shadow
Diocese de Dili > NOTÍCIAS > LETURA DIÁRIA > Terça – Feira, XII Semana iha Tempo Comum (ANO C)

Terça – Feira, XII Semana iha Tempo Comum (ANO C)

Primeira Leitura                       13, 2. 5-18

Lia housi Livro Génesis:

Iha loron hirak neba, Abraão riku teb-tebes iha bibi luhan boot, osan mutin no osan mean. Lot, nebé la’o hamutuk ho Abraão, iha mos bibi, kuda, karau no tenda barak.  Maibé, fatin neba la to’o atu sira atu sira moris hamutuk. Sira nia riku-soi barak teb-tebes, tan ne’e, la fo fatin atu sira rua moris hamutuk. Sira nia bibi-atan no karau-atan sira hare malu la di’ak; hahu hirus malu no baku malu. Iha tempo neba, cananeu no ferezeu sira mak horik iha fatin neba. Nune’e, Abraão dehan ba Lot: “Ha’u husu ba ó atu ita na’in rua labele iha lia ba malu, no mos ita nia bibi-atan sira la bele iha lia ba malu, basa, ita parenti. Iha ó nia oin ó la hare rai boot teb-tebes? Ita rua haketak malu: ó la’o karik ba sorin ba sorin karuk, ha’u ba kuanan; ó ba karik kuanan, ha’u ba karuk.

Lot foti matan, hare rai tetuk boot Jordão nebé nia luan to’o iha Soar, nebé ué tama hela housi mota Jordão. Uainhira Na’i seidauk sobu hodi harahun Sodoma no Gomorro, fatin ne’e hanesan Na’i nia jardim, hanesan rai Egipto nian. Lot fihir hodi hili tiha rai tetuk tomak Jordão nian, hodi la’o ba Loro Sa’e. Nune’e mak sira rua haketak malu hodi moris keta-ketak. Abraão moris iha rai Canaã nian; Lot ba moris iha cidade sira housi rai tetuk, iha nebé nia halo tenda to’o Sodoma. Ema sira housi Sodoma mesak ema maksalak hodi halo sala oi-oin hasouru Maromak.

Uainhira Lot haketak-an ona housi Abraão, Na’i lia tun ba Abraão, dehan:  “Foti matan housi fatin nebé ó hela ba, hodi hare ba Tasi Feto no Tasi Mane, ba Loro Sa’e no ba Loro Monu. Rai hotu nebé ó hare daudaun, Ha’u sei saran ba ó no ba ó nia bei-oan sira ba nafatin. Ha’u sei halo ó nia bei-oan sira sai ua’in hanesan rai rahun iha rai.  Uainhira ema ruma bele sura rai rahun iha rai, bele mos sura ó nia bei-oan sira. Ó hamriik ba hodi la’o tuir rai sira nebé Ha’u hatudu ona ba ó, basa, rai sira ne’e hotu Ha’u sei saran ba ó”.

Abraão foti no lori nia tenda sira ba hari iha Carvalho Mambre nian iha Hebron. Iha neba, nia hari altar ida ba Na’i.

Maromak Futar Lia.

 

Salmo Responsorial                                                                                                                       Sal 14(15). 2-3ab, 3cd-4ab, 5 (R. 1b)

Refrão : Na’i sé mak bele horik iha Ita kadunan? Repete-se

Ou            Hanourin ami, Na’i: sé mak sei hôrik iha Ita uman?

Ema nebé moris hodi la halo salan,

moris tuir justisa no ko’alia lialos ho laran tomak.

Ema nebé la foti lia bosok hodi du’u matak. Refrão

 

Ema nebé la halo aat ba ema seluk,

la hakribi nia maluk.

Ema nebé hewai ema aat,

hahi ema nebé hamta’uk Maromak. Refrão

 

Ema nebé halo tuir nia juramento maski hetan susar,

la empresta nia osan hodi husu funan,

lakohi hatatan ema laran maus;

ema hanesan ne’e sei la monu. Refrão

 

Aclamação                                                                                                                                                                                             Jo. 8. 12

Refrão : Aleluia, Aleluia!! Repete-se

Na’i dehan: “Ha’u mundo nia roman;

ema se tuir Ha’u, sei hetan roman moris nian. Refrão

 

Evangelho                                                                                                                                                                                   Mt. 7. 6, 12-14

Na’i Jesus Cristo Nia Evangelho nu’udar São Mateus haktuir:

Iha tempo neba, Jesus hateten ba escolante sira: “Keta fo buat nebé santo ba asu sira. Keta soe imi nia fatuk murak ba fahi sira; lae karik, sira ne’e sei sama imi nia fatuk murak, hafoin fila hasouru imi hodi tata les imi.” “Ne’e duni, buat hotu nebé imi hakarak ema halo ba imi, imi mos halo ba sira; basa ne’e mak ukunfuan no Profeta sira.” “Tama housi odamatan kloot ba; basa odamatan boot no dalan luan mak lori ema atu lakon an, no ema barak liu housi nia. Maibé odamatan kloot tebes no dalan kiik duni mak lori ema ba moris, no ema uitoan de’it mak hetan nia.”

Lia Maksoyn.

 

Leave a Reply

Your email address will not be published. Required fields are marked *