shadow
Diocese de Dili > NOTÍCIAS > LETURA DIÁRIA > Quinta – Feira, XII Semana iha Tempo Comum (ANO C)

Quinta – Feira, XII Semana iha Tempo Comum (ANO C)

Primeira Leitura          Gen. 16. 1-12, 15-16

Forma breve : lê de’it »   « nia leet             Gen. 16. 6-12, 15-16

Lia housi livro Génesis:

Iha loron hira nebá, Sarai, Abraão nia kabén, seidauk iha oan ida. Maibé, nia iha atan feto ida housi Egipto, naran Agar, Nune’e, Sarai dehan ba Abraão: “Ó haré katak Na’i halo la ko’us. Ha’u husu ó atu simu ha’u atan feto. Housi nia, ha’u bele hetan oan karik”. Abraão sée tilun hodi rona Sarai nia liafuan.

Tinan sanulu liu tiha wainhira Abraão hôrik iha rai Canaã nian, nia kabén Sarai saran nia atan feto Agar housi Egipto ba nia la’en Abraão, nu’udar féen. Abraão simu Agar no Agar ko’us duni tan nia. Haré katak nia kô’us atu sai inan Agar hahu hakribi nia na’i feto. Nune’e, Sarai dehan ba Abraão: “Buat áat nebé nia halo mai ha’u tan ó nia hahalok. Ha’u mak tau iha ó liman ha’u nia atan feto. Maibé, wainhira haré katak nia kô’us ona atu sai inan, nia hahu hakribi ha’u. Na’i sei tesi lia ba ita, ba ó no ba ha’u”. Abraão hatan ba Sarai: “Ó nia atan feto iha ó liman; halo ba nia buat nebé ó hakarak”. » Nune’e, Sarai hahu haré áat nia atan feto, no nia atan feto halai dook housi nia.

Na’i nia Anjo hetan Agar iha rai fuik maran, besik wé matan ida, iha dalan ba Sur, hodi dehan ba nia: “Agar, Sarai nia atan feto, ó mai housi nebé, no ó atu ba nebé? Nia hatan ba Anjo: “Ha’u halai hodi hadook-an housi Sarai, ha’u na’in feto”. Na’i nia Anjo hateten fali ba nia “Fila fali ba hamutuk ho ó nia na’in feto, hodi saran-an ba nia liman ho haraik-an”. Na’i nia Anjo hateten tan: “Ha’u sei halo ó nia oan sira sai wa’in tebes, sura la bele”. Na’i nia Anjo dehan tan: “Ó sei sai inan hodi hahoris oan mane ida nebé ó sei hanaran nia Ismael, basá, Na’i rona ona ó nia terus nia lian. Nia sei sai hanesan kuda burro fuik ida iha ema sira leet; nia sei foti liman hasouru ema hot-hotu, no ema hot-hotu sei foti liman hasouru nia, nia sei hasouru nia maun-alin sira”.

Nune’e, Agar tur ahi oan mane ida ba Abraão, nebé nia hanaran oan ne’e Ismael. Abraão iha tinan ualu nulu resin neen, wainhira Agar hahoris oan Ismael ne’e ba nia. «

Maromak Futar Lia.

 

Salmo Responsorial                                                                                                                     Sal. 105(106). 1-2, 3-4ª, 4b-5 (R. 1ª)

Refrão : Fó graça ba Na’i, tan Nia di’ak!!! Repete-se

Ou           Aleluia!

Agradece ba Na’i, basá Nia di’ak tebes,

Tanba Nia domin rohan laek.

Sé mak bele sura hahalok Nia kbiit nian,

No haklaken Nia kmanek hotu? Refrão

 

Ksolok ba sira be halo tuir Nia lei,

Hodi halo tuir hahalok be justo.

Hanoin hikás ami, Na’i,

Tan Ita domin ba Ita povo. Refrão

 

Mai haré ami ho Ita maksoyn,

Atu ami bele sasin ba ksolok sira nian be Ita hili,

Hodi haksolok ho Ita povo nia ksolok,

No haksolok ho Ita liman-rohan. Refrão

 

Aclamação                                                                                                                                                                                           Jo. 14. 23

Refrão : Aleluia, Aleluia!! Repete-se

Na’i dehan: Ema nebé hadomi Ha’u, sei halo tuir Ha’u nia liafuan;

Ha’u Aman sei hadomi nia, Ami sei mai hela ho nia. Refrão

 

Evangelho                                                                                                                                                                                       Mt. 7. 21-29

Na’i Jesus Cristo Nia Evangelho nu’udar São Mateus haktuir:

Iha tempo nebá, Jesus tun ba nia escolante sira dehan: ‘La’os ema hotu nebé dehan mai Ha’u, Na’i, Na’i, sei tama iha reino Lalehan nian, maibé, ida nebé halo tuir ha’u Aman Nebé iha Lalehan Nia hakaran. Iha loron Juizo nian, ema barak sei dehan mai Ha’u; ‘Na’i, Na’i, la’os hodi Ita naran mak ami hanourin? La’os hodi Ita naran mak ami duni sai demónio sira? La’os hodi Ita naran mak ami halo buat foun oi-oin?’ Iha tempo nebá, Ha’u sei dehan ba sira: ‘Ha’u la hatene imi! Hadook tiha housi Ha’u, imi sira be halo de’it áat’.

Ema hotu nebé rona Ha’u liafuan sira ne’e, hodi halo tuir, nia sei sai hanesan ema neon na’in ida nebé hari nia uma iha fatuk leten. Udan monu rai, mota boot mai baku hasouru ema nebá, anin boot huu hasouru uma nebá; maibé nia la monu, tanba nia hari metin iha fatuk leten. Maibé, ema sira rona Ha’u liafuan sira ne’e, hodi la halo tuir liafuan hirak ne’e. Sira hanesan ema beik ida nebé hari nia uma iha raihenek leten. Udan monu ri, mota boot mai baku hasouru uma nebá, anin boot huu hasouru uma nebá: uma ne’e monu hodi naksobu tiha hotu”.

Jesus ko’alia hotu tiha, ema lubun boot hakfodak ho nia doutrina, basá, nia hanourin sira hanesan ema nebé iha kbiit ukun nian, la hanesan ema escriba sira.

Lia Maksoyn.

Leave a Reply

Your email address will not be published. Required fields are marked *