shadow
Diocese de Dili > NOTÍCIAS > LETURA DIÁRIA > Sábado, XII Semana iha Tempo Comum (ANO C)

Sábado, XII Semana iha Tempo Comum (ANO C)

Primeira Leitura                       Gen. 18. 1-15

Lia housi livro Génesis:

Iha loron hirak nebá, Na’i mosu ba Abraáo besik Carvalho Mambré nian. Iha oras rai manas liu, Abraão tur hela iha odamatan. Abraão foti matan, haré ema na’in tolu hamriik hela iha nia oin. Haré tiha sira, Abraão husik hela odamatan tenda nian, ba hasouru sira. Hafoin Abraão hakru’uk to’o rai hodi hasa’e lia ba sira, dehan: “Ha’u Na’i, ha’u hetan karik di’ak iha ita futar oin, ha’u husu atu imi keta liu de’it, maibé, tama mai tur uituan iha atan nia uma. Ha’u sei ba hola wé uituan atu fase  imi ain, hodi tur hola mahan uitoan iha ai hun ne’e. Ha’u ba lori aihan uitoan atu ita bele han hodi hetan hikas kbiit; hafoin mak imi bele tuir imi dalan. Tan ne’e, mak imi atu liu housi ita atan oin”. Ema sira ne’e hatan: “Di’ak, halo tuir ó hateten”.

Abraão ba kedas buka Sara iha uma laran, hodi dehan ba nia: “Ba lori lalais farinha luhu tolu mai atu halo pão ruma”. Abraão halai ba káer karau vaka oan ida, sei nurak no bokur liu. Hafoin, fó karau ne’e ba atan ida atu oho hedi te’in lalais. Abraão lori mai manteiga no susu wen no mós na’an karau oan be te’in ona. Nia tau hotu iha sira na’in tolu nia oin; Abraão hamriik besik sira iha ai hun. Sira na’in tolu hahu han.

Hafoin, sira husu ba Abraão: “Ó nia káben Sara iha nebé?” Abraão hatan ba sira: “Iha uma laran nebá”. Sira ne’e ida, dehan ba nia: “Liu tiha tinan ida, Ha’u sei fila mai iha ne’e. Iha oras ne’e, ó nia káben Sara sei hetan oan mane ida”. Sara rona hela housi kotuk odamatan uma nian. Abraão ho Sara, katuas no ferik ona. Sira iha tinan barak liu ona. Sara tinan liu ona atu sai inan. Tan ne’e, nia hamnasa hodi dehan ba nia-an: “Oras ne’e ha’u tinan liu ona mak ha’u sei hetan ksolok nu’udar inan? Ha’u nia laa’en katuas ida!” Maibé, Na’i dehan ba Abraão: “Tan sá Sara hamnasa hodi dehan ba nia-an rasik: ‘Oras ne’e ha’u ferik ona, ha’u sei sai tebes duni inan?’ Maibé, ba Na’i iha buat ruma susar? Iha duni tempo hanesan ne’e, iha tinan oin mai, ha’u sei fila mai iha ne’e, Sara sei kô’us oan mane ida”. Maibé, Sara hakarak atu nega: “Ha’u la hamnasa ba ha’u.an”. Basá, nia ta’uk teb-tebes. Maibé, Na’i hatan ba nia: “Tebes, ó hamnasa duni!”.

Maromak Futar Lia.

 

Salmo Responsorial                                                                                                                 Lc. 1. 46-48, 49-50, 53-54 (R. cf. 54b)

Refrão : Na’i hanoin Nia laran-luak!!! Repete-se

Ha’y klamar hahi Maromak,

Ha’u neon haksolok iha Maromak, ha’u Maksoyn.

Na’i tau matan ba haraik-an Nia atan feto nian,

Houri ohin ba oin, housi otas ba otas

Ema hotu sei haklaken ha’u rahun-di’ak. Refrão

 

Ida be bele buat hotu halo kmanek wa’in iha ha’u,

Nia naran santo tebes.

Nia laran-luak hela housi otas ba otas,

Ho sira nebé hamta’uk Nia. Refrão

 

Haraik soi wa’in ba ema mukit sira,

Haruka riku sira fila ho liman mamuk.

Tau matan ba Nia atas Israel,

Hodi hanoin Nia laran-luak. Refrão

 

Aclamação                                                                                                                                                                                            Mt. 8. 17

Refrão : Aleluia, Aleluia!! Repete-se

Cristo simu ita nia terus hotu ba nia leten,

Lori ita nia moras tomak. Refrão

 

Evangelho                                                                                                                                                                                         Mt. 8. 5-17

Na’i Jesus Cristo Nia Evangelho nu’udar São Mateus haktuir:

Iha tempo nebá, Jesus tama iha Cafarnaum, centurião ida hakbesik ba Nia hodi harohan: “Na’i, ha’u nia atan toba iha uma, isin mate, terus áat liu”. Jesus dehan ba nia: “Ha’u sei ba fó isin di’ak ba nia”. Centurião simu fali “Na’i, ha’u la soi katak Ita Boot tama iha ha’u nia uma laran, maibé Ita Boot ko’alia liafuan ida de’it, ha’u nia atan sei hetan fali isin di’ak; basá ha’u mós tuir sira nebé ukun ha’u, no mós iha soldadu sira nebé tuir ha’u. Ha’u dehan ba ida: ‘Ó ba’ nia ba; ba ida seluk: ‘Halo ne’e’, nia halo”. Rona tiha nia Jesus hakfodak hodi dehan ba sira nebé tuir Nia: “Tebes, Ha’u dehan ba imi, Ha’u seidauk hetan ema ida ho fiar boot hanesan ne’e iha Israel. Ha’u dehan ba imi katak ema barak sei mai housi lorosa’e no loromonu tur iha mesa ho Abraão, Isaac no Jacob iha reino Lalehan; maibé ema soe reino nia oan sira ba nakukun iha liur, iha nebá sira sei tanis hodi ruun nehan”. Hafoin Nia dehan ba centurião: “La’o ona ba, buat hotu sei sai tuir ó nia fiar”. Iha duni oras nebá, atan hetan fali isin di’ak”.

Tuir mai, Jesus tama iha Pedro nia uma no haré Pedro nia banin feto moras isin manas, toba hela. Wainhira Jesus káer nia liman, isin manas husik kedas nia. Nia hamriik hodi hahu serbi nia.

Iha loraik, sira lori mai to’o Nia ema barak ho diabo iha laran. Nia duni sai diabo sira ho Nia liafuan hodi fó isin di’ak ba sira hotu nebé moras. Nune’e halo tuir duni buat nebé profeta Isaias dehan: ‘Nia sei simu ita nia moras hodi lori ita nia moras hotu’.

Lia Maksoyn. 

Leave a Reply

Your email address will not be published. Required fields are marked *