Lia housi livro haktuir Apóstolo sira nia hahalok:

Iha loron hirak nebá, Paulo lia tun nune’e; “Maromak haraik David ba Israel oan sira nu’udar liurai no Na’i fó sasin nune’e: “Ha’u hetan David, Jesse nia oan, ema ida nebé tuir Ha’u nia hakaran, nebé halo tuir nafatin Ha’u nia liafuan”. Housi nia bei-oan ida, nu’udar Na’i Maromak hakotu ona, sei halo mosu ba Israel Salvador ida eh Jesus. Wainhira Jesus seida’uk mosu mai, João haklaken ona baptismo ida hadera-an nian ba povo Israel. Besik atu remata knaar nebé nia hala’o, João dehan. “Ha’u la’os Ida nebé imi hanoin. Maibé, liu tiha ha’u, sei mai Ida nebé ha’u la so’i atu kore Nia sandalis talin”.

Ha’u maun-alin sira, Abraão nia oan sira no imi hotu nebé hamta’uk Maromak, ba ita tomak mak Maromak hato’o lia maksoyn ne’e.

Maromak Futar Lia.

 

Aclamação                                                                                                                                                                                             Lc. 1. 76

Refrão : Aleluia, Aleluia!! Repete-se

Ó, kosok oan, ema sei hanaran ó Na’i áas liu hotu nia profeta,

Basá ó sei ba uluk Na’i atu hadi’a dalan ba Nia. Refrão

 

Evangelho                                                                                                                                                                                Lc. 1. 57-66, 80

Na’i Jesus Cristo nia Evangelho nu’uda São Lucas haktuir:

Wainhira tempo to’o ona ba Isabel atu tur ahi, nia tur ahi oan mane ida. Rona tiha katak Na’i hatudu laran-luak boot ba nia, nia maluk no parente sira haksolok ho nia.

Liu tiha loron ualu, sira mai atu halo circuncisão ba kosok oan. Sira hakarak hanaran nia Zakarias, tuir nia aman nia naran; maibé nia inan dehan: “Lae, nia naran João”. Sira dehan fali ba nia: “Iha imi nia parenti sira leet, la iha ema ida ho naran ne’e”. Tan ne’e, ho sinal oi-oin, sira husu ba nia aman: nia hakarak fó naran sá ba nia oan. Nia husu aikabelak pedasuk ida hodi hakerek: “Nia naran João”. Sira hotu hakfodak. Zacarias nia ibun nakloke kedas, nia nanal mamar fali hodi ko’alia no hawélok Maromak. Sira hotu nebé hela besik nebá ta’uk teb-tebes. Lia hirak ne’e hotu naklekar iha foho rai Judeia tomak. Sira hotu nebé rona buat hirak ne’e rai hela iha sira nia laran hodi dehan ba sira-an rasik: “Labarik ne’e sei sai sá lós?” Basá, tebes duni, Na’i nia liman hela ho nia. Labarik sai boot, nia laran metin liu tan. Nia hôrik iha rai fuik maran to’o loron nebé nia hatudu-an ba Israel.

Lia Maksoyn.

Leave a Reply

Your email address will not be published. Required fields are marked *