shadow
Diocese de Dili > NOTÍCIAS > LETURA DIÁRIA > Quarta – Feira, XII Semana iha Tempo Comum (ANO C)

Quarta – Feira, XII Semana iha Tempo Comum (ANO C)

Primeira Leitura      Gen. 15. 1-12. 17-18

Lia housi Livro Génesis:

Iha loron hirak neba, Na’i lia tun ba Abraão, housi mehi ida, dehan: “Abraão, ó keta ta’uk, Ha’u mak ó nia kbiit, ó nia kolen sei sai boot teb-tebes”.

Abraão hatan ba Na’i: “Na’i, ha’u nia Maromak, Ita sei haraik sá mai ha’u? Ha’u atu mate, maibé, ha’u sei la husik hela oan ida, ida nebé sei hela ho ha’u nia uma mak Eliezer housi Damasco”. Abraão hateten tan: “Ita la haraik oan mai ha’u, tan ne’e, ha’u nia atan sira mak sei simu ha’u nia riku-soi hodi hela nu’udar oan. Nune’e, Na’i lia tun ba Abraão, dehan: Ó nia atan sei hela ho ó nia riku-soi; ema ida nebé sei moris housi ó nia ran mak sei simu hodi hela ho ó nia riku-soi”. Maromak haruka Abraão sai housi nia uma hodi dehan ba nia: “Foti matan ba lalehan, ó bele karik, sura to’ok fitun sira nebá”. Maromak dehan tan : “Ó nia bei-oan sira sei sai barak hanesan nebá”. Abraão fiar iha Na’i Maromak, tan fiar ne’e, Na’i halo nia sai santo.

Na’i dehan teni ba nia: “Ha’u mak Na’i: Ha’u mak hasai ó housi Ur, ema caldeu sira rain, atu fó rai ida ne’e ba ó hodi hela nu’udar ó rain”. Abraão hatan: “Na’i, ha’u nia Maromak, oinsá mak ha’u sei hatene katak rai ne’e ha’u nian?” Na’i hatan ba nia: “Ó ba lori mai ha’u, karau baka oan ida tinan tolu nian, bibi-timur oan ida no bibi-malae oan ida ho tinan tolu hotu, manu lakateu ida ho tan manu falur ida”. Abraão ba hola balada sira ne’e hotu, fera fahe hotu ba rua, hodi tau baluk ida iha baluk seluk nia oin; maibé, nia la fera fahe manu sira. Manu-metan no makikit sira tun ba naan atu han, maibé, Abraão duni tiha sira.

Molok loron besik atu monu, Abraão matan dukur teb-tebes; nia laran mós ta’uk hela. Wainhira loron monu tiha, nakukun taka daudaun rai, mosu mai ahi-klaak ida subar sira leet. Iha loron ne’e, Maromak halo moruk ho Abraão hodi dehan ba nia nune’e: “Ha’u fó rai ne’e ba ó nia oan sira, housi Egipto nian to’o mota boot Eufrates”.

Maromak Futar Lia.

 

Salmo Responsorial                                                                                                               Sal. 104(105). 1-2, 3-4, 6-7, 8-9 (R. 8ª)

Refrão : Na’i la haluha Nia moruk!!! Repete-se

Ou           Aleluia!!

Hawélok Na’i nia naran,

Haklaken iha povo sira leet Nia hahalok kmanek.

Hananu ba Nia salmo no hino sira,

Haklaken Nia hahalok kmanek sira. Refrão

 

Foti-an iha Nia naran santo,

Haksolok ba! Fuan be buka Na’i.

Hanoin Na’i no nia kbiit,

Buka nafatin Nia futar oin. Refrão

 

Nia atan Abraão nia bei-oan sira,

Oan sira Jacob nian be Na’i hili,

Na’i mak ita Maromak,

Nia tesi lia ba mundo rai-klaran tomak. Refrão

 

Nia la haluha Nia moruk ba nafatin,

Nia liafuan hela to’o derasaan rihun ida,

Moruk be Nia halo ho Abraão,

Lia menon be hato’o hela ba Isaac. Refrão

 

Aclamação                                                                                                                                                                                    Jo. 15. 4ª, 5b

Refrão : Aleluia, Aleluia. Repete-se

Imi hela iha Ha’u, Ha’u hela iha imi, Na’i lia tun;

Ema nebé hela iha Ha’u, nia sei fó fuan barak. Refrão

 

Evangelho                                                                                                                                                                                     Mt. 7 : 15 -20

Na’i Jesus Cristo Nia Evangelho nu’udar São Mateus haktuir:

Iha tempo neba, Jesus hateten ba escolante sira: “Imi matan moris ba kona ba profeta falso sira nebé mosu ba imi hodi hatais bibi kulit, maibé iha laran, sira mesa asu fuik nebé kaanten. Imi sei hatene sira housi sira nia fuan. Ema bele ku’u uvas housi aitarak, ka figueira housi du’ut aat? Lolos, ai hotu nebé di’ak fo fuan di’ak, no ai nebé aat fo fuan aat. Ai di’ak la bele fo fuan aat, no ai aat la bele fo fuan di’ak. Ema sei tesi tiha ai sira nebé la fo fuan di’ak hodi soe sira ba ahi.  Ne’e duni, housi sira nia fuan mak imi sei hatene sira”.

Lia Maksoyn.

Leave a Reply

Your email address will not be published. Required fields are marked *